byసూర్య | Sat, Dec 02, 2023, 07:57 PM

ఆగ్నేయ బంగాళాఖాతంలో ఏర్పడిన తీవ్ర అల్పపీడనం శుక్రవారం ఉదయం వాయుగుండంగా బలపడినట్లు ఐఎండీ అధికారులు వెల్లడించారు. పుదుచ్చేరికి 730 కి.మీ , చెన్నైకి 740 కి.మీ, నెల్లూరుకు 860 కి.మీ, బాపట్లకు 930 కి.మీ, మచిలీపట్నానికి 910 కి.మీ. దూరంలో వాయుగుండం కేంద్రీకృతమై ఉందన్నారు. ఇది పశ్చిమ-వాయవ్య దిశగా పయనించి ఇవాళ నైరుతి బంగాళాఖాతంలో తీవ్ర వాయుగుండంగా, ఆదివారానికి తుపానుగా బలపడుతుందని చెప్పారు. దీని ప్రభావంతో తెలుగు రాష్ట్రాల్లో వర్షాలు కురుస్తాయన్నారు.

తుపాను ప్రభావం తెలంగాణపై కూడా ఉంటుందని.. హైదరాబాద్ వాతావరణ కేంద్రం అధికారులు తెలిపారు. తుపాను ప్రభావంతో ఆది, సోమవారం తేదీల్లో తెలంగాణలోని పలు చోట్ల భారీ వర్షాలు కురిసే ఛాన్స్ ఉందని హెచ్చరించారు. డిసెంబర్ 3 నుంచి 5 తేదీల్లో పలుచోట్ల ఉరుములు, మెరుపులతో కూడిన వర్షాలు కురుస్తాయన్నారు. ఆ తర్వాత తేలికపాటి వర్షాలు కురిసే ఛాన్స్ ఉన్నట్లు వెల్లడించారు.

ఇక ఏపీలో తుపాను ప్రభావం ఎక్కువగా ఉంటుందన్నారు. ఆది, సోమవారాల్లో రాష్ట్రంలోని కొన్ని ప్రాంతాల్లో భారీ నుంచి అతిభారీ వర్షాలు, అనేక ప్రాంతాల్లో తేలికపాటి నుంచి ఓ మోస్తరు వర్షాలు కురుస్తాయన్నారు. సోమవారం తూర్పుగోదావరి, కాకినాడ, అల్లూరి సీతారామరాజు, పశ్చిమగోదావరి, డా.బీఆర్‌ అంబేడ్కర్‌ కోనసీమ, అనకాపల్లి, నెల్లూరు, ప్రకాశం, బాపట్ల, కృష్ణా, తిరుపతి జిల్లాల్లో భారీ నుంచి అత్యంత భారీ వర్షాలకు అవకాశముందన్నారు.