byసూర్య | Wed, Apr 24, 2024, 07:26 PM

తెలంగాణలో లోక్‌సభ ఎన్నికల వేళ సవాళ్ల రాజకీయం నడుస్తోంది. ఈ క్రమంలోనే సీఎం రేవంత్ రెడ్డి విసిరిన సవాల్‌ను స్వీకరిస్తున్నట్లు తెలిపిన మాజీ మంత్రి, బీఆర్ఎస్ ఎమ్మెల్యే హరీష్ రావు.. తిరిగి సీఎంకు మరో సవాల్ విసిరారు. రైతుల రుణమాఫీని ఆగస్టు 15 వ తేదీ లోపు చేస్తామని ముఖ్యమంత్రి రేవంత్ రెడ్డి ఇప్పటికే స్పష్టం చేశారు. రైతు రుణమాఫీపై ప్రతిపక్ష బీఆర్ఎస్ నేతలు చేస్తున్న విమర్శలు తిప్పికొట్టిన సీఎం రేవంత్.. ఆగస్టు 15 వ తేదీ లోపు రైతుల రుణమాఫీ చేస్తే ముఖ్యమంత్రి రేవంత్ రెడ్డి విసిరిన సవాల్‌ను స్వీకరిస్తున్నట్లు తెలిపారు. ఈ క్రమంలోనే తిరిగి రేవంత్ రెడ్డికి హరీష్ రావు ఇంకో సవాల్ విసిరారు.

రుణమాఫీ అమలుపై సీఎం రేవంత్‌ రెడ్డి ఇచ్చిన సవాల్‌ను స్వీకరిస్తున్నట్లు సంగారెడ్డిలో నిర్వహించిన ఎన్నికల ప్రచారంలో తెలిపిన హరీష్ రావు.. ఆగస్ట్ 15 వ తేదీ లోపు పూర్తిగా రుణమాఫీ చేయాలని డిమాండ్ చేశారు. ఒకవేళ అలా చేస్తే తాను.. తన ఎమ్మెల్యే పదవికి రాజీనామా చేస్తానని.. మళ్లీ ఉప ఎన్నికల్లో కూడా పోటీ చేయనని హరీష్ రావు వెల్లడించారు. ఒక వేళ ఆ హామీని నెరవేర్చని పక్షంలో సీఎం పదవికి రాజీనామా చేస్తారా అంటూ రేవంత్ రెడ్డిని ప్రశ్నించారు. తనకు పదవి కంటే తెలంగాణ ప్రజల సంక్షేమమే ముఖ్యమని ఈ సందర్భంగా హరీష్ రావు తెలిపారు. అధికార పార్టీ ఇచ్చిన హామీలను నెరవేర్చేలా చేసే బాధ్యత ప్రతిపక్షంగా తమపై ఉందని పేర్కొన్నారు.

ఇక శుక్రవారం అసెంబ్లీ ముందు ఉన్న అమరవీరుల స్తూపం వద్దకు తాను వస్తానని.. అప్పుడు రేవంత్ రెడ్డి కూడా రావాలని హరీష్ రావు డిమాండ్ చేశారు. ఆగస్ట్ 15 వ తేదీ లోపు కాంగ్రెస్ ఇచ్చిన అన్ని గ్యారెంటీలను అమలు చేయడంతోపాటు.. రైతుల రుణమాఫీని కూడా చేస్తామని ప్రమాణం చేయాలని సీఎం రేవంత్ రెడ్డిని డిమాండ్ చేశారు. ఈ ప్రమాణం చేసి ఆగస్టు 15 వ తేదీ లోపు హామీని నిలబెట్టుకుంటే తాను సిద్దిపేట ఎమ్మెల్యే పదవికి రాజీనామా చేస్తానని.. మళ్లీ వచ్చే ఉప ఎన్నికల బరిలో కూడా ఉండనని చెప్పారు. అంతేకాకుండా రుణమాఫీ, హామీల అమలు చేయకపోతే సీఎం పదవికి రేవంత్‌ రాజీనామా చేస్తారా అని ప్రశ్నించారు.

 ఇక గతంలో రేవంత్ రెడ్డి సవాళ్లు చేసి వాటిపై మాటతప్పారని హరీష్ రావు గుర్తు చేశారు. కొడంగల్‌లో ఓడిపోతే రాజకీయ సన్యాసం తీసుకుంటానని చెప్పిన రేవంత్ రెడ్డి.. మాట తప్పారని ఆరోపించారు. ఇక డిసెంబర్ 9 వ తేదీన ఆరు గ్యారెంటీలను అమలు చేస్తామని చెప్పి కాంగ్రెస్ పార్టీ మాట తప్పిందని తెలిపారు. ఇక కాంగ్రెస్ పార్టీ ఇచ్చిన 6 గ్యారెంటీలకు చట్టబద్ధత చేస్తానని చెప్పి సీఎం మాట తప్పారని పేర్కొన్నారు. మాట తప్పడం పూటకో పార్టీ మారడం రేవంత్ రెడ్డి నైజమని హరీష్ రావు తీవ్ర స్థాయిలో విరుచుకుపడ్డారు. అధికారంలోకి వచ్చిన వంద రోజుల్లో ఆరు గ్యారెంటీలు అమలు చేస్తామని సోనియాగాంధీ లేఖ రాశారని.. 120 రోజులు దాటినా ఎందుకు అమలు చేయడం లేదంటూ ప్రశ్నించారు.

మహాలక్ష్మీ పథకంలో భాగంగా మహిళలకు రూ. 2500 ఎందుకు ఇవ్వలేదని.. రైతుబంధు ఎకరానికి రూ.15 వేలు ఎందుకు చెల్లించలేదని.. వరికి మద్దతు ధరపై రూ.500 బోనస్ ఏది అని.. నిరుద్యోగులకు భృతి ఎందుకు ఇవ్వలేదని హరీష్ రావు.. కాంగ్రెస్ సర్కార్‌ను ప్రశ్నించారు. మంగళవారం వరంగల్‌లో నిర్వహించిన సభలో ప్రసంగించిన సీఎం రేవంత్ రెడ్డి.. రుణమాఫీ చేయకపోతే రాజీనామా చేస్తారా అంటూ హరీష్ రావు అంటున్నారని.. ఆగస్టు 15 వ తేదీలోగా రుణమాఫీ చేస్తే బీఆర్ఎస్ పార్టీని రద్దు చేసుకుంటారా అని హరీష్ రావుకు సీఎం రేవంత్ రెడ్డి సవాల్ విసిరారు.