byసూర్య | Wed, Dec 06, 2023, 09:42 PM

బంగాళాఖాతంలో ఏర్పడిన మిచౌంగ్ తుపాను సోమవారం తీవ్ర రూపం దాల్చింది. గంటకు పది కిలోమీటర్ల వేగంతో కదులుతుండడంతో ఏపీ, తమిళనాడు, తెలంగాణలో వర్షాలు కురుస్తున్నాయి. దీని ప్రభావం, ఏపీ, తెలంగాణపై ఉంటుందని వాతావరణశాఖ అధికారులు హెచ్చరించారు. పలు జిల్లాలకు ఇప్పటికే రెడ్ అలర్డ్ కూడా జారీ చేశారు. ఈ నేపథ్యంలో సౌత్ సెంట్రల్ రైల్వే అధికారులు అప్రమత్తమయ్యారు. ప్రయాణికుల భద్రత దృష్ట్యా.. ఇప్పటికే సుమారు 150 రైళ్లు రద్దు చేశారు. తాజాగా రైల్వే అధికారులు కీలక ప్రకటన చేశారు. హైదరాబద్ నుంచి దక్షిణాది వైపు వెళ్లే రైళ్లన్నీ రద్దు చేస్తున్న్టలు ప్రకటించారు.

తుపాను నేపథ్యంలో ట్రైన్ ప్రయాణికుల భద్రతకు ప్రాధాన్యం ఇవ్వాలని సౌత్ సెంట్రల్ రైల్వే జీఎం అరుణ్‌కుమార్‌ జైన్‌ అధికారులను ఆదేశించారు. రైల్‌ నిలయం నుంచి జోన్‌ పరిధిలోని ఆరు డివిజన్ల అధికారులతో సోమవారం సమీక్షించారు. ప్రయాణికుల సౌకర్యార్థం స్టేషన్ల వారీగా హెల్ప్‌లైన్‌ నంబర్లు ఏర్పాటు చేశారు. సికింద్రాబాద్, నాంపల్లి, కాచిగూడలో ప్రత్యేక కంట్రోల్ రూంలు ఏర్పాటు చేశారు. సికింద్రాబాద్‌ 040-27786666, 040-27801112, హైదరాబాద్‌- 96769 04334, కాచిగూడ 040-27784453, కాజీపేట 0870-2576430, ఖమ్మం 78159 55306లో సంప్రదించవచ్చుని సూచించారు.

విమాన సర్వీసులు రద్దు..

తుపాను కారణంగా సోమవారం 25 దేశీయ విమాన సర్వీసులను శంషాబాద్ ఎయిర్‌పోర్ట్‌ అధికారులు అర్ధంతరంగా రద్దు చేశారు. దీంతో హైదరాబాద్ నుంచి చెన్నై (10), తిరుపతి(4), రాజమండ్రి(3), విశాఖపట్నం,(3), విజయవాడ, పుణె, అహ్మదాబాద్‌, దిల్లీ, పట్నా నగరాలకు వెళ్లాల్సిన విమానాల్లో ఎక్కేందుకు ఎయిర్‌పోర్టుకు చేరుకున్న వేల మంది ప్రయాణికులు తీవ్ర ఇబ్బందులు ఎదుర్కొన్నారు. సర్వీసుల రాకపోకలపై ఎయిర్‌లైన్స్‌ అధికారులు పొంతన లేని సమాధానాలిస్తూ కాలయాపన చేస్తున్నారంటూ వారు ధర్నాకు దిగారు. విమానాశ్రయ అధికారులు జోక్యం చేసుకుని వాతావరణం కుదుట పడగానే విమాన సర్వీసులను పునరుద్ధరిస్తామని హామీ ఇవ్వడంతో ప్రయాణికులు శాంతించారు.