byసూర్య | Wed, Jun 26, 2024, 07:54 PM

ఏపీ డిప్యూటీ సీఎం పవన్ కళ్యాణ్.. ఉప ముఖ్యమంత్రి హోదాలో తొలిసారిగా తెలంగాణ పర్యటనకు రానున్నారు. ఏపీ ఉప ముఖ్యమంత్రిగా బాధ్యతలు స్వీకరించిన తర్వాత ఆయన తెలంగాణ పర్యటనకు రావటం ఇదే తొలిసారి. తెలంగాణ పర్యటనలో భాగంగా పవన్ కళ్యాణ్ కొండగట్టు అంజన్న ఆలయాన్ని దర్శించుకోనున్నారు. జూన్ 29న కొండగట్టు ఆలయాన్ని సందర్శించనున్న పవన్ కళ్యాణ్.. అంజన్న సన్నిధిలో ప్రత్యేక పూజలు చేయనున్నారు. మరోవైపు పవన్ కళ్యాణ్ ప్రస్తుతం వారాహి అమ్మవారి దీక్ష చేపట్టారు. దీక్షలో భాగంగానే ఆయన కొండగట్టు వస్తున్నట్లు తెలిసింది. అలాగే జులై ఒకటో తేదీ నుంచి పవన్ పిఠాపురం పర్యటనకు వెళ్లనున్నారు. ఈ మేరకు జనసేన పార్టీ షెడ్యూల్ విడుదల చేసింది.

మరోవైపు పవన్ కళ్యాణ్‌కు కొండగట్టు అంజన్న ఆలయం ఓ సెంటిమెంట్ అని చెప్పొచ్చు. పవన్ కళ్యాణ్ ఏ కార్యక్రమం చేపట్టినా అంజన్నకు ప్రత్యేక పూజలు నిర్వహించడం మామూలే. ఏపీ ఎన్నికల ప్రచారంలోనూ పవన్ కళ్యాణ్ ఇదే సెంటిమెంట్ ఫాలో అయ్యారు. ఎన్నికలకు చాలారోజుల ముందుగానే క్షేత్రస్థాయి పర్యటనల కోసం పవన్ కళ్యాణ్ వారాహి విజయభేరి యాత్రలు నిర్వహించారు. ఇందుకోసం ప్రత్యేకంగా వారాహి వాహనాన్ని తయారుచేయించారు పవన్ కళ్యాణ్. ఈ వాహనానికి కొండగట్టు అంజన్న ఆలయంలోనే తొలిపూజలు నిర్వహించారు. ఆ తర్వాత ఏపీలో వారాహి విజయభేరి యాత్రలను పవన్ కళ్యాణ్ చేపట్టిన సంగతి తెలిసిందే.

 కొండగట్టు అంజన్న ఆలయం సందర్శన తర్వాత జులై ఒకటో తేదీ నుంచి పవన్ కళ్యాణ్.. పిఠాపురంలో పర్యటిస్తారు. జులై 1వ తేదీ పిఠాపురం వెళ్లనున్న ఏపీ డిప్యూటీ సీఎం.. అదే రోజు సాయంత్రం పిఠాపురంలో వారాహి సభ నిర్వహిస్తారు. ఎన్నికల్లో తనకు మద్దతు పలికి.. భారీ మెజారిటీతో గెలిపించిన పిఠాపురం ప్రజలకు ధన్యవాదాలు తెలియజేస్తారు. మూడురోజుల పాటు పిఠాపురంలో ఉండనున్న పవన్ కళ్యాణ్.. పిఠాపురంతో పాటుగా ఉమ్మడి తూర్పు గోదావరి జిల్లాలోని పలు అధికారిక కార్యక్రమాలలో పాల్గొంటారు. అలాగే కాకినాడ జిల్లా అధికారులు, పిఠాపురం అధికారులతో అభివృద్ధి, సంక్షేమ కార్యక్రమాలపై సమీక్షిస్తారు. పిఠాపురం నియోజకవర్గ అభివృద్ధి, మౌలిక సదుపాయాల కల్పనపై ప్రత్యేకంగా సమావేశం కానున్నారు.