byసూర్య | Fri, Jul 26, 2024, 08:25 PM

హైదరాబాద్ శివారు ఔటర్ రింగ్ రోడ్డుపై ఎక్కడ్నుంచి వచ్చిందో తెలియదు కానీ.. ఓ వాహనం టైరు ఆరేళ్ల బాలుడి ప్రాణాన్ని బలితీసుకుంది. రోడ్డు పక్కనే ఆగి మూత్ర విసర్జన చేస్తుండగా.. వేగంగా దూసుకొచ్చిన టైరు బాలుడికి బలంగా తగిలింది. ఈ ఘటనలో తీవ్రంగా గాయపడిన చిన్నారి ఆసుపత్రిలో చికిత్స పొందుతూ ప్రాణాలు కోల్పోయాడు. పోలీసులు తెలిపిన వివరాల ప్రకారం.. పటాన్‌చెర్ నియోజకవర్గం అమీన్‌పూర్‌ మండలం పటేల్‌గూడ గ్రామానికి చెందిన సందీప్‌ రెడ్డి ఓ ప్రైవేటు ఉద్యోగం చేస్తున్నాడు. అయితే ఆదివారం రాత్రి ముత్తంగి దాబాలో భోజనం చేసేందుకుగాను కారులో కుటుంబసభ్యులతో కలిసి ఆయన బయల్దేరారు. సుల్తాన్‌పూర్‌ వద్ద వీరు ప్రయాణిస్తున్న కారు ఔటర్ రింగ్ రోడ్డుపైకి చేరుకుంది. కొద్ది దూరం వెళ్లగానే.. సందీప్ రెడ్డి కుమారుడు మోక్షిత్‌ రెడ్డి (6) మూత్రం వస్తోందని చెప్పాడు. దీంతో తండ్రి సందీప్ రెడ్డి లెఫ్ట్ ఇండికేటర్ వేసి కారు రోడ్డు పక్కకు ఆపాడు. అనంతరం కారులో నుంచి దిగిన బాలుడు రోడ్డు పక్కన మూత్ర విసర్జన చేస్తున్నాడు. ఇంతలో ఎక్కడ్నుంచి వచ్చిందో తెలియదు కానీ.. ఓ లారీ టారీ వేగంగా దూసుకొచ్చి బాలుడిని బలంగా తాకింది.

ఈ ప్రమాదంలో బాలుడు తీవ్రంగా గాయపడ్డాడు. తల్లిదండ్రులు వెంటనే బాలుడిని ముత్తంగిలో ఓ ప్రైవేటు ఆసుపత్రికి తరలించారు. పరిస్థితి మెరుగుపడకపోటవంతో వెంటనే హైదరాబాద్‌లోని మరో కార్పొరేట్ ఆసుపత్రికి తీసుకెళ్లారు. అక్కడ చికిత్స పొందుతూ గురువారం (జులై 25) సాయంత్రం బాలుడు కన్నుమూశాడు. దీంతో చిన్నరి కుటుంబంలో విషాదం అలముకుంది. ప్రమాదంపై కేసు నమోదు చేసుకున్న పోలీసులు విచారణ చేపట్టారు. ఓఆర్‌ఆర్‌పై ప్రయాణించిన వెహికల్ వెనుక చక్రం రన్నింగ్‌లోనే ఊడి ప్రమాదానికి కారణమై ఉండొచ్చునని అనుమానం వ్యక్తం చేస్తున్నారు.

శామీర్ పేట్‌లో ఘోర రోడ్డు ప్రమాదం.. హైదరాబాద్ శామీర్ పేట్‌లో ఓ ఇన్నోవా కారు బీభత్సం సృష్టించింది. అతివేగంతో వచ్చిన కారు అదుపుతప్పి ఎదురుగా వస్తున్న బస్సును ఢీకొట్టింది. అనంతరం రోడ్డు పక్కనే బోల్తా పడింది. ఈ ప్రమాదంలో కారులో ప్రయాణిస్తున్న ముగ్గురు వ్యక్తులు ప్రాణాలు కోల్పోయారు. మరో ఇద్దరికి తీవ్ర గాయాలయ్యాయి. గాయపడిన వారిని స్థానికులు హాస్పిటల్‌కు తరలించారు. కారు అతివేగంగా ప్రయాణించటే ఈ ప్రమాదానికి కారణమని స్థానికులు పేర్కొంటున్నారు. కాగా, మృతుల వివరాలు తెలియాల్సి ఉంది.