తీరుమారని 'హస్త' రాజకీయం.. సీఎం, మంత్రి పదవులపై సీనియర్ల పట్టు

byసూర్య | Mon, Dec 04, 2023, 10:58 PM

తెలంగాణ కాంగ్రెస్ అంటేనే అంతర్గత విభేదాలు.. పదవుల కోసం పంచాయితీలు.. సీనియర్లు, జూనియర్ల మధ్య అభిప్రాయ భేదాలు అంటూ రకరకాల కుమ్ములాటలుంటాయని ప్రత్యర్థి పార్టీలు ఎద్దేవా చేస్తుంటాయి. ఇక ఎన్నికల సమయంలోనైతే.. కాంగ్రెస్ పార్టీ సీఎం అభ్యర్థి ఎవరో చెప్పాలని.. ఆ పార్టీ గెలిస్తే ఆరు నెలలకో సీఎం మారుతాడంటూ సెటైర్లు విసిరాయి. అయితే.. అంతకుముందు ఎలా ఉన్నా.. ఎన్నికల సమయం వచ్చేసరికి బీఆర్ఎస్‌ను గద్దె దించి, కాంగ్రెస్‌ను గెలిపించటమే లక్ష్యంగా హస్తం పార్టీ నేతలంతా ఒకేతాటి మీదికొచ్చి పోరాడారు. ఫలితంగా విజయదుందుబీ మోగించారు. ఓటర్లు కూడా.. ప్రభుత్వం ఏర్పాటు చేసేందుకు కావాల్సిన మ్యాజిక్ ఫిగర్ కంటే ఓ ఐదు సీట్లు ఎక్కువే కట్టబెట్టారు. అయితే.. ప్రభుత్వం ఏర్పాటు చేసే సమయం వచ్చేసరికి మళ్లీ ముచ్చట మొదటికొచ్చింది.


సీఎం అభ్యర్థి ఎంపికపై తుది నిర్ణయం అధిష్ఠానికే అప్పగిస్తూ.. ఏకవాక్య తీర్మానం చేసి ఢిల్లీకి పంపించగా.. ఎమ్మెల్యేల అభిప్రాయాలను ఏఐసీసీ నియమించిన పరిశీలకుడు డీకే శివకుమార్ సేకరించారు. ఆ అభిప్రాయాలపై ఓ నివేదికను తయారు చేసి అధిష్ఠానానికి పంపించారు. ఇక ఈరోజే సీఎం అభ్యర్థిపై ఓ క్లారిటీ వచ్చి.. ప్రమాణ స్వీకారం కూడా జరిగిపోతుందని అంతా అనుకున్నారు. కానీ.. కాంగ్రెస్ మార్క్ రాజకీయం మళ్లీ తెరమీదికొచ్చింది. అధిష్ఠానం పిలుపు మేరకు పరిశీలకులు ఢిల్లీకి వెళ్లగా.. అక్కడ అసలు పంచాయితీ మొదలైంది. రేవంత్ రెడ్డికి సీఎం పదవి ఇవ్వాలని పార్టీ శ్రేణుల్లో ఎక్కువ మంది డిమాండ్ చేస్తున్నారు. అధిష్ఠానం కూడా రేవంత్ వైపే మొగ్గు చూపుతున్నట్లు తెలుస్తోంది. అయితే, ఈ నిర్ణయాన్ని సీనియర్ నేతలు తీవ్రంగా వ్యతిరేకిస్తున్నట్టు సమాచారం.


అటు సీఎం పదవిపైనే కాదు.. ఇటు మంత్రి పదవులపై కూడా సీనియర్ నేతల పట్టు వీడటం లేదని తెలుస్తోంది. సీఎం రేసులో ఉన్న భట్టి విక్రమార్క విషయంలోనూ అభిప్రాయ భేదం వచ్చినట్టు తెలుస్తోంది. తనకు ఇస్తే.. సీఎం పదవి ఇవ్వాలని లేదా.. సింగిల్ డిప్యూటీ సీఎం ప్లస్ కీలక పదవి ఇవ్వాలని భట్టి కోరుతున్నారట. తనకు డిప్యూటీ సీఎం ఇస్తే మాత్రం తనకు మాత్రమే ఇవ్వాలని.. ఇంకొకరికి ఇస్తే ఒప్పుకొనే ప్రసక్తి లేదు అంటూ భట్టి విక్రమార్క ఆగ్రహం వ్యక్తం చేసినట్టు సమాచారం.


ఇక ఉత్తమ్ కూడా సీఎం సీటును ఆశిస్తున్నట్టు తెలుస్తోంది. ఒకవేళ సీఎం పదవి ఇవ్వకుంటే తన సతీమణికి మంత్రి పదవి ఇవ్వాలని ఉత్తమ్ డిమాండ్ చేస్తున్నట్టు సమాచారం. అధిష్ఠానం మాత్రం డిప్యూటీ సీఎం లేదా స్పీకర్ పదవి తీసుకోవాలని బతిమాలుతుందంట. ఇదిలా ఉంటే.. SC, BCల కోటాలో రెండు డిప్యూటీ సీఎం పదవులు ఇవ్వాలన్న ఆలోచనలో అధిష్ఠానం ఉందని తెలుస్తోంది. ఇక బీసీ కోటాలో పొన్నం ప్రభాకర్ డిప్యూటీ సీఎం పోస్టు అడుగుతున్నారట. ఇక.. శ్రీధర్ బాబుకు స్పీకర్ పదవి ఇస్తాననడంతో.. ఆయన కూడా అలిగినట్టు తెలుస్తోంది. ఖాళీగా అయినా ఉంటాను కానీ స్పీకర్ పదవి మాత్రం అవసరం లేదని ఆగ్రహం వ్యక్తం చేసినట్టు సమాచారం. మరోవైపు.. సీతక్కకు ఉప ముఖ్యమంత్రి పదవి ఇవ్వాలని రేవంత్ రెడ్డి కోరగా.. సమస్యే లేదని సీనియర్ నేతలు కరాఖండిగా చెప్పేశారంట. ఈ విషయంలో.. ఒకరిపై ఒకరు పరుష పదజాలంతో మాటలు అనుకున్నట్టు తెలుస్తోంది. దీంతో.. భట్టి, దామోదర రాజనర్సింహ, శ్రీధర్ బాబు... సీఎల్పీ మీటింగ్ నుంచి కోపంతో వెళ్లిపోయినట్టు తెలుస్తోంది. ఇదిలా ఉంటే.. పీసీసీ చీఫ్ పదవిపైన కూడా సందిగ్ధత వీడలేదంట.


Latest News
 

శుభవార్త చెప్పిన రేవంత్ రెడ్డి.. వారం రోజుల్లో మరో 2 పథకాలు ప్రారంభం Wed, Feb 21, 2024, 11:14 PM
సిద్దిపేట పవర్ హౌస్‌లో భారీ అగ్నిప్రమాదం.. అంధకారంలో పట్టణం Wed, Feb 21, 2024, 11:13 PM
కిడ్నాపర్లు అనుకొని పోలీసులను చితకబాదారు.. ఎస్‌ఐకి తీవ్ర గాయాలు Wed, Feb 21, 2024, 09:32 PM
టికెట్ల కోసం బస్సులో కండక్టర్ ఫీట్లు.. ఈయన కష్టం చూస్తే నవ్వాపుకోలేరు Wed, Feb 21, 2024, 09:31 PM
రూ.500కే గ్యాస్ సిలిండర్.. మంత్రి శ్రీధర్ బాబు కీలక అప్డేట్ Wed, Feb 21, 2024, 09:29 PM