byసూర్య | Wed, Dec 06, 2023, 06:55 PM

రేవంత్ రెడ్డి ప్రమాణ స్వీకారం నేపథ్యంలో సినీ నటుడు, నిర్మాత బండ్ల గణేష్.. ఎల్బీ స్టేడియానికి వచ్చారు. మైదానంలో ఏర్పాట్లు జరుగుతున్న తీరును వీక్షించారు. ఈ సందర్భంగా రేవంత్‌ రెడ్డి సీఎం అవుతారని నెల రోజుల కిందటే ఎలా చెప్పగలిగారని ఓ మీడియా ప్రతినిధి ప్రశ్నించగా.. తనదైన శైలిలో బదులిచ్చారు. ‘ఇందులో పెద్ద లాజిక్ ఏం లేదు. పోరాడేవారికే కత్తి ఇస్తారు. కత్తితో పోరాడి విజయం సాధించినవారికే కిరీటం ఇస్తారు’ అని బండ్ల గణేష్ బదులిచ్చారు. గ్రౌండ్ లెవల్లో పనిచేసిన ఎమ్మెల్యేలకు కూడా నమ్మకంలేని వేళ.. మీరు అంత కచ్చితంగా రేవంత్ రెడ్డి సీఎం అవుతారని ఎలా అంచనా వేయగలిగారని మీడియా ప్రతినిధి ప్రశ్నించగా.. బండ్ల గణేష్ బదులిస్తూ.. ‘రేవంత్‌ రెడ్డి పోరాటం, ఆయన పడిన కష్టం, ఆయన మాట్లాడిన తీరు, జనంలోకి చొచ్చుకెళ్లిన విధానం చూసే.. కాంగ్రెస్ అధికారంలోకి వస్తుందని, రేవంత్ రెడ్డి సీఎం అవుతారని చెప్పా’ అని అన్నారు.

కాంగ్రెస్‌ అధికారంలోకి వచ్చింది. ఇకపై మీరు యాక్టివ్‌గా మారే అవకాశం ఉందా? అని ప్రశ్నించగా.. తానెప్పుడూ కాంగ్రెస్‌ పార్టీకి విధేయుడిగానే ఉన్నానని, ఇప్పటివరకు ప్రతిపక్షంలో ఉన్నందువల్ల ఎంతవరకు ఉండాలో అంతవరకే ఉన్నానని బండ్ల గణేష్ చెప్పారు. ‘నేను జంప్ జిలానీని కాదు. 2004 నుంచి కాంగ్రెస్‌లోనే ఉన్నాను. వైఎస్ రాజశేఖర్ రెడ్డి హయాం నుంచి కాంగ్రెస్‌లోనే ఉన్నాను. నేను కాంగ్రెస్‌ వాదిని అనేది ప్రపంచానికి తెలిసిన నిజం. రెండు దశాబ్దాలుగా కాంగ్రెస్‌లోనే ఉన్నాను. పదేళ్లుగా ప్రతిపక్షంలో ఉండటం వల్ల.. నా పని నేను చేసుకుంటూ, ఎంత వరకు ఉండాలో, అంత వరకే ఉన్నాను. మా పార్టీ అధికారంలోకి రావడం సంతోషంగా ఉంది’ అని బండ్ల గణేష్ అన్నారు. కాంగ్రెస్‌ పాలన బ్రహ్మాండంగా ఉంటుందని, రేవంత్‌ నాయకత్వంలో పార్టీ బ్రహ్మాండంగా పనిచేస్తుందని.. అందులో సందేహమే అవసరం లేదని బండ్ల గణేష్ చెప్పారు. ఎన్నికల ముందు చెప్పినట్లు 6 గ్యారంటీలను అమలు చేస్తామని తెలిపారు.

సుమారు నెల కిందట ఓ న్యూస్ ఛానెల్ ప్రతినిధితో బండ్ల గణేష్ మాట్లాడుతూ.. డిసెంబర్ 9న ఎల్బీ స్టేడియంలో రేవంత్ రెడ్డి ప్రమాణ స్వీకారం చేస్తారని చెప్పారు. తాను రెండు రోజుల ముందే ఎల్బీ స్టేడియానికి వెళ్లి దుప్పటి వేసుకొని పడుకుంటానని ఆయన అన్నారు. అయితే, బండ్ల గణేష్ చెప్పినట్లు ఎల్బీ స్టేడియంలో రేవంత్ రెడ్డి ప్రమాణ స్వీకారం చేయబోతున్నారు. అయితే, డిసెంబర్ 9కి రెండు రోజుల ముందే ప్రమాణం చేయబోతున్నారు. ఈ నేపథ్యంలో రేవంత్ రెడ్డి ప్రమాణ స్వీకారోత్సవానికి ఒక రోజు ముందే బండ్ల గణేష్.. ఎల్బీ స్టేడియానికి రావడంతో మరొక్కసారి వార్తల్లో ప్రధానంగా నిలిచారు. మీడియా ప్రతినిధులు ఆయణ్ని చుట్టుముట్టారు. ‘ఈరోజు రాత్రి దుప్పటి కప్పుకొని ఇక్కడే పడుకోమన్నా పడుకుంటా.. లేకపోయినా రాత్రంతా ఇక్కడే ఉంటా..’ బండ్ల గణేష్ తనదైన శైలిలో వ్యాఖ్యలు చేశారు.