ఆర్థిక ఇబ్బందులు, అంతర్గత కలహాలు, ప్రజల ఆకాంక్షలు,,,,కొత్త సీఎం రేవంత్ రెడ్డికు పెద్ద టాస్కే

‘కేసీఆర్ కొత్త సెక్రటేరియట్‌‌ను కట్టి రేవంత్ రెడ్డికి గిఫ్ట్‌గా ఇచ్చిండు’.. కాంగ్రెస్ ఎన్నికల్లో గెలిచాక సోషల్ మీడియాలో వైరల్ అవుతోన్న పోస్టు ఇది. అయితే కేసీఆర్ కట్టిన కొత్త సెక్రటేరియట్‌లోని సీఎం బ్లాక్‌లో బుర్ర వేడెక్కించే సమస్యలెన్నో రేవంత్ రెడ్డి రాక కోసం ఎదురు చూస్తున్నాయి. కేసీఆర్‌ను ఓడించి, వెంటిలేటర్ మీదున్న కాంగ్రెస్ పార్టీని విజయ తీరాలకు చేర్చిన బాహుబలి అని రేవంత్ రెడ్డిని అభిమానులు ఆకాశానికెత్తుతున్నారు. అయితే ఇప్పటి వరకూ మంత్రిగా పని చేసిన అనుభవం కూడా రేవంత్‌.. ప్రభుత్వ భారాన్ని మొత్తం ఒంటి చేత్తో మోయడం అనేది అంత ఆషామాషీ వ్యవహరం కాబోదు.

తెలంగాణ సీఎంగా రేవంత్ రెడ్డి ముందు ఉందేమీ పూల బాట కాదు. ఎన్నో అవరోధాలు దాటుకొని, అవమానాలు దిగమింగుకొని.. అంచెలంచెలుగా ఎదుగుతూ ముఖ్యమంత్రి స్థాయికి చేరుకున్న రేవంత్ రెడ్డికి సమస్యల తోరణం స్వాగతం పలుకుతోంది. ఇంటా బయటా పలు సవాళ్లను ఆయన ఎదుర్కోవాల్సి ఉంది. ముఖ్యంగా ఆర్థిక సమస్యలను అధిగమించడం రేవంత్‌కు కత్తి మీద సాము కానుంది. కాంగ్రెస్ పార్టీ అధికారంలోకి రావడానికి ప్రధాన కారణం.. కేసీఆర్ ప్రభుత్వంపై ప్రజా వ్యతిరేకతతోపాటు హస్తం పార్టీ ఇచ్చిన ఆరు గ్యారంటీలు. కాంగ్రెస్ మేనిఫెస్టోలో పేర్కొన్న ఈ ఆరు గ్యారెంటీలను అమలు చేయడం ఆర్థికంగా ఎంతో కష్టంతో కూడుకున్న పని. రైతులు, మహిళలు, యువతను సంతృప్తి పరిచేలా మేనిఫెస్టో అంశాలను ప్రస్తావించారు.

మహాలక్ష్మీ పథకంలో భాగంగా ప్రతి మహిళకు నెలకు రూ.2500 చొప్పున ఇస్తామని హామీ ఇచ్చిన కాంగ్రెస్.. రైతు భరోసా కింద ఎకరానికి రూ.15 వేలు చొప్పున ఆర్థిక సాయం ఇస్తామని ప్రకటించింది. కౌలు రైతులకు, వ్యవసాయ కూలీలకు కూడా ఆర్థిక సాయాన్ని ప్రకటించింది. గృహజ్యోతి కింద గ్యాస్ సిలిండర్‌ను రూ.500కే ఇస్తామని హస్తం పార్టీ హామీ ఇచ్చింది. మహిళలకు ఆర్టీసీ బస్సుల్లో ఉచిత ప్రయాణ సదుపాయం కల్పిస్తామని తెలిపింది. ఇందిరమ్మ ఇండ్లు, చేయూత, యువ వికాసం లాంటి పథకాలు కూడా కీలకమైనవి.

ఆరు గ్యారెంటీలతో ఆర్థిక భారం..

