byసూర్య | Sat, Sep 28, 2024, 07:06 PM

హైదరాబాద్ నగరవాసులకు పోలీసులు ట్రాఫిక్ అలెర్ట్ జారీ చేశారు. నగరంలోని పలు ప్రాంతాల్లో నేడు ట్రాఫిక్ ఆంక్షలు అమల్లో ఉంటాయని చెప్పారు. రాష్ట్రపతి ద్రౌపది ముర్ము నేడు నగరంలో పర్యటిస్తున్న నేపథ్యంలో ఆంక్షలు విధించారు. మేడ్చల్‌ జిల్లా శామీర్‌పేట పరిధిలో గల నల్సార్ లా యూనివర్సిటీ 21వ స్నాతకోత్సవ కార్యక్రమాని రాష్ట్రపతి ముఖ్య అతిథిగా హాజరుకానున్నారు. డిగ్రీలు పూర్తిచేసిన లా స్టూడెంట్స్‌కు పట్టాలు అందించనున్నారు. ఈ నేపథ్యంలో నేడు హైదరాబాద్ నగరంలోని పలు ప్రాంతాల్లో ట్రాఫిక్ ఆంక్షలు అమలు చేస్తున్ననట్లు పోలీసులు తెలిపారు.

నేడు ఉదయం 9 గంటల నుంచే ఆంక్షలు అమల్లో ఉంటాయని చెప్పారు. బేగంపేట, హెచ్పీఎస్, పీఎన్టీ జంక్షన్, రసూల్‌పురా, సీటీఓ ప్లాజా, టివోలీ, కార్ఖానా, తిరుమలగిరి, లోతుకుంట, బొల్లారం రాష్ట్రపతి నిలయం తదితర ప్రాంతాల్లో ఈ ట్రాఫిక్ ఆంక్షలు అమల్లో ఉంటాయని ట్రాఫిక్ అడిషనల్ కమిషనర్ విశ్వప్రసాద్ వెల్లడించారు. నేడు ఉదయం 9 నుంచి సాయంత్రం 7 గంటల వరకు ఈ ఆంక్షలు అమలులో ఉంటాయని చెప్పారు. ఈ మేరకు వాహనదారులకు అలర్ట్ జారీ చేశారు. ఇబ్బందులు పడకుండా ప్రత్యామ్నాయ మార్గాలను ఎంచుకోవాలని సూచించారు.

రాష్ట్రపతి పర్యటన నేపథ్యంలో శుక్రవారం (సెప్టెంబర్ 27) బొల్లారంలోని రాష్ట్రపతి నిలయంలో పోలీస్, రెవెన్యూ, వైద్య ఆరోగ్యశాఖ, ఆర్ అండ్ బీ, ఫైర్, ఫారెస్ట్, విద్యుత్ శాఖ అధికారులతో కలెక్టర్ అనుదీప్ దురిశెట్టి సమీక్షా సమావేశం నిర్వహించారు. రహదారులపై ట్రాఫిక్ సమస్యలు తలెత్తకుండా భద్రతా ఏర్పాట్లు, బందోబస్తును పర్యవేక్షించాలని పోలీసులను ఆదేశించారు. రాష్ట్రపతి నిలయంలో ఏర్పాటు చేసిన 8 రాష్ట్రాలకు సంబంధించిన స్టాళ్లను, 4 ఫుడ్ కోర్టులను, ఇతర స్టాల్స్‌ను, మీడియా సెంటర్‌ను కలెక్టర్ పరిశీలించి అధికారులకు కీలక సూచనలు చేసారు. ఇక రాష్ట్రపతి పర్యటన సందర్భంగా మినిస్టర్ ఇన్ వెయిటింగ్‌గా పంచాయతీ రాజ్ శాఖ మంత్రి సీతక్కను ప్రభుత్వం నియమించింది. ద్రౌపతి ముర్ముకు స్వాగతం పలకడం నుంచి ఆమె తిరిగి నగరాన్ని విడిచి వెళ్లే వరకు సీతక్క రాష్ట్రపతి వెంటే ఉండనున్నారు.