byసూర్య | Sat, Apr 20, 2024, 09:31 PM

తెలంగాణ పార్లమెంట్ ఎన్నికల్లో నామినేషన్ల పర్వం ఊపందుకుంది. ఈనెల 18న నామినేషన్ల పర్వం మెుదలుకాగా.. శుక్రవారం పలు పార్టీలకు చెందిన అభ్యర్థులు నామినేషన్లు దాఖలు చేసారు. కరీంనగర్ పార్లమెంట్ స్థానం నుంచి బీజేపీ అభ్యర్థిగా బండి సంజయ్ కుమార్, సికింద్రాబాద్ నుంచి బీజేపీ రాష్ట్ర అధ్యక్షుడు, కేంద్రమంత్రి కిషన్ రెడ్డి నామినేషన్ పత్రాలు రిటర్నింగ్ అధికారులకు అందజేశారు. ఈ సందర్భంగా అఫిడవిట్‌లో తమ ఆస్తులు, అప్పులు కేసుల వివరాలు వెల్లడించారు.

ఉమ్మడి కుటుంబంలో ఉంటున్న బండి సంజయ్‌ పేరిటగాని, ఆయన భార్యకుగాని సొంతిల్లు లేదు. గుంట వ్యవసాయ భూమి కూడా లేదు. ఆయనపై మొత్తం 41 క్రిమినల్‌ కేసులున్నట్లు వెల్లడించారు. కుటుంబ ఆస్తుల విలువ రూ.1.12 కోట్లు. స్థిరాస్తులు లేకున్నా 3 కార్లు, 2 ద్విచక్ర వాహనాలు ఉన్నాయి. ఆయన సతీమణికి 43 తులాల బంగారం ఉంది. సంజయ్‌ కుటుంబానికి వాహనాల కోసం తీసుకున్న అప్పులు రూ.13.4 లక్షలు ఉన్నట్లు వెల్లడించారు. ఇవి తప్ప ఇద్దరి పేరిట ఎక్కడా భూమి లేదని అఫిడవిట్‌లో పేర్కొన్నారు.

సికింద్రాబాద్‌ బీజేపీ అభ్యర్థి జి.కిషన్‌రెడ్డి కుటుంబానికి రూ.19.22 కోట్ల ఆస్తులున్నట్లు వెల్లడించారు. ఆయనపై ఎలాంటి క్రిమినల్‌ కేసులు లేవు. కుటుంబానికి బ్యాంకుల్లో డిపాజిట్లు, సుమతి సీడ్స్‌లో షేర్లు, వైష్ణవి అసోసియేట్స్‌లో పెట్టుబడులు, వీ అండ్‌ టీ అసోసియేట్‌లో కొంత వాటా, 1995లో కొనుగోలు చేసిన మారుతి 800 కారు మాత్రమే ఉన్నాయి. అప్పటి నుంచి ఆయన అదే కారు వాడుతున్నారు. 80 తులాల బంగారంతో స్వగ్రామమైన రంగారెడ్డి జిల్లా కందుకూరు మండలం తిమ్మాపూర్‌లో 8.28 ఎకరాల వ్యవసాయ భూమి, బంజారాహిల్స్‌, యూసుఫ్‌గూడల్లో ప్లాట్లు ఉన్నాయి. స్థిరాస్తుల విలువ రూ.10.86 కోట్లు. కుటుంబానికి రూ.1.63 కోట్ల అప్పులున్నట్లు అఫిడవిట్‌లో వెల్లడించారు.

నిజామాబాద్‌ భాజపా అభ్యర్థి, ఎంపీ ధర్మపురి అర్వింద్‌కు రూ.109.90 కోట్ల విలువైన ఆస్తులున్నాయి. ఆయనపై మొత్తం 22 క్రిమినల్‌ కేసులు నమోదయ్యాయి. పలు కంపెనీల్లో అర్వింద్‌కు వాటాలున్నాయి. ఆయన సతీమణి వద్ద 85 తులాల బంగారు ఆభరణాలున్నాయి. మొత్తం చరాస్తుల విలువ రూ.60.08 కోట్లు. వ్యవసాయ, వ్యవసాయేతర భూముల్లేవు. హైదరాబాద్‌ జూబ్లీహిల్స్‌లోని వాణిజ్య, నివాస భవనాల విలువ రూ.49.81 కోట్లు కాగా.. మొత్తం అప్పులు రూ.30.66 కోట్లుగా వెల్లడించారు.