byసూర్య | Tue, Sep 26, 2023, 07:10 PM

తెలంగాణ సాయుధ పోరాటంతో తనదైన శైలిలో ధైర్యసాహసాలు ప్రదర్శించిన వీరనారి చాకలి ఐలమ్మ జయంతి సందర్భంగా.. రాష్ట్రమంతా వేడుకలు ఘనంగా నిర్వహిస్తున్నారు. చాకలి ఐలమ్మ జయంతిని కేసీఆర్ సర్కారు అధికారికంగా నిర్వహిస్తున్న సందర్భంగా.. ఆమె పోరాటపటిమను తెలంగాణ సమాజం నెమరువేసుకుంటోంది. నాటి తెలంగాణ సాయుధ పోరాట కాలంలో చాకలి ఐలమ్మ ప్రదర్శించిన ధైర్య సాహసాలు, చైతన్యం నేటి తరానికీ ఎంతో స్ఫూర్తిదాయకమని సీఎం కేసీఆర్ తెలిపారు. ఆమె త్యాగాలను, పోరాటస్ఫూర్తిని సీఎం స్మరించుకున్నారు.

ఆ కాలంలోనే.. తన హక్కుల సాధన కోసం న్యాయస్థానాల్లో చట్టపరమైన పోరాటం చేసిన ప్రజాస్వామిక వాది ఐలమ్మ అని.. సబ్బండ వర్గాల ఆత్మగౌరవ ప్రతీకగా సీఎం కొనియాడారు. నాడు ఐలమ్మ ప్రదర్శిందిన స్ఫూర్తి.. తెలంగాణ సాధనలోనూ, అనంతర ప్రగతి ప్రస్థానంలోనూ ఇమిడి ఉందని సీఎం కేసీఆర్ తెలిపారు. చాకలి ఐలమ్మ త్యాగాలకు గుర్తుగా రాష్ట్ర ప్రభుత్వం వారి జయంతి, వర్ధంతి కార్యక్రమాలను అధికారికంగా నిర్వహిస్తోందని చెప్పుకొచ్చారు.

దేశంలో మరెక్కడాలేని విధంగా రజకుల సంక్షేమం కోసం రాష్ట్ర ప్రభుత్వం కృషి చేస్తున్నదని సీఎం కేసీఆర్ స్పష్టం చేశారు. మహిళలు, బీసీ, ఎంబీసీల అభివృద్ధి, సంక్షేమం కోసం రాష్ట్ర ప్రభుత్వం అమలు చేస్తున్న అనేక పథకాలు సత్ఫలితాలనిస్తున్నాయని సీఎం తెలిపారు. సబ్బండ కులాల జీవన ప్రమాణాలను రాష్ట్ర ప్రభుత్వం గుణాత్మకంగా అభివృద్ధి పరుస్తుందని.. బీసీ, ఎంబీసీ మహిళల సంక్షేమం కోసం తమ కృషి కొనసాగుతూనే వుంటుందని సీఎం కేసీఆర్ స్పష్టం చేశారు.