byసూర్య | Thu, Jul 25, 2024, 09:52 PM

వరంగల్ జిల్లాలోని ఖానాపురం మండలం బుధరావుపేటకు చెందిన వెంకటనారాయణ, సుజాత దంపతులు. ఎంతో అన్యోన్యంగా ఉండేవారు. ఎంతంటే.. వాళ్ల మధ్య ఉన్న ఆప్యాయతానురాగాలు చూసి విధికే కన్నుకుట్టేలా. ఎంతో ప్రేమగా ఉంటే ఆ దంపతులను విధి విడదీసింది. గతేడాది గుండెపోటుతో సుజాత మృతిచెందింది. అయితే.. ప్రాణానికి ప్రాణంగా ప్రేమించే భార్య ప్రాణాలు వదలటాన్ని జీర్ణించుకోలేకపోయాడు వెంకటనారాయణ.

తన భార్య మరణించినా.. నిత్యం తన కన్నుల ముందే ఉండాలని.. ఆమె చివరి శ్వాస వరకు తనపై చూపించిన ప్రేమ, భక్తి భావాలను తిరిగివ్వాలని నిర్ణయించుకున్నాడు. ఈ క్రమంలోనే.. ఆమె గుర్తుగా పొలం వద్ద గుడి కట్టించారు. అందులో తన భార్య ప్రతిరూపాన్ని ప్రతిష్టించి.. పూజలు చేస్తున్నారు. ఇలా తన అర్ధాంగిపై తన ఆకాశమంత ప్రేమను చాటుకుంటూ.. భార్యాభర్తల మధ్య అనురాగాన్ని చాటిచెప్తున్నారు.

గతంలోనూ.. ఇలాంటి ఘటనే మహబూబాబాద్ జిల్లాలో చోటుచేసుకుంది. తన భార్యపై ఉన్న ప్రేమతో.. భర్తకు గుడికట్టి పతిభక్తిని చాటుకుంది. మహబూబాబాద్‌ జిల్లా పర్వతగిరి శివారు సోమ్లాతండాకు చెందిన బానోతు హరిబాబు, కళ్యాణి దంపతులకు 23 ఏళ్ల క్రితం వివాహం జరిగింది. ఈ దంపతులకు పిల్లలు లేకపోవటంతో.. ఒకరినొకరు పిల్లల్లా భావిస్తూ ఆప్యాయతానురాగాలు పంచుకునేవారు. కానీ.. ప్రపంచాన్ని వణికించిన కోవిడ్.. 2020 సెప్టెంబరు 9న హరిబాబును పొట్టనబెట్టుకుంది.

దీంతో.. తన భర్తను మర్చిపోలేక.. తమ 23 ఏళ్ల వైవాహిక జీవితానికి గుర్తుగా భర్త విగ్రహాంతో పాలరాతి గుడిని నిర్మించింది. రూ.7 లక్షలతో రాజస్థాన్‌లో హరిబాబు పాలరాతి విగ్రహాం తయారు చేయించారు. మొత్తంగా రూ.30 లక్షలు ఖర్చు చేసి గుడి నిర్మించారు. వేదమంత్రోచ్ఛారణల మధ్య హరిబాబు విగ్రహాన్ని ప్రతిష్ఠించారు. గుడిలో భర్తను నిత్యం పూజించడంతో పాటు జయంతి, వర్ధంతి కార్యక్రమాలు నిర్వహిస్తానని కల్యాణి తెలిపారు. ఈ ఘటనతో తన భర్తపై ప్రేమను చాటుకోవటమే కాదు.. పతియే ప్రత్యక్ష దైవం అనే వాఖ్యాన్ని నిరూపించారు.