byసూర్య | Fri, Apr 19, 2024, 07:37 PM

తెలంగాణలో లోక్‌సభ ఎన్నికల పర్వం మొదలైంది. నోటిఫికేషన్ విడుదల కావటంతో.. నేటి నుంచే నామినేషన్లు కూడా ప్రారంభమయ్యాయి. తొలిరోజే.. పలువురు అభ్యర్థులు కూడా నామినేషన్లు దాఖలు చేశారు. అయితే.. ఇప్పటికే ప్రచారంలో భాగంగా తమ సెగ్మెంట్లలో బిజీ బిజీగా తిరుగుతున్న అభ్యర్థులు.. నామినేషన్ కోసం మళ్లీ రిటర్నింగ్ ఆఫీసర్ కార్యాలయానికి రావాల్సి ఉంటుంది. అయితే.. కేవలం నామినేషన్ కోసమే ఆర్వో కార్యాలయానికి రావాల్సిన అవసరం లేకుండా.. అభ్యర్థులు తమ నామినేషన్ పత్రాలను ఆన్లైన్లో కూడా అందించొచ్చని సీఈసీ వికాస్ రాజ్ వెల్లడించారు.

అయితే.. నామినేషన్ పత్రాల్లో తప్పనిసరిగా లెటెస్ట్ ఫోటోలు పెట్టాలని వికాస్ రాజ్ తెలిపారు. లేదంటే నామినేషన్ పత్రాలను రిజెక్ట్ చేస్తామని వికాస్ రాజ్ సూచించారు. హైదరాబాద్‌లో నిర్వహించిన మీడియా సమావేశంలో వికాస్ రాజ్ కీలక సూచనలు చేశారు. నామినేషన్ ఫామ్.. అఫిడవిట్‌లు జాగ్రత్తగా నింపాలని తెలిపారు. ఫాం-ఏ, ఫాం-బీపై ఒరిజినల్ సంతకాలు ఉండాలని వికాస్ రాజ్ తెలిపారు.

 ఇదిలా ఉంటే.. నామినేషన్ పేపర్లు దాఖలు చేసే సమయంలో ఒకసారి ఆర్వో కార్యాలయంలోకి ప్రవేశిస్తే.. బయటకు వెళ్లేందుకు వీలు లేదని వికాస్ రాజ్ తెలిపారు. నామినేషన్ పత్రాల దాఖలు కోసం హెల్ప్ డెస్క్ ఏర్పాటు చేయమని ఆర్వోలను ఆదేశించినట్టు చెప్పుకొచ్చారు. అభ్యర్థి కచ్చితంగా క్రిమినల్ హిస్టరీ పబ్లిష్ చెయ్యాల్సి ఉంటుందని తెలిపారు. నామినేషన్ వేసే ప్రతి అభ్యర్థి ముందు రోజు బ్యాంక్ అకౌంట్ ఓపెన్ చేసి ఎన్నికల ఖర్చు అకౌంట్‌లో చూపించాలని.. గతంసారి ఓపెన్ చేసిన బ్యాంక్ అకౌంట్ ఈసారి మళ్లీ ఉపయోగించవద్దని వికాస్ రాజ్ వివరించారు.

నామినేషన్ల దాఖలుకు ఏప్రిల్ 25 చివరి తేదీ కాగా.. ఏప్రిల్ 26న నామినేషన్ల పరిశీలన, 29 వరకు నామినేషన్ల ఉపసంహరణకు ఛాన్స్ ఇచ్చింది ఎన్నికల సంఘం. అయితే.. మే 13న ఎన్నికలు జరగనుండగా.. జూన్ 4న ఫలితాలు వెలువడనున్నాయి. ఇదిలా ఉంటే.. 19, 23,24వ తేదీల్లో మంచి ముహూర్తం ఉన్నట్టు పండితులు చెప్తుండటంతో.. ఆ రోజుల్లోనే ఎక్కువ నామినేషన్లు దాఖలయ్యే అవకాశం కనిపిస్తోంది.