byసూర్య | Tue, Jun 18, 2024, 08:16 PM

తెలంగాణకు హైదరాబాద్ వాతారవణశాఖ అధికారులు రెయిన్ అలర్ట్ జారీ చేశారు. నైరుతి రుతపనాలకు తోడు ద్రోణి ప్రభావం ఉండటంతో రాష్ట్రంలో వర్షాలు కురుస్తాయని చెప్పారు. మరో 4 రోజులపాటూ నైరుతి రుతపనాలు చురుగ్గా ఉంటాయని.. ఈశాన్య అరేబియాలో తుఫాను కూడా కేంద్రీకృతమై ఉందని చెప్పారు. వీటి ప్రభావంతో తెలంగాణలో తేలికపాటి నుంచి ఓ మోస్తరు వర్షాలు కురుస్తాయని.. కొన్ని చోట్ల భారీ వర్షాలకు ఛాన్స్ ఉందన్నారు. అలాగే ఉరుములు, మెరుపులు, పిడుగులు పడతాయని హెచ్చరించారు. వర్షాలు కురిసే సమయంలో గాలి వేగం 30 నుంచి 40 కిలోమీటర్లు ఉంటుందన్నారు.

నేడు రాష్ట్రవ్యాప్తంగా మేఘాలు కమ్ముకుని ఉంటాయని.. ఒకవేళ పగలు ఎండ కాసినా.. సాయంత్రానికి వాతావరణ చల్లబడి వర్షాలు కురుస్తాయన్నారు. సాయంత్రం 4 తర్వాత ఉత్తర తెలంగాణ, హైదరాబాద్‌లో కూడా భారీ వర్షం కురిసే ఛాన్స్ ఉంనదని చెప్పారు. ముఖ్యంగా ఉమ్మడి మహబూబ్‌నగర్, నల్గొండ, రంగారెడ్డి, హైదరాబాద్, మెదక్, ఖమ్మం, నిజామాబాద్, వరంగల్, కరీంనగర్ జిల్లాల్లో వర్షాలు కురిసే అవకాశం ఉందని చెప్పారు. ప్రజలు అవసరమైతేనే బయటకు రావాలని హెచ్చరించారు.

ఉష్ణోగ్రతల విషయానికొస్తే.. తెలంగాణలో సగటున 34 డిగ్రీల సెల్సియస్ ఉష్ణోగ్రత నమోదవుతుందని చెప్పారు. మధ్యాహ్నం వరకూ ఉత్తర తెలంగాణలో ఎండ బాగా ఉంటుందని.. ఆ తర్వాత వర్షాలకు అవకాశం ఉంటుందని చెప్పారు. వర్షాలు కురిసే చోట తేమ పెరిగి.. ఉక్కపోత ఉంటుందన్నారు. పశ్చిమం నుంచి వచ్చే గాలుల వేగం పెరిగితే.. ఉక్కపోత తగ్గుతుందని వాతావరణశాఖ అధికారులు స్పష్టం చేశారు.