byసూర్య | Wed, Apr 17, 2024, 08:01 PM

అన్నం పెట్టిన ఇంటికే సున్నం పెట్టిందో బాలిక. ఇన్‌స్టా లవర్ కోసం ఇంటినే దోచేసింది. డబ్బు, బంగారం కలిపి రూ. 13 లక్షల వరకు తన లవర్‌కు ఇచ్చేసింది. ఆ తర్వాత ఏమీ తెలియనట్లు నాటకమాడాంది. ఇంట్లో తరుచుగా డబ్బులు కనిపించకుండా పోతుండటంతో అనుమానం వచ్చి ఆరా తీయగా అసలు విషయం వెలుగులోకి వచ్చింది. వివరాల్లోకి వెళితే.. ఏపీలోని జగ్గయ్యపేటకు చెందిన శ్రీనివాసరావు హైదరాబాద్ చిలకలగూడలో ఉంటూ ఉద్యోగం చేస్తున్నాడు. అతడి మరదలి కూతురు (13) వీరి వద్దే ఉంటూ స్థానికంగా 8వ తరగతి చదువుతోంది.

అయితే సోషల్ మీడియాలో యాక్టివ్‌గా ఉండే బాలికకు వైఎస్‌ఆర్‌ జిల్లా పెంట్లమర్రి మండలం వేలూరుపాడుకు చెందిన చెప్పలి విజయ్‌కుమార్‌రెడ్డి (19) ఆన్‌లైన్‌లో పరిచయమయ్యాడు. బెంగళూరులో డిగ్రీ చదవుతున్న విజయ్ ఆన్‌లైన్‌ బెట్టింగ్‌లకు అలవాటుపడ్డాడు. ఇన్‌స్టాలో అర్జున్‌రెడ్డి పేరుతో పరిచయమై ప్రేమిస్తున్నానంటూ బాలికను నమ్మించాడు. ఆ తర్వాత అవసరాలకు ఎంత కావాలంటే అంత డబ్బు తీసుకునేవాడు. పెదనాన్న ఇంటికి కన్నం వేసిన బాలిక విడతల వారీగా రూ.1.50 లక్షల నగదు, 16 తులాల ఆభరణాలు మెుత్తంగా రూ. 13 లక్షల సొత్తును అతడికి ఇచ్చింది.

ఓ రోజు శ్రీనివాస్‌రావు జేబులో రూ.3 వేలు కనిపించకుండా పోయాయి. అనుమానంతో బాలికను ప్రశ్నించగా తనకు తెలియదని చెప్పింది. ఇంట్లోని బీరువా, అల్మారాలు పరిశీలించగా రూ. 1.50 లక్షల నగదు, 16 తులాలం బంగారం కనిపించలేదు. బాలిక ఫోన్‌ చేయగా.. విజయ్‌కుమార్‌ అనే యువకుడితో ప్రేమలో ఉన్నట్లు తేలింది. ఆన్‌లైన్‌లోనే అతడికి డబ్బులు పంపినట్లు.. నగలను తన క్లాస్‌మేట్‌ తల్లి సాయంతో కుదవపెట్టి డబ్బులు పంపించినట్లు తెలిసింది. దీంతో శ్రీనివాసరావు చిలకలగూడ పోలీసులకు ఫిర్యాదు చేశారు. కేసు నమోదు చేసుకున్న పోలీసులు.. విజయ్ సికింద్రాబాద్‌ రైల్వేస్టేషన్‌లో ఉన్నట్లు గుర్తించి అదుపులోకి తీసుకున్నారు.