byసూర్య | Fri, Jul 12, 2024, 07:41 PM

హైదరాబాద్‌ అంటే వెంటనే చార్మినార్, గోల్కొండ లాంటి చారిత్రాత్మక కట్టడాలు మదిలో మెదులుతాయి. అయితే.. తెలంగాణ ప్రత్యేక రాష్ట్రంగా ఏర్పడిన తర్వాత అధికారంలోకి వచ్చిన బీఆర్ఎస్.. పలు ఐకానిక్ కట్టడాలు నిర్మించింది. కొత్త సెక్రటేరియట్ భవనం, అమరవీరుల స్థూపం, దుర్గం చెరువుపైన కేబుల్ బ్రిడ్జ్, పోలీసుల కమాండ్ కంట్రోల్ టవర్, టీ-హబ్ ఇలా పలు ల్యాండ్ మార్క్ కట్టడాలను నిర్మించి.. హైదరాబాద్‌‌కు కొత్తందాలు అద్దిన విషయం తెలిసిందే. కాగా.. ఇప్పుడు అధికారంలోకి వచ్చిన రేవంత్ రెడ్డి సర్కారు కూడా.. తమ మార్క్ చూపించేలా మరో ఐకానిక్ కట్టడాన్ని నిర్మించాలని యోచిస్తోంది. అయితే.. ఈసారి ఇలా అలా కాదు.. ఏకంగా అగ్రరాజ్యం అమెరికాలోని న్యూయార్క్‌లో ఉన్న టైమ్స్ స్క్వేర్ తరహాలోనే.. హైదరాబాద్‌లోనూ "టీ-స్క్వేర్" నిర్మించాలని నిర్ణయించింది.

న్యూయార్క్‌లోని టైమ్స్‌ స్క్వేర్‌‌‌ను తలపించేలా.. "టీ- స్క్వేర్" నిర్మించి హైదరాబాద్‌ సిగలో మరో ఐకానిక్ ల్యాండ్ మార్క్‌ను చేర్చాలని రేవంత్ రెడ్డి సర్కార్ ఏర్పాటు చేస్తోంది. టీ-స్క్వేర్ నిర్మించేందుకు ప్రభుత్వం టెండర్లను కూడా ఆహ్వానిస్తోంది. ఆకాశాన్నంటే బిల్డింగులు, అంతర్జాతీయ సాఫ్ట్‌వేర్ కంపెనీలకు ల్యాండ్ మార్క్‌గా ఉన్న రాయదుర్గం, బయోడైవర్సిటీ ప్రాంతాల్లో నెలకొల్పనున్న 'టీ-స్క్వేర్' అనే ప్రతిష్టాత్మక ప్రాజెక్ట్ కోసం తెలంగాణ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్ టెండర్లు ఆహ్వానిస్తూ ప్రకటన విడుదల చేసింది.

 శరవేగంగా అభివృద్ధి చెందుతున్న రాయదుర్గం ప్రాంతంలో.. ఈ టీ-స్క్వేర్ నిర్మించటం వల్ల ఆ ప్రాతానికి మరింత ఆకర్షణను తీసుకురావాలని సర్కార్ యోచిస్తోంది. ఇప్పటికే.. TGSRTC, హైదరాబాద్ మెట్రో రైల్ ద్వారా ప్రజా రవాణా అందిస్తున్నప్పటికీ.. ప్రజాధరణ ఇంకా పొందాల్సిన అవసరం ఉంది. రాయదుర్గంలో వినోద కేంద్రాలు, కొలాబరేషన్ జోన్స్, వాణిజ్య కూడళ్లతో కూడిన ప్రధాన పర్యాటక గమ్యస్థానంగా మారాల్సి ఉందని.. ప్రభుత్వం యోచిస్తోంది.

న్యూయార్క్‌లో ఉన్న టైమ్స్ స్క్వేర్.. వాణిజ్య కూడలిగానే కాకుండా.. పర్యాటక ప్రదేశంగా, వినోద కేంద్రంగా ఉంది. వ్యాపార ప్రకటనలు చేయడానికి డిజిటల్ బిల్‌బోర్డ్‌ల ద్వారా ఈ ప్రాంతం వెలిగిపోతుంది. ఈ క్రమంలోనే.. రాయదుర్గంలోనూ టీ- స్క్వేర్ ద్వారా అలాంటి వాతావరణాన్ని అభివృద్ధి చేయాలని ప్రభుత్వం ప్రణాళికలు రచిస్తోంది. ఈ క్రమంలోనే.. ప్రాజెక్ట్ కోసం పేరున్న ప్రైవేట్ డెవలపర్‌లను గుర్తించి, ఎంపిక చేసేందుకు బిడ్ ప్రక్రియను నిర్వహించనున్నారు. ఈ మేరకు టెండర్లను ఆహ్వానించారు.

టీ-స్క్వేర్ ప్రకటన హైదరాబాద్ వాసుల్లో ప్రత్యేక ఉత్సాహం నింపుతోంది. ఈ ప్రాజెక్ట్ హైదరాబాద్ ఖ్యాతిని మరింతగా మెరుగుపరచడమే కాకుండా ప్రధాన పర్యాటక, వాణిజ్య కేంద్రంగా కూడా మారనుందని నగరవాసులు భావిస్తున్నారు. విశ్వనగరంగా అభివృద్ధి చెందుతున్న హైదరాబాద్‌లో ఇలాంటి ఐకానిక్ టవర్లు రావాల్సిన అవసరం కూడా ఉందని అభిప్రాయపడుతున్నారు.