byసూర్య | Mon, Apr 29, 2024, 09:10 PM

ప్రస్తుతం హైదరాబాద్‌కు ఔటర్ రింగ్ రోడ్డు మణిహారంలా ఉంది. ఈ ప్రాజెక్టు అందుబాటులోకి వచ్చాక.. హైదరాబాద్ మరింతగా అభివృద్ధి చెందింది. ఓఆర్ఆర్ నగర అభివృద్ధికి గేమ్ చేంజర్ అని ప్రభుత్వంలోని పెద్దలు అంటూ ఉంటారు. ఔటర్ చుట్టూ అనేక పరిశ్రమలు, పెద్ద పెద్ద కంపెనీలు పెట్టుబడులు పెట్టాయి. రియల్ ఎస్టేట్ పరంగానూ ఓఆర్ఆర్ చుట్టూ గణనీయమైన అభివృద్ధిని సాధించాం. అయితే ప్రస్తుతం ఉన్న ఓఆర్‌ఆర్‌కు సుమారు 40 కి.మీ దూరం నుంచి రీజినల్ రింగు రోడ్డు నిర్మిస్తున్న సంగతి తెలిసిందే.

ఉత్తర, దక్షణి రెండు భాగాలుగా ఈ ప్రాజెక్టును చేపట్టారు. ఇప్పటికే ఉత్తర భాగానికి కేంద్ర ప్రభుత్వం నుంచి గ్రీన్ సిగ్నల్ రావటంతోపాటు జాతీయ నెంబర్ కూడా కేటాయించారు. ప్రాజెక్టు పనులు ఇప్పటికే మెుదలయ్యాయి. ప్రస్తుతం ఉత్తర భాగానికి సంబంధించి భూసేకరణ జరుగుతోంది. గతంలో కాంగ్రెస్ హయంలో ఓఆర్ఆర్ నిర్మించగా.. ఇప్పుడు అదే పార్టీ అధికారంలో ఉండగానే రీజినల్ రింగు రోడ్డును పూర్తి చేయాలని భావిస్తోంది. ఓఆర్ఆర్ గేమ్ ఛేంజర్ అయితే.. రీజినల్ రింగు రోడ్డు సూపర్ గేమ్ ఛేంజర్ అని ప్రభుత్వ పెద్దలు చెబుతున్నారు.

ఈ నేపథ్యంలో రీజినల్ రింగురోడ్డు నిర్మాణం, భవిష్యత్ ప్రణాళికలపై సీఎం రేవంత్ రెడ్డి కీలక కామెంట్స్ చేశారు. ఓ తెలుగు దినపత్రికకు ఇచ్చిన ఇంటర్వ్యూలో మాట్లాడిన ఆయన.. రీజినల్ రింగు రోడ్డు తెలంగాణకు పెద్ద వరం లాంటిందని అన్నారు. ఔటర్‌ రింగురోడ్డుతో మన ఆర్థిక పరిస్థితులు ఒక స్థాయికి వచ్చినట్లే రీజినల్‌ రింగురోడ్డుతో మరింత అభివృద్ధి సాధ్యమవుతుంది. ఫార్మా క్లస్టర్లు, హెల్త్‌, ఎడ్యుకేషన్‌, స్పోర్ట్స్‌ టూరిజంలతో పాటు.. ఆర్గానిక్‌ ఫుడ్‌పైనా దృష్టి పెట్టామన్నారు. సేంద్రియ పంటలు పండించడానికి రైతులకు సాంకేతిక నైపుణ్యం, నీళ్లు అందించనున్నట్లు వెల్లడించారు.

తెలంగాణ ప్రపంచ పెట్టుబడులకు ద్వారం తెరిచినట్లు అవుతుందని..ఇతర రాష్ట్రాలు, దేశాల్లోని పెద్ద పెద్ద కంపెనీలు ఇక్కడ పెట్టుబడులు పెడతాయని చెప్పారు. వాళ్ల పెట్టుబడికి నష్టం కలగకుండా చూసే బాధ్యత తమ ప్రభుత్వానిదని వెల్లడించారు. ఈ రింగురోడ్డు నిర్మాణం పూర్తయితే.. రాష్ట్రానికి ఆదాయం పెరుగుతుందని చెప్పారు. ఉద్యోగ, ఉపాధి అవకాశాలు పెరుగుతాయని.. ఈ రెండింటినీ దృష్టిలో పెట్టుకొని భవిష్యత్‌ ప్రణాళిక ఉంటుందని సీఎం రేవంత్ వివరించారు.