byసూర్య | Sat, Dec 02, 2023, 09:29 PM

తెలంగాణలో ఎన్నికల ఫలితాల ఉత్కంఠ నెలకొంది. మరికొన్ని గంటల్లో కౌంటింగ్ మొదలవనుండగా.. ఏ పార్టీ అధికారంలోకి రానుందన్నది సర్వత్రా ఆసక్తికర చర్చ నడుస్తోంది. ఇప్పటికే విడుదలైన ఎగ్జిట్ పోల్స్‌లో చాలా వరకు కాంగ్రెస్ పార్టీకే మొగ్గు చూపగా.. కొన్ని మాత్రం నెక్ టూ నెక్ ఉంటుందన్న అభిప్రాయం వ్యక్తం చేశాయి. ఈ క్రమంలో.. రేపు ఎలాంటి ఫలితాలు వస్తాయన్నది తెలంగాణ ప్రజల్లో ఉత్కంఠగా మారింది. కాగా.. ఇప్పుడు మరో ఆసక్తికర అంశం తెరమీదికొచ్చింది. తెలంగాణలో సైలెంట్‌ వేవ్‌ నడుస్తోందని.. మరోసారి కేసీఆర్ సర్కార్ ఏర్పడే అవకాశాలు కూడా లేకపోలేదని కొందరు రాజకీయ విశ్లేషకులు అభిప్రాయపడుతున్నారు. వారి అభిప్రాయాలతో పాటు తాజాగా మరికొన్ని సర్వే సంస్థలు కూడా ఇదే అభిప్రాయాన్ని వెల్లడిస్తున్నాయి. దీంతో.. కొత్త చర్చకు తెరలేచింది.

పచ్చిమ బెంగాల్‌కు చెందిన ప్రొఫెసర్‌ సంజయ్‌ కుమార్‌ ఓ చర్చలో మాట్లాడుతూ ఈ అంశాన్ని ప్రస్తావించారు. పశ్చిమ బెంగాల్‌లో మాదిరిగానే తెలంగాణలో కూడా సెలైంట్‌ వేవ్‌తో బీఆర్‌ఎస్‌ మరోసారి అధికారంలోకి వచ్చే అవకాశం లేకపోలేదని అభిప్రాయపడ్డారు. బీఆర్‌ఎస్‌కు ప్రజల్లో ఉన్న ఆదరణ, ప్రభుత్వ సంక్షేమ పథకాలు తిరిగి ఆ పార్టీని గెలిపించే అవకాశం ఉందని చెప్పుకొచ్చారు. ఇదిలా ఉంటే.. ఈరోజు కూడా కొన్ని ఎగ్జిట్ పోల్స్.. సోషల్ మీడియాలో ప్రత్యక్షమవుతుండగా.. అవి కూడా బీఆర్ఎస్‌ పార్టీకే పూర్తి మ్యాజిక్ ఫిగర్ వస్తుందని చెప్తున్నాయి. థర్డ్‌ విజన్‌ నాగన్న సర్వే ఎగ్జిట్‌ పోల్స్‌ విడుదల చేయగా.. అది కూడా బీఆర్‌ఎస్‌ పార్టీకి పూర్తి స్థాయిలో 60 నంచి 68 స్థానాలు వచ్చే అవకాశం ఉందని వెల్లడించింది. కాంగ్రెస్‌కు 33-40 సీట్లు వస్తాయని చెప్తోంది.

ఈ తాజా సర్వేలు, విశ్లేషణలతో.. నిన్నటి వరకు కొంత నిరాశలో ఉన్న బీఆర్ఎస్ కార్యకర్తలు కొంత యాక్టివ్ అయ్యారు. చెయ్యి ఎత్తి కారును ఆపడం సాధ్యమేనా అని వ్యంగ్యాస్త్రాలు సంధిస్తున్నారు. కేసీఆర్‌ హ్యాట్రిక్‌ కొట్టడం ఖాయమంటూ ధర్డ్ విజన్ నాగన్న సర్వేలు, ప్రొఫెసర్ సంజయ్ కుమార్ వీడియోలు షేర్ చేస్తున్నారు. ఎవరి విశ్లేషణలు వాళ్లు చేస్తుండగా.. అసలు ఫలితం రేపు వెల్లడికానుంది. చూడాలి మరి.. తెలంగాణ ఓటర్లు ఏ పార్టీ అధికారంలోకి రావాలని గట్టిగా కోరుకున్నారో..?