byసూర్య | Tue, Apr 16, 2024, 07:02 PM

మందుబాబులకు బ్యాడ్ న్యూస్. హైదరాబాద్‌లో మద్యం దుకాణాలు బంద్. శ్రీరామనవమి సందర్భంగా రేపు అంటే.. ఏప్రిల్ 17వ తేదీన హైదరాబాద్‌లో వైన్స్ షాపులు బంద్ చేయాలని హైదరాబాద్ సీపీ ఆదేశాలు జారీ చేశారు. అత్యంత భక్తిభావంతో వాడవాడలా రామనామ స్మరణతో శ్రీరామనవమి వేడుకలు జరగనున్న నేపథ్యంలో.. రేపు మద్యం దుకాణాలు బంద్ చేయనున్నారు. రేపు ఉదయం 6 గంటల నుంచి, 18వ తేదీ ఉదయం 6 గంటల వరకు మద్యం దుకాణాలతో పాటు కల్లు దుకాణాలు, బార్లు బంద్ చేయాలని హైదరాబాద్ సీపీ శ్రీనివాస్ రెడ్డి ఆదేశించారు.

శ్రీరామనవమి పండుగ సందర్భంగా.. శాంతిభద్రతల పరిరక్షణలో భాగంగా వైన్ షాపులు మూసివేస్తున్నట్లు సీపీ వెల్లడించారు. ఎవరైనా నిబంధనలకు విరుద్ధంగా మద్యం దుకాణాలు తెలిస్తే కఠిన చర్యలు తీసుకుంటామని సీపీ హెచ్చరించారు. దీంతో.. రేపు అంతా మద్యం దుకాణాలు బంద్ ఉంటాయని తెలుసుకున్న మద్యం ప్రియులు.. దగ్గర్లో ఉన్న మద్యం దుకాణాలకు పరుగులు పెడుతున్నారు. రేపటి కోటా కూడా ఈరోజే కొనుగోలు చేసుకుంటున్నారు. ఎండను కూడా లెక్కచేయకుండా వైన్ షాపుల ముందు క్యూ కడుతున్నారు. ఇప్పటికే తెలంగాణలో బీర్ల కొరత ఏర్పడిందని మద్యం ప్రియులు తీవ్ర అసంతృప్తితో ఉన్నారు. ఇదే సమయంలో.. మద్యు దుకాణాలతో పాటు బార్లు, కల్లు దుకాణాలు కూడా ఒక రోజు మొత్తం బంద్ ఉండటంతో.. మందుబాబులకు బ్యాడ్ న్యూస్‌గా మారింది.