byసూర్య | Tue, Oct 15, 2024, 10:07 PM

ఇద్దరు పిల్లలున్న తల్లిపై మోజు పడ్డాడు.. ఆమెను సొంతం చేసుకునేందుకు క్రూర మృగంలా మారాడు. తన పిల్లల్ని, భర్తను అడ్డుతొలిగించుకుంటేనే.. ఆమె తన సొంతమవుతుందని భావించాడు. ఈ క్రమంలోనే.. వివాహిత కూతురిని అత్యంత క్రూరంగా మట్టుబెట్టాడు. మరో కూతురిని చంపేందుకు ప్లాన్ చేస్తున్న సమయంలోనే.. పోలీసులకు అడ్డంగా దొరికిపోయారు. హైదరాబాద్ సూరారం బాలిక మిస్సింగ్ కేసును ఛేదించిన పోలీసులు.. విస్తుపోయే విషయాలను బయపెట్టారు. బాలిక హత్య కేసులో అనుమానితుడిగా తిరుపతి అనే వ్యక్తిని అదుపులోకి తీసుకుని విచారించగా.. అసలు విషయాలు వెలుగులోకి వచ్చాయి.

బాలిక తల్లిపై మనసుపడ్డ నిందితుడు తిరుపతి.. ఇద్దరు పిల్లలు, ఆమె భర్తను చంపేందుకు ప్లాన్‌ చేసినట్లు నిందితుడు ఒప్పుకున్నాడు. అందులో భాగంగానే.. పిల్లల్ని చంపేసి ముళ్ల పొదల్లో పడేయాలని నిర్ణయించుకుని.. ఒక బాలికను దారుణంగా హత్య చేసిన నిందితుడు.. మరో చిన్నారి హత్యకు సిద్ధమైనట్లు పోలీసుల విచారణలో వెల్లడించాడు. ఇక.. పాపను హత్య చేసి మేడ్చల్‌ అటవీ ప్రాంతంలో వేసినట్లు చెప్పడంతో ఆయా ప్రాంతాల్లో పోలీసులు గాలించారు. కాగా.. గుండ్ల పోచంపల్లి మున్సిపాలిటీ పరిధిలోని బాసరగడి గ్రామ శివారులో మూటకట్టి పడేసిన ఓ గోనె సంచిని పోలీసులు స్వాధీనం చేసుకున్నారు. ఆ సంచిలో బాలిక మృతదేహం ఉన్నట్టు గుర్తించిన పోలీసులు.. పోస్టుమార్టం నిమిత్తం డెడ్ బాడీని ఆస్పత్రికి తరలించారు.

అయితే.. ఆదిలాబాద్ జిల్లాకు చెందిన ప్రభాకర్.. తన భార్యా పిల్లలతో కలిసి హైదరాబాద్‌లోని సూరారంలో నివాసం ఉంటున్నాడు. ఈ నెల 12న కుమార్తె ఏం.జోష్న (7) కనిపించడం లేదని సూరారం పోలీసులకు ఫిర్యాదు చేశారు. మిస్సింగ్ కేసు నమోదు చేసిన పోలీసులు.. పాప కోసం దర్యాప్తు మొదలుపెట్టారు. ఈ క్రమంలోనే.. అనుమానం వచ్చిన తిరుపతిని అదుపులోకి తీసుకుని తమదైన శైలిలో ప్రశ్నించటంతో.. అసలు నిజాన్ని కక్కేశాడు.

అయితే.. ఈ ఘటనతో చిన్నారి కుటుంబంలో తీవ్ర విషాదం నెలకొంది. అల్లారుముద్దుగా చూసుకుంటున్న కూతురు అత్యంతం క్రూరంగా హతమైందని తెలిసి.. ఆ తల్లిదండ్రులు గుండెలు బాదుకుంటున్నారు. ఈ ఘటనపై కేసు నమోదు చేసుకుని.. పోలీసులు అన్ని కోణాల్లో దర్యాప్తు చేస్తున్నారు.