byసూర్య | Sun, Apr 14, 2024, 09:38 PM

తెలంగాణలో లోక్ సభ ఎన్నికల హడావుడి మొదలైంది. ఇప్పటికే అన్ని పార్టీలు ప్రచారం మొదలుపెట్టేశాయి. అందులనూ.. అన్ని ఎంపీ స్థానాలకు అభ్యర్థులను ప్రకటించిన బీఆర్ఎస్.. ప్రచారంలోనూ జోరు పెంచింది. అసెంబ్లీ ఎన్నికల్లో ఓడిపోయిన బీఆర్ఎస్ పార్టీలో గడ్డు పరిస్థితులు నెలకొనగా.. లోక్ సభ ఎన్నికల్లో అధిక స్థానాలు గెలిచి సత్తా చాటాలని గులాబీ నేతలు ఉవ్విళ్లూరుతున్నారు. ఇందుకోసం.. నేరుగా గులాబీ బాస్ కేసీఆరే రంగంలోకి దిగారు. ఎండిపోయిన పంటలను పరిశీలించిన కేసీఆర్.. రేవంత్ రెడ్డి సర్కారును ఎండగట్టారు. కాంగ్రెస్ ప్రభుత్వంపై తీవ్ర స్థాయిలో విమర్శలు చేస్తున్నారు. వంద రోజుల్లో నెరవేరుస్తామని చెప్పి.. అలవికాని హామీలు ఇచ్చి రాష్ట్ర ప్రజలను నిలువునా మోసం చేశారంటూ.. కేసీఆర్ నిప్పులు చెరుగుతున్నారు.

కేవలం విమర్శలకే పరిమితం కాకుండా.. కాంగ్రెస్ సర్కారును ఇరుకునపెట్టేందుకు.. గులాబీ పార్టీ సంచలన నిర్ణయం తీసుకుంది. ఇప్పటికే పలు వ్యుహాలను రచించిన బీఆర్ఎస్.. కాంగ్రెస్ ప్రభుత్వ వైఫ్యలాలను జనాల్లోకి తీసుకెళ్లి.. ప్రజలను మళ్లీ తమవైపు తిప్పుకునే ప్రయత్నాలు మొదలుపెట్టింది. ఈ క్రమంలోనే.. కాంగ్రెస్ పార్టీ 100 రోజుల వైఫల్యాలపై పోస్టు కార్డు ఉద్యమం చేయాలని బీఆర్ఎస్ పార్టీ నిర్ణయించింది. ఈ విషయాన్ని ఆ పార్టీ మాజీ మంత్రి, సిద్దిపేట ఎమ్మెల్యే హరీష్ రావు వెల్లడించారు. కాంగ్రెస్ పార్టీ వైఫల్యాలపై పోస్టు కార్డ్ ఉద్యమం చేస్తామని హరీశ్ రావు ప్రకటించారు.

రాష్ట్ర రైతుల పక్షాన సీఎం రేవంత్ రెడ్డికి పోస్ట్ కార్డులు పంపుతామని హరీశ్ రావు తెలిపారు. అసెంబ్లీ ఎన్నికల్లో హామీ ఇచ్చినట్లుగా రైతులకు రూ.2 లక్షల రుణమాఫీ, పంటలకు బోనస్ ఇవ్వాల్సిందేనని డిమాండ్ చేశారు. కాంగ్రెస్ పార్టీ అసెంబ్లీ ఎన్నికల్లో ఇచ్చిన హామీలు నేరవేర్చాకే పార్లమెంట్ ఎన్నికల్లో ఓట్లు అడగాలని డిమాండ్ చేశారు. అధికారం చేపట్టిన నాలుగు నెలల్లోనే కాంగ్రెస్ ప్రభుత్వంపై రాష్ట్రంలో తీవ్ర స్థాయిలో వ్యతిరేకత వచ్చిందని హరీశ్ రావు విమర్శించారు.