byసూర్య | Sat, Sep 28, 2024, 10:27 PM
టీజీఎస్ ఆర్టీసీ బస్సులో మరో మహాలక్ష్మి పురుడు పోసుకుంది. ఇప్పటికే పలు సందర్భాల్లో బస్సుల్లో వెళ్తున్న గర్భిణీలకు పురిటినొప్పులు రాగా.. మానవత్వంతో స్పందించిన ఆర్టీసీ సిబ్బంది వాళ్లకు ప్రసవం చేశారు. అయితే.. ఇప్పటిదాకా బస్సుల్లో జరిగిన ప్రసవాల్లో చాలా వరకు పండంటి ఆడబిడ్డలే పురుడు పోసుకోగా.. ఇప్పుడు మరో మహాలక్ష్మి జన్మించింది. ఈ ఘటన శనివారం (సెప్టెంబర్ 28న) రోజున సూర్యాపేట జిల్లాకు చెందిన కోదాడ డిపోకు చెందిన బస్సులో జరిగింది.
కోదాడ డిపోకు చెందిన ఆర్టీసీ అద్దె బస్సు శనివారం రోజు సూర్యాపేట నుంచి కోదాడకు బయలుదేరింది. అందులో గుడిబండ గ్రామానికి చెందిన అలివేలు అనే గర్భిణి ప్రయాణిస్తోంది. బస్సు.. మునగాల మండలం తాడ్వాయి వద్దకు రాగానే ఒక్కసారిగా అలివేలుకు పురిటినొప్పులు ప్రారంభమయ్యాయి. ఆమెను గమనించిన కండక్టర్ వి. నరేశ్ బాబు అప్రమత్తమై.. డ్రైవర్ నరేశ్కు చెప్పి బస్సును వెంటనే ఆపించాడు. వెంటనే అంబులెన్స్ కోసం 108కు కాల్ చేశారు.
అయితే.. అంబులెన్స్ కోసం ఎదురుచూస్తున్న సమయంలోనే.. నొప్పులు ఎక్కువ కావడంతో బస్సులోని తోటి మహిళా ప్రయాణికులు మానవత్వంతో మందుకొచ్చారు. అలివేలుకు బస్సులోనే పురుడుపోశారు. అలివేడు పండంటి ఆడ శిశువుకు జన్మించింది. ఆ సమయానికి అంబులెన్స్ కూడా రావటంతో.. తల్లీబిడ్డలను అంబులెన్స్ సాయంతో సూర్యాపేట ఏరియా ఆసుపత్రికి తరలించారు. పరీక్షించిన వైద్యులు తల్లీబిడ్డా ఇద్దరు క్షేమంగా ఉన్నట్లు వెల్లడించారు.
బస్సులో పురిటినొప్పులతో బాధపడుతున్న గర్బిణికి కాన్పు చేసిన మహిళా ప్రయాణికులకు, సమయస్పూర్తితో వ్యవహారించిన ఆర్టీసీ సిబ్బందికి టీజీఎస్ ఆర్టీసీ ఎండీ వీసీ సజ్జనర్ అభినందనలు తెలియజేశారు. బస్సులో పురిటి నొప్పులతో బాధపడుతున్న మహిళకు సకాలంలో కాన్పు చేయించి ఆర్టీసీ సిబ్బంది తమ ఉదారతను చాటుకున్నారని కొనియాడారు. వారు అప్రమత్తమై సకాలంలో స్పందించడం వల్లే తల్లిబిడ్డా క్షేమంగా ఉన్నారని సజ్జనార్ తెలిపారు.
ఇక.. ఇలాంటి సంఘటనలే.. గతంలోనూ జరిగాయి. ఇటీవలే.. రాఖీ పండుగ రోజున గద్వాల డిపోకు చెందిన గద్వాల-వనపర్తి రూట్ పల్లె వెలుగు బస్సులోఓ గర్భిణి పండంటి బిడ్డకు జన్మనిచ్చింది. పురిటి నొప్పులతో బాధపడుతున్న గర్భిణీకి మహిళా కండక్టరే ప్రసవం చేసింది. తాను విధులు నిర్వర్తిస్తోన్న బస్సులో గర్భిణికి పురిటి నొప్పులు రాగా.. వెంటనే స్పందించి బస్సులో ప్రయాణిస్తోన్న మరో నర్సుతో కలిసి ప్రసవం చేశారు. అనంతరం తల్లీబిడ్డను స్థానిక ఆస్పత్రికి తరలించారు.