byసూర్య | Wed, Jul 10, 2024, 08:10 PM

గులాబీ బాస్, మాజీ సీఎం కేసీఆర్‌పై తెలంగాణ రెవెన్యూ శాఖ మంత్రి పొంగులేటి శ్రీనివాస్ రెడ్డి ఇంట్రెస్టింగ్ కామెంట్స్ చేశారు. బుధవారం మీడియాతో చిట్‌చాట్‌గా మాట్లాడిన ఆయన.. కేసీఆర్ అంట్ తనకు ప్రేమే అని వెల్లడించారు. ఆయన తెలంగాణ అభివృద్ధికి తన విలువైన సలహాలు, సూచనలు ఇవ్వాలని కోరుకుంటున్నట్లు చెప్పుకొచ్చారు. కాంగ్రెస్ ప్రభుత్వానికి ప్రతిపక్ష హోదాలో సహాయ సహకారాలు అందించాలని సూచించారు. ఇక రైతు రుమమాఫీపై కీలక కామెంట్స్ చేశారు పొంగులేటి. ఆగస్టు 15 నాటికి రూ.2 లక్షల రుణమాఫీ చేసి తీరుతామన్నారు. రానున్న రెండ్రోజుల్లో అందుకు సంబంధించిన మార్గదర్శకాలు విడుదల చేస్తామని చెప్పారు. రుణమాఫీపై రైతులు ఆందోళన చెందాల్సిన పనిలేదని అర్హులైన ప్రతి ఒక్కరికి రుణమాఫీ వర్తిస్తుందన్నారు. రైతు భరోసాపై కూడ మంత్రి కీలక అప్డేట్ ఇచ్చారు. రాష్ట్రవ్యాప్తంగా వర్క్ షాప్‌లు నిర్వహించి రైతు భరోసాకు సంబంధించిన విధివిధానాలు రూపొందిస్తామని చెప్పారు. గత ప్రభుత్వంలో కాకుండా అర్హులైన వారికి మాత్రమే రైతు భరోసా పథకాన్ని అమలు చేస్తామన్నారు. కేవలం సాగు భూములకు మాత్రమే పంట సాగు సాయం అందిస్తామని చెప్పుకొచ్చారు. గతంలో రియల్ ఎస్టేట్ భూములకు, పెద్ద రైతులకు కూడా రైతు బంధు సాయం అందించారని చెప్పారు. తాను ఇప్పటి వరకు రైతు బంధు తీసుకోలేదని వెల్లడించారు. తనకు వచ్చిన చెక్కులను తిరిగి ప్రభుత్వానికే అప్పగించినట్లు వెల్లడించారు.

కాగా, గతంలో పొంగులేటి శ్రీనివాస్ రెడ్డి బీఆర్ఎస్ పార్టీలో పని చేసిన విషయం తెలిసిందే. వైఎస్సాఆర్‌సీపీ పార్టీతో రాజకీయ అరంగ్రేటం చేసిన పొంగులేటి 2014లో ఖమ్మం ఎంపీగా విజయం సాధించారు. ఆ తర్వాత రాజకీయ పరిస్థితుల దృష్ట్యా బీఆర్ఎస్ పార్టీలో చేరారు. అనంతరం 2019 ఎన్నికల్లో పోటీకి దూరంగా ఉన్నారు. ఆ తర్వాత బీఆర్ఎస్ అధినేత కేసీఆర్‌తో పాటు కేటీఆర్‌తో విభేదించారు. తనకు ప్రాధాన్యం ఇవ్వటం లేదని ఆ పార్టీకి గుడ్‌బై చెప్పి గతేడాది కాంగ్రెస్ గూటికి చేరారు. ఆ తర్వాత తక్కువ సమయంలోనే పాలేరు ఎమ్మెల్యేగా కాంగ్రెస్ నుంచి విజయం సాధించారు. రేవంత్ కేబినెట్‌లో మంత్రి పదవి దక్కించుకొని ప్రభుత్వంలో కీలక వ్యక్తిగా ఎదిగారు.