byసూర్య | Fri, Oct 18, 2024, 10:09 PM

బంగాళాఖాతంలో ఏర్పడిన వాయుగుండం అల్పపీడనంగా మారిందని హైదరాబాద్ వాతావరణ కేంద్రం అధికారులు వెల్లడించారు. తాజా వెదర్ రిపోర్ట్ ప్రకారం.. ఏపీలోని రాయలసీమపై అల్పపీడనం కాస్త బలహీనపడిందన్నారు. అయితే ప్రస్తుతం అక్కడే స్థిరంగా కొనసాగుతుందని చెప్పారు. సముద్ర మట్టం నుంచి 5.8 కిలోమీటర్ల ఎత్తువరకూ అది మేఘాలతో ఆవరించి ఉందన్నారు. అక్టోబర్ 22న మరో అల్పపీడనం మధ్య బంగాళాఖాతంలో ఏర్పడే ఛాన్స్ ఉన్నట్లు చెప్పారు. అది ఒడిశా వైపు కదులుతూ.. బలపడే అవకాశం ఉందన్నారు. దీని కారణంగా ఏపీ, తెలంగాణలో అక్కడక్కడా తేలికపాటి నుంచి ఓ మోస్తరు వర్షాలు కురుస్తాయన్నారు.

  నేటి నుంచి మూడ్రోజుల పాటు తెలంగాణలోని పలు జిల్లాల్లో వర్షాలు కురిసే అవకాశం ఉన్నట్లు హైదరాబాద్ వాతావరణ కేంద్రం అధికారులు వెల్లడించారు. ఉమ్మడి ఆదిలాబాద్, కరీంనగర్, రంగారెడ్డి, మహబూబ్‌నగర్, ఖమ్మం, వరంగల్, నిజామాబాద్‌ జిల్లాల్లో అక్కడక్కడ వర్షాలు కురుస్తాయన్నారు. ఈ మేరకు ఈ జిల్లాలకు ఎల్లో అలర్ట్ జారీ చేశారు. మిగతా జిల్లాల్లో తేలికపాటి జల్లులు పడే అవకాశాలున్నాయని వెల్లడించారు. నేడు తెలంగాణ వ్యాప్తంగా ఆకాశం మేఘావృతమై ఉంటుందని చెప్పారు. మధ్యాహ్నం 3 తర్వాత నుంచి సాయంత్రం 7 వరకూ రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు కురుస్తాయి.

హైదరాబాద్‌ నగర వ్యాప్తంగా పొడి వాతావరణం ఉంటుందని.. అప్పుడప్పుడు ఎండగా అనిపించినా.. సాయంత్రానికి పలు ప్రాంతాల్లో వర్షం కురిసే అవకాశం ఉందన్నారు. ఈ మేరకు నగర ప్రజలకు హెచ్చరికలు జారీ చేశారు. వర్షం కురిసే సమయంలో బయటకు రావొద్దని సూచించారు. ఇక గురువారం రాష్ట్రవ్యాప్తంగా పలు జిల్లాల్లో వర్షాలు కురిశాయి. అత్యధికంగా సిరిసిల్ల జిల్లా గంభీరావుపేటలో 7.9 సెంటీమీటర్ల వర్షం కురిసినట్లు వాతావరణ శాఖ అధికారులు తెలిపారు. ఆ తర్వాత కామారెడ్డి జిల్లా మాచారెడ్డి మండలం లచ్చపేటలో 5.6 సెం.మీ. వర్షం కురిసింది. కరీంనగర్‌ జిల్లా కేంద్రంలో 5.6 సెం.మీ, కామారెడ్డి జిల్లా పాల్వంచ మండలం ఎలుపుగొండలో 5.3 సెం.మీ. వర్షపాతం నమోదైనట్లు వాతావరణ శాఖ అధికారులు వెల్లడించారు.