byసూర్య | Wed, Jun 26, 2024, 07:59 PM

బస్సు ప్రయాణికులకు టీజీఎస్‌ఆర్టీసీ అధికారులు గుడ్‌న్యూస్ చెప్పారు. హైదరాబాద్ నగరంలో కొత్తగా బస్సు పాస్ కౌంటర్లు పెట్టినట్లు గ్రేటర్ హైదరాబాద్ ఆర్టీసీ జోన్ అధికారులు వెల్లడించారు. ప్రయాణికుల సౌకర్యార్థం పాత కౌంటర్లకు అదనంగా మరికొన్ని ఏర్పాటు చేసినట్లు తెలిపారు. విద్యార్థులు, ఉద్యోగులకు ఉపయోగ పడే విధంగా ఐటీ కారిడార్‌కు సమీపంలో జేఎన్టీయూ బస్టాప్, లక్డీకపూల్ బస్టాపుల్లో ఈ కౌంటర్లు ఏర్పాటు చేసినట్లు వెల్లడించారు. ఆదివారం మినహా మిగిలిన రోజుల్లో ఈ కౌంటర్లు పని చేస్తాయన్నారు. ఉదయం 6.30 నుంచి రాత్రి 8.15 గంటల వరకు బస్ పాస్ కౌంటర్లు పని చేస్తాయని చెప్పారు. విద్యార్థులు, ఉద్యోగులు గంటలకొద్దీ క్యూలైన్లలో నిల్చోవాల్సిన పని లేకుండా ఈ కౌంటర్లు ఏర్పాటు చేసినట్లు ఆర్టీసీ అధికారులు తెలిపారు.

  ఇక గ్రేటర్‌ హైదరాబాద్‌లో ప్రయాణికుల కోసం కొత్తగా గ్రీన్‌ మెట్రో లగ్జరీ నెలవారీ బస్సు పాస్‌లను ప్రవేశపెట్టారు. ఈ బస్సు పాస్ ధరను రూ.1900లుగా ధర నిర్ణయించారు. ప్రస్తుతం హైదరాబాద్‌లో 219 రూట్ నెంబరుతో సికింద్రాబాద్‌ - పటాన్‌చెరు మధ్య, 195 రూటు నెంబరుతో బాచుపల్లి - వేవ్‌రాక్‌ పార్కు మధ్య, 127కె నెంబరుతో కొండాపూర్‌ - కోఠి మధ్య ఏసీ బస్సులు నడుస్తున్నాయి. ఈ రూట్లలో ప్రయాణాలు సాగించేవారు గ్రీన్ మెట్రో లగ్జరీ నెలవారీ బస్సు పాసులను తీసుకోవానలి ఆర్టీసీ అధికారులు సూచించారు.