byసూర్య | Sat, Jun 22, 2024, 07:26 PM

తెలంగాణ అసెంబ్లీ ఎన్నికల్లో ఇచ్చిన హామీ మేరకు రేవంత్ రెడ్డి ప్రభుత్వం.. రైతులకు పంట రుణమాఫీని అమలు చేసేందుకు సిద్ధమైంది. రూ. 2 లక్షల మేరకు రుణాన్ని ఏకకాలంలో మాఫీ చేసేందుకు మంత్రివర్గం ఆమోదం తెలిపింది. ఈ రుణమాఫీ ప్రక్రియను.. ఆగస్టు 15 తేదీ లోపల పూర్తి చేస్తామని సీఎం రేవంత్ రెడ్డి ప్రకటించారు. అయితే.. ఈ ప్రక్రియ ఎప్పటి నుంచి ప్రారంభమవుతుంది.. విధివిధానాలేంటీ.. లాంటి అంశాలపై ఇంకా క్లారిటీ రాకపోయినప్పటికీ.. నెట్టింట కాంగ్రెస్ శ్రేణులు హల్చల్ చేస్తున్నారు. బీఆర్ఎస్ మాజీ మంత్రి హరీష్ రావును రాజీనామా లేఖ సిద్ధం చేసుకోవాలంటూ సెటైర్లు వేస్తున్నారు.

పార్లమెంట్ ఎన్నికల సమయంలో.. రుణమాఫీపై సీఎం రేవంత్ రెడ్డికి, హరీశ్ రావుకు మధ్య సవాళ్ల పర్వం నడిచిన సంగతి తెలిసిందే. ఆగస్టు 15 వరకు 2 లక్షల రుణమాఫీని ఏకకాలంలో చేసి తీరతామని రేవంత్ రెడ్డి ఛాలెంజ్ చేయగా.. అలా కాంగ్రెస్ ప్రభుత్వం చేయలేదని, ఒకవేళ చేస్తే తాను తన పదవిని రాజీనామా చేస్తానంటూ హరీష్ రావు సవాల్ విసిరారు. ఈమేరకు ఓ రాజీనామా పత్రంలో అమరవీరుల స్థూపం వద్దకు వచ్చారు కూడా. కట్ చేస్తే.. ఇప్పుడు రుణమాఫీ అమలుకు మంత్రివర్గ ఆమోదం తెలపగా.. ఇక అమలే తరువాయిగా మారింది.

ఈ క్రమంలో.. రాజీనామా లేఖ సిద్ధం చేసుకోవాలంటూ హరీశ్ రావును కాంగ్రెస్ నేతలు ఆడేసుకుంటున్నారు. అటు నెట్టింటే కాదు.. కాంగ్రెస్ నాయకులు కూడా ప్రారంభించేశారు. ఎమ్మెల్సీ జీవన్ రెడ్డి కూడా హరీష్ రావును రాజీనామా లేఖ సిద్ధం చేసుకోవాలంటూ ఎద్దేవా చేశారు. ఆగస్టు 15 లోపు ఏకకాలంలో 2 లక్షల రుణమాఫీ చేయాలన్న మంత్రివర్గ నిర్ణయంపై రైతుల పక్షాన సీఎం రేవంత్ రెడ్డికి కృతఙ్ఞతలు తెలిపారు. సీఎం రేవంత్ రెడ్డికి కృతజ్ఞతగా ప్రతి మండలంలో కాంగ్రెస్ శ్రేణులు సంబురాలు నిర్వహించాలన్నారు. కేటీఆర్, హరీశ్ రాజీనామా పత్రం పట్టుకుని సిద్ధంగా ఉండాలన్నారు జీవన్ రెడ్డి.