byసూర్య | Wed, May 08, 2024, 09:14 PM

తీవ్ర ఎండలు, ఉక్కపోతతో అల్లాడుతున్న తెలంగాణ ప్రజలకు ఉపశమనం లభించింది. మంగళవారం హైదరాబాద్‌తో పాటు పలు జిల్లాల్లో భారీ వర్షాలు కురిశాయి. ఈదురుగాలులతో పాటు వడగళ్ల వాన కురిసింది. హైదరాబాద్ నగరంలో రికార్డుస్థాయిలో అత్యధిక వర్షపాతం నమోదైంది. రాష్ట్రంలోనే అత్యధికంగా మియాపూర్‌లో 13.3, కూకట్‌పల్లిలో 11.2 సెంటీమీటర్ల వర్షం కురిసింది.

నేడు కూడా పలు జిల్లాల్లో వర్షాలు కురుస్తాయని వాతావరణశాఖ అధికారులు వెల్లడించారు. కొమురం భీమ్ ఆసిఫాబాద్, మంచిర్యాల, నల్గొండ, సూర్యాపేట, జనగాం, భద్రాద్రి కొత్తగూడెం, ఖమ్మం, యాదాద్రి భువనగిరి, నాగర్ కర్నూల్ జిల్లాలో వర్షాలు కురిసే ఛాన్స్ ఉంది. ఈ మేరకు ఆయా జిల్లాలకు ఎల్లో అలర్ట్ జారీ చేశారు. ఉరుములు, మెరుపులతో పాటు గంటకు 40 నుంచి 50 కిమీ వేగంతో ఈదురుగాలులు వీస్తాయన్నారు.

ఇక హైదరాబాద్‌లో మంగళవారం వర్షం కారణంగా నెలకొన్న సమస్యలను వెంటనే పరిష్కరించాలని సీఎం రేవంత్‌రెడ్డి ఆదేశించారు. లోతట్టు ప్రాంతాలు జలమయం కావడంతోపాటు ట్రాఫిక్‌ సమస్యలు, విద్యుత్తు అంతరాయాలు తలెత్తిన దృష్ట్యా తక్షణమే సహాయక చర్యలు చేపట్టాలన్నారు. జీహెచ్‌ఎంసీ కమిషనర్‌ రొనాల్డ్‌ రాస్‌, హైదరాబాద్‌ పోలీస్‌ కమిషనర్‌ కె.శ్రీనివాస్‌రెడ్డి, ట్రాన్స్‌కో సీఎండీ రిజ్వి తదితర ఉన్నతాధికారులతో సమీక్షించారు. పలు ప్రాంతాల్లో విద్యుత్తు సరఫరా నిలిచిపోయిందని ఉన్నతాధికారులు తెలపగా.. వెంటనే పునరుద్ధరించాలని ఆదేశించారు.