byసూర్య | Tue, Sep 26, 2023, 07:00 PM

తెలంగాణలో ఓవైపు రాజకీయాలు రసవత్తరంగా నడుస్తుంటే.. మరోవైపు గ్రూప్-1 పరీక్ష రద్దు అంశం సంచలనంగా మారింది. అయితే.. గ్రూప్-1 ప్రిలిమ్స్ పరీక్షను రద్దు చేస్తూ హైకోర్టు సింగిల్ బెంచ్ తీర్పునివ్వగా.. తెలంగాణ ప్రభుత్వం దాన్ని సవాలు చేస్తూ డివిజన్ బెంచ్‌ను ఆశ్రయించిన విషయం తెలిసిందే. కాగా.. దీనిపై హైకోర్టులో ఈ అంశంపై విచారణ జరిగింది. ఈ క్రమంలో టీఎస్పీఎస్సీపై హైకోర్టు తీవ్ర ఆగ్రహం వ్యక్తం చేసింది. మొన్నటి వరకు పేపర్ లీకేజీ అంశంతో విద్యార్థుల జీవితాలను అయోమయంలో పడితే.. ఇప్పుడేమో బయోమెట్రిక్ సమస్య అంటూ.. యువత జీవితాలను ఆడుకుంటున్నారా అంటూ చురకలంటించింది. ఇలా.. పరీక్షల విషయంలో ఎన్నిసార్లు నిర్లక్ష్యం వహిస్తారంటూ మండిపడింది. నిబంధనలు సరిగ్గా అమలు చేయాల్సిన మీరే.. వాటిని ఉల్లంఘిస్తే ఎలా అంటూ ఉన్నత న్యాయస్థానం తీవ్ర అసహనం వ్యక్తం చేసింది.

ప్రస్తుతం మార్కెట్‌లో ఉద్యోగాలు రాక చాలామంది యువకులు ఆత్మహత్యలు చేసుకుంటున్నారని ఉన్నత న్యాయస్థానం ఆందోళన వ్యక్తం చేసింది. రాజ్యాంగబద్ధ వ్యవస్థ అయ్యి ఉండి.. పరీక్షల నిర్వహణలో టీఎస్‌పీఎస్సీ పదేపదే విఫలమవుతోందని న్యాయస్థానం మండిపడింది. మొదటిసారి పేపర్ లీకేజీ జరిగిందన్న కారణంతో పరీక్ష రద్దు చేశారని గుర్తు చేసిన ధర్మాసనం.. అంతపెద్ద విషయం జరిగిన తర్వాత రెండోసారి నిర్వహించే సమయంలో మరింత జాగ్రత్తగా ఉండాల్సింది పోయి.. మీరు ప్రకటించిన నోటిఫికేషన్‌ను మీరే నిబంధనలు పాటించకుండా నిర్లక్ష్యం వహించటం ఏంటని టీఎస్పీఎస్సీపై హైకోర్టు తీవ్ర ఆగ్రహం వ్యక్తం చేసింది.

ఇంతకూ గ్రూప్-1 ప్రిలిమ్స్ పరీక్షలో బయోమెట్రిక్ పెట్టకపోవడానికి కారణాలు ఏంటని టీఎస్పీఎస్సీని ధర్మాసనం ప్రశ్నించింది. కాగా.. సాంకేతిక లోపం, సమయం లేకపోవటం వల్ల పెట్టలేదని అధికారులు పేర్కొన్నారు. కానిస్టేబుల్ పరీక్షలు, మిగతా అన్ని పరీక్షల్లో అమలు సాధ్యమవుతున్నప్పుడు ఈ పరీక్షలో అమలు చేయటానికి ఇబ్బంది ఏంటని పిటిషనర్ తరఫు న్యాయవాదులు అభ్యంతరం వ్యక్తం చేశారు. దీంతో.. గ్రూప్-1 పరీక్షలో బయోమెట్రిక్ అమలు చేయకపోవటానికి కారణాలు.. అలా అమలు చేసిన మిగితా పరీక్షలు వివరాలు సమర్పించాలని ధర్మాసనం ఆదేశింది. నిరుద్యోగుల్లో విశ్వసనీయత పెంచాల్సిన బాధ్యత బోర్డుపై ఉందని తెలిపింది. టీఎస్పీఎస్సీ బోర్డు నిర్లక్ష్యంతో అభ్యర్థుల భవిష్యతు, క్రెడిబిలిటీ ప్రశ్నార్థకంగా మారిందని హైకోర్టు వ్యాఖ్యానించింది.