byసూర్య | Mon, May 27, 2024, 07:55 PM

తెలంగాణలో గతకొద్ది రోజులుగా భిన్న వాతావరణం నెలకొని ఉంది. రెండు వారాలుగా రాష్ట్రంలో వర్షాలు కురుస్తున్నాయి. ఎండల తీవ్రత తగ్గి చల్లని వాతావరణం నెలకొని ఉంది. అయితే నేటి నుంచి రాష్ట్రంలో ఎండ గాలుల తీవ్రత పెరిగే ఛాన్స్ ఉందని వాతావరణ కేంద్రం అధికారులు చెబుతున్నారు. తీవ్ర వడగాలులు వీస్తాయని అంటున్నారు. అయితే సాయంత్రానికి సీన్ రివర్స్ అయ్యే ఛాన్స్ ఉందని వెల్లడిస్తున్నారు.

మధ్యాహ్నం తీవ్ర ఎండలు కాసినా.. సాయంత్రం చల్లని వాతావరణంతో పాటు పలు చోట్ల వర్షాలు కురుస్తాయని అంటున్నారు. నైరుతి రుతుపవనాలు వచ్చే వరకు ఇదే పరిస్థితి ఉంటుందని తెలిపారు. ఇక బంగాళాఖాతంలో ఏర్పడిన రెమాల్‌ తుఫాన్ ఆదివారం (మే 26) ఉదయం తీవ్ర తుఫాన్‌గా బలపడింది. ఈ తుఫాన్‌ ఉత్తర దిశగా పయనించి ఆదివారం అర్ధరాత్రి దాటాక.. బంగ్లాదేశ్, పశ్చిమ బెంగాల్‌ సరిహద్దుల్లో తీరం దాటినట్లు వాతావరణశాఖ అధికారులు వెల్లడించారు. సోమవారానికి (మే 27) ఇది తుఫాన్‌గా బలహీనపడుతుందంటున్నారు.

నిన్న తెలంగాణలోని పలు జిల్లాల్లో గాలివాన బీభత్సం సృష్టించింది. ఆకాల వర్షాల ధాటికి వేర్వేరు ప్రమాదాల్లో 13 మంది ప్రాణాలు కోల్పోయారు. నాగర్ కర్నూల్ జిల్లాలోనే ఏడుగురు చనిపోగా.. హైదరాబాద్‌లో నలుగురు, మెదక్‌లో ఇద్దర్ని మృత్యువు కబళించింది. ఈదురు గాలుల నేపథ్యంలో జాగ్రత్తగా ఉండాలని వాతావరణశాఖ అధికారులు హెచ్చరిస్తున్నారు. చెట్ల కింద, నిర్మాణంలోని భవనాలకు సమీపంలో ఉండొద్దని సూచిస్తున్నారు.