byసూర్య | Mon, Oct 21, 2024, 10:11 PM

ఇలాంటి స్నేక్ రెస్క్యూ ఆపరేషన్ ఇప్పటివరకూ మీరు చూసుండరు. హైదరాబాద్‌లోని ఉస్మాన్ సాగర్ రిజర్వాయర్ (గండిపేట చెరువు) క్రస్ట్ గేటులో ఇరుక్కున్న 8 అడుగుల భారీ కొండచిలువను కాపాడేందుకు సాహసమే చేశారు స్నేక్ క్యాచర్. నడుముకి తాడు కట్టుకొని డ్యామ్ గేటు వద్దకు దిగి.. అందులో చిక్కుకున్న కొండచిలువను బయటికి తీశారు. ఒక చేత్తో ఆ భారీ పామును పట్టుకుని మరో చేత్తో డ్యామ్ పైకి రావడానికి ప్రయత్నించారు. ఒక మూగజీవాన్ని కాపాడటంలో ఆయనకున్న చిత్తశుద్ధి, ధైర్యానికి హ్యాట్సాఫ్ చెప్పాల్సిందే.

ఎగువన కురుస్తున్న భారీ వర్షాలతో కొన్ని రోజులుగా ఉస్మాన్ సాగర్ జలాశయానికి వరద నీరు భారీగా వచ్చి చేరుతోంది. ఉస్మాన్ సాగర్ గేట్లు కొంత మేర ఎత్తి నీటిని దిగువకు వదిలారు. అయితే, వరదల్లో ఎక్కడ నుంచి కొట్టుకొచ్చిందో తెలియదు గానీ.. ఓ భారీ కొండచిలువ.. జలాశయం క్రస్ట్ గేటులో ఇరుక్కుపోయింది. ఆదివారం (అక్టోబర్ 20) మధ్యాహ్నం క్రస్ట్ గేటులో ఇరుక్కున్న కొండచిలువను గమనించిన హైదరాబాద్ మెట్రోపాలిటన్ వాటర్ సప్లయ్ అండ్ సెవరేజ్ బోర్డు సిబ్బంది.. ‘ఫ్రెండ్స్ ఆఫ్ స్నేక్స్ సొసైటీ‌’కి సమాచారం అందించారు.

ఫ్రెండ్స్ ఆఫ్ స్నేక్స్ సొసైటీ సభ్యుడు దాకరపు వర ప్రసాద్ వెంటనే స్పందించారు. తన టీమ్‌తో ఉస్మాన్ సాగర్ డ్యామ్ వద్దకు చేరుకున్నారు. క్రస్ట్ గేటు లోపల ఇరుక్కున్న కొండచిలువ కదలలేకపోతున్నట్లు వరప్రసాద్ గమనించారు. పామును బయటికి తీయడం పెద్ద టాస్కేనని ఆయనకి అర్థమైంది. అయినా, ఏమాత్రం వెనుకడుగు వేయలేదు.

తన నడుముకి తాడు కట్టుకుని డ్యామ్ పైనుంచి గేటు వద్దకు దిగారు వరప్రసాద్. కొండచిలువ ఉన్న చోటుకి వెళ్లి జాగ్రత్తగా దాని తలను నొక్కి పట్టుకున్నారు. కష్టపడి కొండచిలువను బయటికి లాగారు. అయితే, ఆ కొండచిలువ వరప్రసాద్ చేతిని చుట్టేసింది. సుమారు 20 కేజీల బరువున్న కొండచిలువ ఆయన చేతిని బలంగా చుట్టేసినా వరప్రసాద్ భయపడలేదు. ఒక చేతితో ఆ భారీ సర్పాన్ని మోస్తూ, మరో చేయి సాయంతో క్రస్ట్ గేటు ఒక చివరి నుంచి మరో చివరికి చేరుకున్నారు. అయితే, ఇక్కడే ఆయనకు అసలైన పరీక్ష ఎదురైంది.

కొండచిలువను సంచిలో వేసి.. రోప్ సాయంతో డ్యామ్ ఎక్కుదామని వరప్రసాద్ భావించారు. ఆయన టీమ్ మెంబర్స్ ఒక సంచిని డ్యామ్ పైనుంచి అందించారు. అయితే, క్రస్ట్ గేటు వద్ద నిలబడటానికే సరిగా అవకాశం లేదు. అలాంటిది.. 20 కేజీల బరువు ఉన్న పామును ఒక్క చేయి సాయంతో సంచిలో వేయాలంటే చాలా కష్టం. అందుకే వరప్రసాద్ ఆ పామును సంచిలో వేయలేకపోయారు. దీంతో పామును చేత్తో పట్టుకునే డ్యామ్ పైకి రావాలని నిర్ణయించుకున్నారు. పైకి ఎక్కడానికి ప్రయత్నిస్తున్న క్రమంలో ఆయన చేతిలో ఉన్న పాము, సంచి కాస్త జారిపోయి డ్యామ్‌లో పడిపోయాయి.

కొండచిలువ క్రస్ట్ గేటుకు అవతలి వైపు పడిపోవడంతో నీటిలో పాక్కుంటూ బయటకి వచ్చింది. ఆ తర్వాత దాన్ని వరప్రసాద్ సంచిలో బంధించారు. రెస్క్యూ చేసిన కొండచిలువను సురక్షితంగా నెహ్రూ జూ అధికారులకు అందజేశారు. వరప్రసాద్ డేరింగ్ రెస్క్యూ ఆపరేషన్‌ను ప్రత్యక్షంగా చూసినవారు ఆయనపై ప్రశంసల వర్షం కురిపించారు. ఆయన ధైర్యానికి హ్యాట్సాఫ్ చెప్పారు.