byసూర్య | Thu, Jul 25, 2024, 09:57 PM

ఫ్యాన్సీ నంబర్ మోజు ఉన్నవారు.. తమకు నచ్చిన నెంబర్లను దక్కించుకునేందుకు ఎన్ని లక్షలైనా ఖర్చుపెడుతుంటారు. తమకు ఇష్టమైన, అచ్చొచ్చే నంబర్లను దక్కించుకోవడానికి ఏ మాత్రం వెనుకంజ వేయరు. కొన్నిసార్లు వాహనపు ధర కంటే నెంబర్ కోసం ఖర్చు పెట్టిన డబ్బులే ఎక్కువ ఉంటాయి. మరికొన్ని సార్లు అయితే ఆ ధరలో ఓ రెండు, మూడు బడ్జెట్ కార్లు కూడా కొనేయవచ్చు. అటువంటి వారి ఆశే ఇప్పుడు తెలంగాణ ఆర్టీఏకు కాసుల వర్షం కురిపిస్తోంది. హైదరాబాద్ ఆర్టీఏ అధికారులు నిర్వహించిన ఫ్యాన్సీ నంబర్ల వేలం ద్వారా ప్రభుత్వానికి భారీగా ఆదాయం సమకూరింది.

బుధవారం హైదరాబాద్‌ ఖైరతాబాద్‌లోని రవాణా కార్యాలయంలో ఫ్యాన్సీ నంబర్ల వేలం నిర్వహించారు. ఈ వేలంలో TG09 A 9999 అనే నంబర్ రికార్డు ధర పలికింది. ఆ నంబర్‌ ఏకంగా రూ.19,51,111 పలికింది. హానర్స్‌ డెవలపర్స్‌ అనే సంస్థ ఆ మొత్తాన్ని ఆర్టీఏకు చెల్లించి ఫ్యాన్సీ నంబరును సొంతం చేసుకుంది. ఇక కొత్తగా ప్రారంభమైన TG09 B సిరీస్‌లో 0001 నంబర్‌కు కూడా రికార్డు ధర పలికింది. నంబర్‌ను రూ.8.25 లక్షలు చెల్లించి ఎన్‌జీ మైండ్‌ ఫ్రేమ్‌ అనే సంస్థ సొంతం చేసుకుంది. అదే సిరీస్‌లోని 0009 నంబరును రూ.6.66 లక్షలు చెల్లించి అమరం అక్షరరెడ్డి అనే వ్యక్తి దక్కించుకున్నాడు.

నంబర్ 0006ను రూ.2.91 లక్షలతో ఏఎంఆర్‌ ఇండియా అనే సంస్థ , 0005 నంబర్‌ను రూ.2.50 లక్షలతో గ్రేటర్‌ ఇన్‌ఫ్రా ప్రాజెక్ట్స్ అనే సంస్థ, 0019 నంబర్‌ను రూ.1.30 లక్షలు చెల్లించి మోల్డ్‌ టెక్‌ అనే సంస్థ సొంతం చేసుకుంది. ఈ మేరకు ఆర్టీఏ అధికారులు ఆదాయ వివరాలు వెల్లడించారు. బుధవారం (జులై 24) మొత్తం ఫ్యాన్సీ నంబర్ల ద్వారా ఖైరతాబాద్‌ రవాణా శాఖకు రూ.51,17,514 ఆదాయం సమకూరినట్లు అధికారులు వెల్లడించారు.