అయితే ఈ ఆరు గ్యారెంటీల అమలుకు పెద్ద మొత్తంలో నిధులు అవసరం. హామీలను అమలు చేస్తూ.. రాష్ట్రం అప్పుల్లో కూరుకుపోకుండా చూడటం అనేది పెద్ద సవాలే. 2023-24 చివరి నాటికి తెలంగాణ అప్పులు జీఎస్‌డీపీలో 23.8 శాతంగా ఉండనున్నాయి. కాంగ్రెస్ ఆరు గ్యారెంటీల అమలుకు రూ.1.29 లక్షల కోట్లు అవసరం అనేది 2022-23 నాటి అంచనా.

తగ్గుతున్న ఆదాయం..

బీఆర్ఎస్ ప్రభుత్వం హామీల అమలుకు నగదు సర్దుబాటు చేయడానికి కిందా మీద పడింది. 2023-24లో తెలంగాణ ప్రభుత్వం రూ.38,234 కోట్లు అప్పులు తెచ్చుకునే వీలుండగా.. ఏప్రిల్ నుంచి అక్టోబర్ వరకే రూ.33,378 కోట్ల మేర అప్పులు తెచ్చారు. ఇదొక్కటే కాదు.. గత ఏడాదితో పోలిస్తే.. తెలంగాణ రెవెన్యూ తగ్గుతోంది. 2023-24 బడ్జెట్ ప్రకారం రూ.2.16 లక్షల కోట్ల మేర రెవిన్యూ వస్తుందని అంచనా వేశారు. కానీ ఇప్పటి దాకా వచ్చింది లక్ష కోట్ల లోపే (రూ.99,755 కోట్లు). కేంద్రం నుంచి వచ్చే పన్నుల వాటాలోనూ ఇప్పటికే రాష్ట్రానికి 50 శాతం (రూ.14,528 కోట్లు ) వచ్చేసింది.

ఇవన్నీ సమస్యలే..

ఇలాంటి పరిస్థితుల్లో ఆరు గ్యారెంటీలను అమలు చేయడం, ఇతర పథకాల అమలు, కాళేశ్వరం అప్పులకు వడ్డీలు, ఆ ప్రాజెక్ట్ నిర్వహణ, ఉద్యోగాల భర్తీ, ఆరోగ్యం, విద్యకు ప్రాధాన్యం ఇవ్వడం.. ఇవన్నీ కొత్త ప్రభుత్వాన్ని ఉక్కిరిబిక్కిరి చేయనున్నాయి. వీటితోపాటు విద్యుత్ కోతల్లేకుండా చూసుకోవడం, హైదరాబాద్‌లో శాంతి భద్రతల పరిరక్షణ, హైదరాబాద్‌లో ఐటీ పురోగతి మందగించడం కూడా చూడటం ఎంతో ముఖ్యం.

తొలి వంద రోజులు కీలకం..

ఈ హామీలన్నీ అమలు చేస్తూ.. అందర్నీ సమన్వయం చేసుకుంటూ.. జనరంజకంగా పరిపాలించగలిగితేనే మరో నాలుగైదు నెలల్లో రానున్న లోక్ సభ ఎన్నికల్లో కాంగ్రెస్ పార్టీ సత్తా చాటగలుగుతుంది. లేకపోతే బీజేపీ, బీఆర్ఎస్ పై చేయి సాధించే అవకాశం ఉంది. అంటే సీఎంగా తొలి వంద రోజులు రేవంత్ రెడ్డికి ఎంతో ముఖ్యం.

షిండేలుంటారు జాగ్రత్త..

అభివృద్ధి విషయంలో కేసీఆర్‌తో, సంక్షేమం విషయంలో జగన్‌తో రేవంత్ రెడ్డికి పోలిక అనివార్యం కానుంది. అభివృద్ధిని, సంక్షేమాన్ని బ్యాలెన్స్ చేస్తూ తెలంగాణ ప్రజల ఆకాంక్షలు నెరవేర్చేలా రేవంత్ పాలన సాగించాల్సి ఉంటుంది. అదే సమయంలో ప్రభుత్వ ఆదాయ వనరులను పెంచడంపైనా కసరత్తు చేయాలి. వీటిలో ఏ ఒక్కటి తగ్గినా.. తెలంగాణ ప్రజల్లో, నేతల్లో అసంతృప్తి పెరుగుతుంది. అలాంటప్పుడు ఓ షిండే పుట్టుకొచ్చే ప్రమాదమూ లేకపోలేదు.