byసూర్య | Tue, Nov 28, 2023, 07:10 PM

తెలంగాణ రాజకీయాల్లో మంత్రి మల్లారెడ్డి స్టైలే వేరు. 'పాలమ్మినా.. పూలమ్మినా.. కష్టపడ్డా.. పైకి వచ్చినా..' అంటూ ఆయన చెప్పే డైలాగులు చాలా ఫేమస్. సోషల్ మీడియాలోనూ ఆయన ఎప్పుడూ ట్రెండింగ్‌లో ఉంటారు. తన మాటలు, చేష్టలతో చుట్టూ ఉన్నవారిని నవ్విస్తుంటారు. తాజాగా.. ఆయన రాజకీయాల్లోకి రావటంపై ఆసక్తికర కామెంట్స్ చేసారు. టాలీవుడ్‌ సూపర్‌ స్టార్‌ మహేశ్‌ బాబు సినిమా చూసే తాను రాజకీయాల్లోకి వచ్చానని అన్నారు. సోమవారం రాత్రి మల్లారెడ్డి యూనివర్సిటీలో నిర్వహించిన 'యానిమల్‌' సినిమా ప్రీ రిలీజ్‌ ఈవెంట్‌కు హాజరైన ఆయన తన స్పీచ్‌తో మరోసారి అదరగొట్టారు. మహేష్ బాబు సినిమా బిజినెస్‌మేన్‌ సినిమా చూసే తాన పాలిటిక్స్‌లోకి వచ్చినట్లు చెప్పారు. ఆ సినిమాను తాను 10 సార్లు చూసినట్లు వెల్లడించారు. ఆ తర్వాత తాను పాలిటిక్స్‌లోకి వచ్చి సక్సెస్ సాధించినట్లు మల్లారెడ్డి తెలిపారు.

'మహేశ్‌ బాబు గారూ.. నేను మీ సినిమా బిజినెస్‌మెన్‌ చూసే రాజకీయాల్లోకి వచ్చాను. ఆ సినిమాను పది సార్లు చూసి ఎంపీ అయ్యాను. సేమ్‌ మోడల్‌.. సేమ్‌ సిస్టమ్‌' అంటూ మల్లారెడ్డి వ్యాఖ్యనించారు. మల్లారెడ్డి మాటలు విన్న మహేష్ బాబు.. నవ్వు ఆపుకోలేకపోయారు. ఇక మంత్రి స్పీచ్‌కు ఈవెంట్‌కు హాజరైన సినీ అభిమానులు సైతం ఈలలు, కేకలతో హోరెత్తించారు. ప్రస్తుతం మంత్రి చేసిన ఈ కామెంట్స్‌ వైరల్‌ అవుతున్నాయి. తాను మహేష్ బాబుకు పెద్ద అభిమానిని అని మల్లారెడ్డి పలు సందర్భాల్లో చెప్పారు. మహేశ్‌ బాబు నటించిన 'శ్రీమంతుడు ఆడియో రిలీజ్‌ ఈవెంట్‌లో పాల్గొన్న మల్లారెడ్డి.. కూడా ఇదే విషయాన్ని ఓపెన్‌గా చెప్పారు.

వచ్చే ఐదేళ్లలో హాలీవుడ్‌, బాలీవుడ్‌ను తెలుగువాళ్లు రూల్‌ చేస్తారని మల్లారెడ్డి ధీమా వ్యక్తం చేశారు. మీరు హైదరాబాద్‌కు మారిపోవడం బెటర్‌ అని హీరో రణ్‌బీర్‌ కపూర్‌కు సూచించారు. ముంబయి పాతబడిపోతుందని.. బెంగళూరులో ట్రాఫిక్‌ జామ్‌ ఎక్కువ అని.. అన్ని వసతులు కలిగిన ఏకైక నగరం హైదరాబాద్‌ అని అన్నారు. తెలుగు వాళ్లు చాలా స్మార్ట్‌ అని చెప్పిన మల్లారెడ్డి.. తమ వద్ద రాజమౌళి, దిల్‌ రాజు, ఇప్పుడు సందీప్‌రెడ్డి వంటి టాలెంట్ పర్సనాలిటీలు ఉన్నారన్నారు. మల్లారెడ్డి మాటలకు కథానాయకులు మహేశ్‌బాబు, రణ్‌బీర్‌కపూర్‌, దర్శకుడు రాజమౌళి నవ్వులు చిందించారు.