byసూర్య | Mon, Sep 30, 2024, 07:33 PM

రెండు రోజులైతే.. స్కూల్‌కు దసరా సెలవులు. ఈరోజు స్కూల్‌లో బతుకమ్మ పండుగ సెలెబ్రేషన్స్. పిల్లలంతా కొత్త డ్రెస్సులు వేసుకుని ఎంతో సంతోషంగా స్కూల్‌కి వచ్చారు. అందరిలాగే.. ఆ చిన్నారి కూడా పట్టు పరికిణీ వేసుకుని.. ఎంతో సంబురంగా స్కూల్‌కి వచ్చింది. "ఈరోజు స్కూల్‌లో బతుకమ్మ సెలెబ్రెషన్స్ మమ్మీ.. మంచి డ్రెస్సు వేసుకుని రమ్మంది మా మిస్." అని చెప్తే ఆ తల్లి ఎంతో మురిసిపోతూ.. పండుగ కోసమని కుట్టించిన పట్టు పరికిణి వేసి.. బుట్టబొమ్మలా తయారు చేసింది. "స్కూల్‌లో అందిరితో కలిసి మంచిగా బతుకమ్మ ఆడుకో.. వచ్చిన తర్వాత స్కూల్‌లో ఏంఏం చేశారో మొత్తం చెప్పాలి.." అంటూ ప్రేమగా ముచ్చట్లు చెప్తూ.. తనకు ఇష్టమైన టిఫిన్ చేసి.. బాక్స్ పెట్టి పంపించింది.

ఆ బుట్టబొమ్మను చూసి.. మురిసిపోయిన ఆ తల్లి సంతోషం ఎక్కువసేపు నిలవలేదు. ఎంతో అందంగా తయారు చేసి తన కళ్లల్లో నింపుకున్న కూతురి రూపం.. కాసేపటికి ఛిద్రమైపోయింది. స్కూల్‌కు ఎంతో జాగ్రత్తగా తీసుకెళ్లిన ఆ స్కూల్ వ్యానే.. ఆ చిన్నారిని చిదిమేసింది. ఎంతో సంబురంగా బతుకమ్మ ఆడుకోవానుకున్న ఆ గ్రౌండ్‌లోనే ఆ చిన్నారి విగతజీవిగా మారిపోయింది. గుండెలు బరువెక్కించే.. ఈ విషాదకర ఘటన రాజన్న సిరిసిల్ల జిల్లా ముస్తాబాద్ మండల కేంద్రంలో జరిగింది.

నామాపూర్‌ గ్రామానికి చెందిన సల్కం భూమయ్య- వెంకటవ్వ దంపతులు కుమార్తె మనోజ్ఞ (3).. ముస్తాబాద్‌లోని ఓ ప్రైవేటు ఇంగ్లీష్ మీడియం స్కూల్‌లో.. నర్సరీ చదువుతోంది. రోజూలాగే ఈరోజు కూడా స్కూల్ వ్యాన్‌లో పాఠశాలకు వచ్చింది. అయితే.. రెండు రోజుల్లో దసరా సెలవులు ఇవ్వనున్న నేపథ్యంలో.. ఈరోజు పాఠశాలలో బతుకమ్మ వేడుకలు నిర్వహించాలని యాజమాన్యం నిర్ణయించింది. ఈ మేరకు పిల్లలంతా కొత్త డ్రెస్సులు వేసుకుని సంబురంగా స్కూల్‌కి వచ్చారు. మనోజ్ఞ కూడా అందరిలాగే కొత్త డ్రెస్ వేసుకుని సంతోషంగా వ్యాన్‌లో స్కూల్‌కి వచ్చింది.

బస్సు దిగి అందరూ పిల్లలు వెళ్లిపోగా.. మనోజ్ఞ ఎందుకో అక్కడే ఆగిపోయింది. అక్కడే ఉన్న మనోజ్ఞను గమనించిన డ్రైవర్.. బస్సును రివర్స్ తీసుకున్నాడు. ఆ చిన్నారిని బస్సు ఢీకొనగా కిందపడిపోయింది. దీంతో.. బస్సు చక్రం ఆ చిన్నారి తలపైకి ఎక్కింది. ప్రమాదాన్ని గుర్తించేలోపే.. ఆ చిన్నారి తల ఛిద్రమైపోయింది. తల పూర్తిగా పగిలిపోవటంతో.. ఆ చిన్నారి అక్కడికక్కడే ప్రాణాలు వదిలింది. క్లాస్‌ రూంలో తన స్నేహితులతో సంబురంగా ఉండాల్సిన ఆ చిన్నారి.. పట్టులంగాతో, చేతిలో టిఫిన్ బాక్స్‌, జబ్బకు బ్యాగ్‌తో.. బతుకమ్మ ఆడాల్సిన గ్రౌండ్‌లోనే విగతజీవిగా పడి ఉన్న ఆ దృశ్యం.. అందరి గుండెలను తడి చేసింది.

ఈ విషయం ఆ చిన్నారి తల్లికి తెలియటంతో.. ఆమె రోధనలు మిన్నంటాయి. పట్టు పరికిణీలో విగతజీవిగా పడిపోయి ఉన్న ఆ చిన్నారిని చూసి.. గుండెలు బాదుకుంది. "నా బిడ్డను ఇప్పుడే తయారు చేసి పంపించాను.. అప్పడే ఇలా జరగటమేంటి. బతుకమ్మ ఆడుకుంటా మమ్మీ అని చెప్పి వచ్చిన నా బిడ్డను ఇలా చంపేశారేంటీ.." అంటూ గుండెలవిసేలా రోధించటం అక్కడున్న వాళ్లందరినీ కన్నీళ్లు పెట్టించింది. అయితే.. పాప తండ్రి.. ఉపాధి నిమిత్తం గల్ఫ్‌‌లో ఉండటం మరింత కలిచి వేస్తోంది.

ఈ విషయం తెలుసుకున్న స్థానికులు పాఠశాలకు చేరుకుని ఆందోళన చేపట్టారు. స్కూల్ యజమాన్యం నిర్లక్ష్యం వల్లే పాప ప్రాణాలు కోల్పోయిందంటూ ఆందోళనకు దిగారు. గేటు లోపల ఇంత నిర్లక్ష్యంగా వ్యవహరిస్తున్న స్కూల్‌ను వెంటనే సీజ్ చేయాలంటూ పాప బంధువుల డిమాండ్ చేస్తున్నారు.

సమాచారం అందుకున్న పోలీసులు.. ఘటనా స్థలికి చేరుకోగా.. ఆందోళనకారులకు పోలీసులకు మధ్య తీవ్ర వాగ్వాదం జరిగింది. వాళ్లందరికి నచ్చజెప్పి.. పాప మృతదేహాన్ని పోస్ట్ మార్టం నిమిత్తం సిరిసిల్ల ఏరియా ఆసుపత్రికి తరలించారు. వ్యాన్ డ్రైవర్‌తో పాటు స్కూల్ యాజమాన్యంపై కేసు నమోదు చేసుకున్న పోలీసులు దర్యాప్తు చేస్తున్నారు.