byసూర్య | Wed, Oct 30, 2024, 08:19 PM

తెలంగాణలో పత్తి కొనుగోళ్లు ఊపుందుకున్నాయి. రైతులు పండించిన పత్తి పంటను సీసీఐ కేంద్రాలకు తరలించి విక్రయిస్తున్నారు. అయితే తేమ, ఇతర కారణాలతో పంటకు తక్కువ ధరను చెల్లిస్తున్నారు. దీనిపై రైతులు ఆవేదన వ్యక్తం చేస్తున్నారు. ఈ నేపథ్యంలో సీసీఐ కేంద్రాలకు వచ్చే పత్తి పంట కొనుగోళ్లపై మంత్రి పొంగులేటి శ్రీనివాస్ రెడ్డి అధికారులు, సీసీఐ కేంద్రాల నిర్వహకులకు కీలక ఆదేశాలు జారీ చేశారు. సీసీఐకి పత్తి పంట తెచ్చిన రైతులను తేమ సాకుతో ఇబ్బంది పెట్టొద్దని చెప్పారు. అర కిలో కూడా అన్నదాతలు నష్టపోకుండా చూడాలని అధికారులను ఆదేశించారు.

ఖమ్మం జిల్లా తిరుమలాయపాలెం మండలంలోని కాటన్‌ మిల్లులో సీసీఐ పత్తి కొనుగోలు కేంద్రాన్ని మంత్రి ప్రారంభించారు. అనంతరం మాట్లాడిన ఆయన.. ఇటీవల కురిసిన భారీ వర్షాలతో చాలా ప్రాంతాల్లో పత్తి పంటలు పూర్తిగా దెబ్బతిన్నాయని అన్నారు. నిబంధనల ప్రకారం 8 నుంచి 12శాతం వరకు తేమ ఉన్న పత్తికి ఎటువంటి అభ్యంతరాలు వ్యక్తం చేయకుండా గిట్టుబాటు ధర కల్పించాలని సూచించారు. రైతులే పంటను నేరుగా సీసీఐ కేంద్రాలకు తీసుకొచ్చి పంటను విక్రయించుకునేలా మండల అధికారులు ప్రోత్సహించాలని చెప్పారు.

తెలంగాణ వ్యాప్తంగా ఉన్న సీసీఐ కొనుగోలు కేంద్రాల్లో జిల్లా వ్యవసాయ శాఖ అధికారుల ఫోన్‌ నంబర్లను తప్పకుండా ఉంచాలని ఆదేశించారు. అధికారులు సీసీఐ కేంద్రాలను తరుచూ సందర్శిస్తూ కాంటాపై ఉన్న పత్తి తేమ శాతాన్ని పరిశీలించాలని చెప్పారు. రైతులు నష్టపోకుండా వారికి మద్దతు ధర కల్పించాలని సూచించారు.

అయితే మంత్రి చెప్పిన దానికి క్షేత్రస్థాయిలో వాస్తవ పరిస్థితి వేరుగా ఉంది. ఆదిలాబాద్ వ్యవసాయ మార్కెట్ యార్డులో పత్తికి మద్దతు ధర దక్కడంలేదు. తేమ పేరుతో సీసీఐ, ప్రైవేటు వ్యాపారులు రైతులను ఇబ్బందులకు గురి చేస్తున్నారు. ఇప్పటి వరకు సీసీఐ కేంద్రం 4,235 క్వింటాళ్ల పత్తి కొనుగోలు చేసింది. ఇదే సమయంలో ప్రైవేటు వ్యాపారులు 26,484 క్వింటాళ్ల పత్తి కొనుగోలు చేశారు. కేంద్ర ప్రభుత్వం ఇటీవల పత్తి మద్దతు ధరను పెంచంది. క్వింటాకు రూ.7,521గా ప్రకటించింది. అయితే ఒక్క రైతుకు కూడా ఇప్పటివరకు ఆదిలాబాద్‌లో ఆ ధర దక్కింది లేదు. కాగా, రేపటి (అక్టోబర్ 31 ) నుంచి నాలుగు రోజుల పాటు పత్తి కొనుగోళ్లను నిలిపివేయనున్నారు.