byసూర్య | Fri, Jul 12, 2024, 08:02 PM

ప్రస్తుతం.. ప్రతి ఇంట్లో ద్విచక్రవాహనం ఉండటం తప్పనిసరి అయ్యింది. కొన్ని ఇళ్లలో ఒకటికి మించి ఉంటున్నాయి. ఇక ఆర్థిక పరిస్థితి కొంచెం స్థిరంగా ఉన్న వాళ్లు.. కారును కూడా కలిగి ఉంటున్నారు. రోజు రోజుకు వాహనాల కొనుగోళ్లు విపరీతంగా పెరిగిపోతున్నాయి. అందుకు నిదర్శనమే.. రోడ్లపై పెరిగిపోతున్న ట్రాఫిక్ జామ్. వాహనాలు కుప్పలుతెప్పలుగా రోడ్డుపై కనిపిస్తున్నాయి. యువకులు, మహిళలు, ఉద్యోగులు, వ్యాపారులు ఇలా చాలా మంది.. సొంత వాహనాల్లోనే ప్రయాణాలు సాగిస్తున్నారు. కానీ కొంతమంది.. డ్రైవింగ్‌పై పూర్తి అవగాహన లేకుండానే రోడ్డెక్కేస్తూ.. ప్రమాదాలకు కారణమవుతున్నారు. మరి వాళ్లకు డ్రైవింగ్ లైసెన్స్ ఉండదా.. అంటే ఉంటుంది.. కానీ అది అడ్డదారిలో తీసుకున్నదై ఉంటుంది.

ఇలా డ్రైవింగ్ మీద.. ట్రాఫిక్ నిబంధనల మీద పూర్తి అవగాహన లేకుండా వాహనాలతో రోడ్డెక్కటం వల్లే.. ప్రమాదాలు జరుగుతున్నాయని.. అందుకు అడ్డదారుల్లో డ్రైవింగ్ లైసెన్సులు పొందటమే కారణమని గ్రహించిన అధికారులు.. కీలక నిర్ణయం తీసుకున్నారు. డ్రైవింగ్ లైసెన్స్ కోసం కొత్త పరీక్షను ప్రవేశపెట్టారు. ఇప్పటివరకు ఉన్న మ్యానువల్ పరీక్షను తీసేస్తూ.. నిర్ణయం తీసుకున్నారు.

తాజాగా.. గ్రేటర్ హైదరాబాద్ పరిధిలోని డ్రైవింగ్ లైసెన్స్ జారీ ప్రక్రియను ఆధునీకరించాలని ఆర్టీఏ అధికారులు నిర్ణయించారు. అందుకోసం ప్రస్తుతం కొనసాగుతున్న మ్యానువల్ విధానం కంటే.. మరింత ప్రామాణికంగా డ్రైవింగ్ పరీక్షలను నిర్వహించాలని నిర్ణయించారు. ఇందుకోసం.. ఆటోమేటిక్ డ్రైవింగ్ టెస్ట్ నిర్వహించేందుకు అధికారులు సన్నాహాలు చేస్తున్నారు. దీంతో.. అడ్డదారిలో డ్రైవింగ్ లైసెన్స్ పొందటం కష్టమే. అయితే.. అందుబాటులోకి తీసుకురానున్న కొత్త పద్ధతిలో.. రహదారులపై నిత్యం ఎదురవుతున్న ఇబ్బందులను టెస్ట్ ట్రాక్పై కృత్రిమంగా కల్పిస్తారు. లైసెన్స్ కోసం దరఖాస్తు చేసుకున్న వాళ్లు తప్పని సరిగా పరీక్ష రాయాల్సిందే. ట్రాక్ మీద వాహనం నడిపిన తర్వాతే లైసెన్స్ పొందుతారు. అయితే.. ట్రాక్ మీద వాహనం నడిపేటప్పుడు.. కంప్యూటర్‌లో రికార్డవుతుంది. ఏదైనా చిన్న తప్పు చేసినా.. పరీక్ష ఫెయిల్ అయినట్టే.

లైసెన్స్ కోసం ఆర్టీఏ కొత్త పద్ధతులివే..

కొత్తగా ఆర్టీఏ అమలు చేయబోయే ఆటోమేటిక్ డ్రైవింగ్ టెస్ట్లో 5 ట్రాక్లు ఏర్పాటు చేస్తారు.

ముందుగా H ట్రాక్‌లో ఆర్టీఏ ప్రమాణాల్లో పేర్కొన్న విధంగా వాహనాన్ని రివర్స్ చేయాల్సి ఉంటుంది.

ఆ తర్వాత S అనే ట్రాక్‌లో ఒక మూల నుంచి మరో మూలకు వెహికల్ను టర్న్ చేయాలి.

అలాగే K అనే ట్రాక్‌లో బాగా మలుపులు, ఎత్తుపల్లాలు, ఎత్తయిన ప్రదేశాలు, చిన్న లోయలు వంటి ప్రాంతాల్లో ఏర్పాటు చేస్తారు. ఆ ట్రాక్‌లో వాహనాన్ని నడిపి.. చివరగా బండిని పార్కింగ్ చేసి చూపించాల్సి ఉంటుంది.

అయితే ట్రాఫిక్ నిబంధనల ప్రకారం టూ వీలర్స్ హెల్మెట్, ఫోర్వీలర్స్ సీటు బెల్ట్ పెట్టుకోవాలి. ఇక ఈ ప్రక్రియ అంతా కంప్యూటర్లో రికార్డవుతుంది. వాహనాన్ని నడిపేటప్పుడు ఎలాంటి పొరపాట్లు చేసినా కంప్యూటర్లో రికార్డవుతుంది. ఏ చిన్న మిస్టేక్ చేసినా టెస్ట్‌లో ఫెయిల్ అయినట్టు చూపిస్తుంది.

ఒకవేళ పరీక్షలో ఫెయిల్ అయితే మరో నెల పాటు శిక్షణ తీసుకుని మళ్లీ రమ్మంటారు.

పూర్తిగా కంప్యూటరీకరణ కావటం వల్ల ఇక్కడ అధికారులను, సిబ్బందిని మేనేజ్ చేసేందుకు ఏమాత్రం అవకాశం ఉండదని అధికారులు చెప్తున్నారు. బ్రోకర్లకు కూడా ఎలాంటి అవకాశం ఉండదని చెప్తున్నారు. దీంతో.. అడ్డదారుల్లో లైసెన్స్ పొందటం కష్టమే..!