byసూర్య | Tue, Apr 30, 2024, 08:10 PM

పైకేమో సాంప్రదాయిని. లోపల మాత్రం యవ్వారం వేరే ఉంది. ఈజీ మనీకి అలవాటుపడిన ఓ కేలేడీ డాన్.. ఏకంగా ఇంట్లోనే జూదం దుకాణం ఓపెన్ చేసింది. వ్యాపారస్తులను టార్గెట్ చేసి వారిని గేమింగ్‌లోకి దింపుతోంది. పక్కా సమాచారం అందుకున్న హైదరాబాద్ పోలీసులు రెడ్ హ్యాండెడ్‌గా పట్టుకున్నారు. వివరాల్లోకి వెళితే.. నగరానికి చెందిన మాధవి అనే మహిళ బడా వ్యాపారులకు వల వేసి వారిని గేమింగ్‌ (మూడు ముక్కలాట)లోకి దింపుతోంది. రాయదుర్గం పీఎస్ పరిధిలోని ఖాజాగూడ అట్లాంటిక్స్ అపార్ట్‌మెంట్‌లో గుట్టుగా గేమింగ్ స్థావరాన్ని ఏర్పాటు చేసింది.

గత కొంత కాలంగా అక్రమంగా గేమింగ్ నిర్వహిస్తోంది. హైదరాబాద్‌లోని వివిధ ప్రాంతాల నుంచి ఫంటర్స్‌ను పిలిపించి పెద్దఎత్తున గేమింగ్ నిర్వహిస్తోంది. ప్రతి ఆటకు రూ 1000 చొప్పున ఆర్గనైజర్ ఫీజును వసూలు చేస్తుంది. ఇలా రోజులో సుమారు 100 పైగా గేములు నిర్వహించి పెద్ద ఎత్తున డబ్బులు సంపాదిస్తోంది. వారికి ఇంట్లోనే మద్యం కూడా సరఫరా చేస్తూ అసాంఘిక కార్యకలపాలకు పాల్పడుతోంది.

ఇటీవలే కొంతమంది బడాబాబులు గేమింగ్‌లో రూ.లక్షలు నష్టపోయారు. దీంతో సమాచారం అందుకున్న టాస్క్‌ఫోర్స్ పోలీసులు ఖాజాగూడలోని గేమింగ్ స్థావరంపై ఆకస్మికంగా దాడి చేశారు. ఈ దాడుల్లో రూ.62 వేల నగదు, 11 సెలఫోన్లు, ప్లేయింగ్ కార్డ్స్ సీజ్ చేశారు. 9 మందిని అరెస్ట్ చేసి వారిపై గేమింగ్ యాక్ట్ కింద కేసులు నమోదు చేశారు.