byసూర్య | Wed, Apr 24, 2024, 07:23 PM

లోక్‌సభ ఎన్నికల ప్రచారం ప్రారంభించిన తొలిరోజే మాజీ ముఖ్యమంత్రి, బీఆర్ఎస్ అధినేత కే చంద్రశేఖర్ రావు కాన్వాయ్‌లో ప్రమాదం చోటు చేసుకుంది. కేసీఆర్ బస్సు యాత్ర సందర్భంగా.. ఆయన కాన్వాయ్‌లో ప్రమాదం జరిగింది. కేసీఆర్ కాన్వాయ్‌లోని కార్లు ఢీకొన్నాయి. ఈ ఘటనలో కేసీఆర్ కాన్వాయ్‌లోని పలు కార్లు పాక్షికంగా దెబ్బతిన్నాయి. హైదరాబాద్‌లోని తెలంగాణ భవన్ నుంచి ఇవాళ ప్రారంభమైన కేసీఆర్ బస్సు యాత్ర.. మిర్యాలగూడకు వెళ్తుండగా ఈ ప్రమాదం జరిగింది.

హైదరాబాద్ నుంచి మిర్యాలగూడకు భారీ కాన్వాయ్‌తో కేసీఆర్ ప్రారంభం అయ్యారు. ఈ క్రమంలోనే కేసీఆర్ బస్సులో ప్రయాణించగా.. ఇతర బీఆర్ఎస్ నేతలు, కార్యకర్తలు, కేసీఆర్ సెక్యూరిటీకి సంబంధించిన కార్లు ఆ కాన్వాయ్‌లో ప్రయాణిస్తున్నాయి. అయితే ముందు వెళ్తున్న ఓ వాహనం సడన్ బ్రేక్ వేయడంతో దాని వెనకాల ఉన్న అన్ని వాహనాలు సడెన్ బ్రేక్ వేశాయి. ఈ క్రమంలోనే కొన్ని వాహనాలు ఒకదాన్ని మరొకటి ఢీకొన్నాయి. నల్గొండ జిల్లా వేములపల్లి మండలం కేంద్రం సమీపంలో ఈ ప్రమాదం జరిగింది. ఈ ఘటనలో దాదాపు 10 వాహనాలు దెబ్బతిన్నాయి. ఈ ప్రమాదం తర్వాత అక్కడి నుంచి మిర్యాలగూడకు చేరుకున్న కేసీఆర్.. ఎన్నికల రోడ్‌ షోలో పాల్గొని ప్రసంగించారు.

తెలంగాణ భ‌వ‌న్‌లోని తెలంగాణ తల్లి విగ్రహానికి పూలమాల వేసిన కేసీఆర్.. బస్సు యాత్రను మొదలుపెట్టారు. నేటి నుంచి 17 రోజులపాటు కేసీఆర్ బస్సు యాత్ర రాష్ట్రంలో జరగనుంది. మే 10 వ తేదీ వరకు కేసీఆర్ బస్సు యాత్ర దాదాపు 12 లోక్‌సభ నియోజకవర్గాల పరిధిలో సాగనుంది. మిర్యాలగూడలో ప్రారంభం కానున్న కేసీఆర్ బస్సు యాత్ర.. చివరికి మే 10 వ తేదీన సిద్ధిపేట బహిరంగ సభతో ముగింపు పలకనున్నారు.

కేసీఆర్ చేపట్టిన ఈ బస్సు యాత్ర సందర్భంగా రాష్ట్రంలోని వివిధ వర్గాల ప్రజల సమస్యలను ఆయన తెలుసుకోనున్నారు. ఇవాళ మిర్యాలగూడ, సూర్యాపేటలో రోడ్ షో నిర్వహించనున్న గులాబీ దళపతి.. రాత్రికి సూర్యాపేటలోనే బస చేయనున్నారు. గురువారం సాయంత్రం భువనగిరిలో రోడ్ షో నిర్వహించి రాత్రికి ఎర్రవెల్లి ఫామ్‌హౌస్‌కు వెళ్లనున్నారు.