byసూర్య | Tue, Sep 26, 2023, 07:14 PM

హైదరాబాద్‌ నగరంలో తీవ్ర విషాదం చోటుచేసుకుంది. అపార్ట్‌మెంట్‌పై నుంచి దూకి పదో తరగతి విద్యార్థి ఆత్మహత్య చేసుకున్నాడు. రాయదుర్గంలోని ఓ అపార్ట్‌మెంట్‌లో కుటుంబంతో పాటు నివాసముంటూ.. ఓక్రిడ్జ్‌ ఇంటర్నేషన్ స్కూల్‌లో పదో తరగతి చదువుతున్న విద్యార్థి రేయాన్ష్ రెడ్డి (14) ఆత్మహత్య చేసుకోవటం ఇప్పుడు సర్వత్రా చర్చనీయాంశంగా మారింది. రేయాన్ష్ రెడ్డి.. సోమవారం రాత్రి 7.30 గంటలకు ఇంటి నుంచి బయటకు వెళ్లాడు. అయితే.. ఎంత సేపటికీ ఇంటికి రాలేదు. దీంతో.. కంగారు పడిన తల్లిదండ్రులు చుట్టుపక్కల అన్ని ప్రాంతాల్లో వెతికారు. కానీ.. ఆ అబ్బాయి ఆచూకీ లభించలేదు.

అర్ధరాత్రి 2 గంటల వరకు వెతికా.. లాభం లేకపోవటంతో చివరికి పోలీసులకు ఫిర్యాదు చేశారు రేయాన్ష్ తల్లిదండ్రులు. పేరెంట్స్ ఫిర్యాదు మేరకు పోలీసులు మిస్సింగ్ కేసు నమోదు చేసి.. బాలుడి కోసం గాలింపు చర్యలు చేపట్టారు. కట్ చేస్తే.. మంగళవారం ఉదయం 7 గంటలకు ఊహించని వార్త వినిపించింది. రేయాన్ష్ కుటుంబం నివాసముంటున్న అపార్ట్‌మెంట్‌ పక్క బ్లాక్‌ ముందు రక్తపు మడుగులో అబ్బాయి మృతదేహం కనిపించింది.

సమాచారం అందుకున్న పోలీసులు.. ఘటనాస్థలికి చేరుకుని విచారణ చేపట్టారు. అయితే.. పోలీసుల ప్రాథమిక విచారణ ప్రకారం.. రేయాన్ష్ కొన్ని రోజులుగా ఆన్‌లైన్ గేమ్స్‌కు బానిసైనట్టు తెలుస్తోంది. అంతేకాకుండా.. చదువు ఒత్తిడి కూడా తట్టుకోలేక ఒకింత మనస్తాపానికి గురైనట్టు తెలిసింది. ఈ కారణాల వల్లే రేయాన్ష్ ఆత్మహత్య చేసుకున్నట్లు పోలీసులు ప్రాథమికంగా భావిస్తున్నారు. అయితే.. అబ్బాయి ఆత్మహత్యకు గల సరైన కారణం ఏంటన్నది ఇంకా తెలియాల్సి ఉంది.