byసూర్య | Mon, Dec 05, 2022, 11:41 PM

ప్రధాని నరేంద్ర మోదీ చొరవతో తెలంగాణలో జాతీయ రహదారులు అద్భుతంగా రూపుదిద్దుకున్నాయని కేంద్రమంత్రి కిషన్ రెడ్డి చెప్పారు జాతీయ రహదారుల ద్వారా తెలంగాణ రూపు రేఖలు మారుతున్నాయని ఆయన అన్నారు.  1947 నుంచి 2014 వరకు తెలంగాణలో జాతీయ రహదారుల పొడవు 2,500 కి. మీ. లు కాగా, గడచిన 8 ఏళ్లలోనే కొత్తగా మరో 2,500 కి. మీ.ల జాతీయ రహదారులను నిర్మించినట్లు తెలిపారు. దీంతో రాష్ట్రంలో జాతీయ రహదారుల పొడవును 5,000 కి. మీ. లకు పెంచినట్లు కిషన్ రెడ్డి వెల్లడించారు.

తెలంగాణ రాష్ట్రంలోని నాలుగు దిశల నుంచి హైదరాబాద్‌కు చేరుకునే ప్రజలు సులభంగా నగరంలోకి ప్రవేశించటానికి రీజనల్ రింగ్ రోడ్డు నిర్మిస్తున్నామన్నారు. 350 కి.మీ.ల పొడవున నిర్మించనున్న రీజినల్ రింగ్ రోడ్డు నార్త్ భాగాన్ని ఇప్పటికే భారతమాల ప్రాజెక్టులో చేర్చామని చెప్పారు. దాదాపు రూ.20,000 కోట్లతో నిర్మించనున్న సౌత్ భాగానికి సంబంధించిన డీపీఆర్ పనులు త్వరలోనే పూర్తి కానున్నాయని ఆయన వెల్లడించారు. జాతీయ రహదారులతో తెలంగామ రూపురేఖలు మార్చి.., తెలంగాణ అభివృద్ధిలో ప్రధాని మోదీ నేతృత్వంలోని కేంద్ర ప్రభుత్వం కీలక పాత్ర పోషిస్తుందని ఆయన చెప్పారు.

తెలంగాణలో ఎన్నో రహదారులను 4, 6 వరుసలుగా విస్తరించి రాష్ట్రంలో రహదారుల సామర్థ్యాన్ని గణనీయంగా మెరుగుపరిచామని కిషన్ రెడ్డి తెలిపారు. దీంతో తెలంగాణ రాష్ట్రంలో సామాజిక అభివృద్ధికి, ఆర్థికాభివృద్ధికి తలుపులు తెరుచుకున్నాయన్నారు. తెలంగాణతో పాటు దేశంలోని అన్ని రాష్ట్ర కేంద్రాలను, జిల్లాల కేంద్రాలను, ఈశాన్య రాష్ట్రాలతో సహా నార్త్ నుంచి సౌత్ వరకు, ఈస్ట్ నుంచి వెస్ట్ వరకు ఉన్న అన్ని ప్రధాన పట్టణాలను కలుపుతూ మొత్తం దేశాన్ని ఏకం చేస్తూ అత్యంత వేగంగా జాతీయ రహదారులను నిర్మిస్తున్నట్లు కిషన్ రెడ్డి వెల్లడించారు.