byసూర్య | Mon, May 27, 2024, 07:29 PM

పౌరసరఫరాల శాఖ మంత్రి ఉత్తమ్ కుమార్ రెడ్డి.. బీజేపీ ఎమ్మెల్యే, శాసనసభ పక్ష నేత ఏలేటి మహేశ్వర్ రెడ్డిల మధ్య మాటాల యుద్దం నడుస్తూనే ఉంది. రాష్ట్రంలోని పౌర సరఫరాల శాఖలో రూ.1000 కోట్లు అవినీతి జరిగిందంటూ ఏలేటి మహేశ్వర్ రెడ్డి ఆరోపణలు గుప్పించిన సంగతి తెలిసిందే. ఆయన ఆరోపణలపై స్పందించిన మంత్రి ఉత్తమ్.. ఏలేటిపై తీవ్రస్థాయిలో ఫైర్ అయ్యారు. మహేశ్వర్‌ రెడ్డి పచ్చి అబద్ధాలు చెబుతున్నాడని మండిపడ్డారు. ధాన్యం కొనుగోలు అంటే.. డబ్బులిచ్చి ఫ్లోర్ లీడర్ పదవి కొనుక్కున్నంత ఈజీ కాదని సెటైర్లు పేల్చారు.

ఉత్తమ్ కామెంట్లపై ఏలేటి తాజాగా మరోసారి స్పందించారు. మంత్రి కామెంట్లకు కౌంటర్ ఇచ్చారు. తన పొలిటికల్ కెరీర్‌లో ఎవరినీ వ్యక్తిగతంగా విమర్శించలేదని అన్నారు. అయినా బెదరింపులకు తాను ఏ మాత్రం భయపడేది లేదని స్పష్టం చేశారు. మంత్రి ఉత్తమ్ కుమార్ నిర్వహిస్తున్న శాఖలో జరిగిన అవినీతిని మాత్రమే బయటపెట్టానని అన్నారు. ఆయన వ్యక్తిగతంగా మాట్లాడితే.. తాను సహించబోనని ఆగ్రహం వ్యక్తం చేశారు. తాను గతంలో కాంగ్రెస్ పార్టీలో ఉన్నా.. అదే స్పీడ్‌తో పని చేశానని.. ఇప్పుడు బీజేపీ శాసనసభా పక్ష నేతగా అదే రీతిలో పని చేస్తున్నానని చెప్పుకొచ్చారు.

తెలంగాణలో జరుగుతున్న అవినీతిపైనే తన పోరాటమని చెప్పారు. ఎవరిపైనో వ్యక్తిగతంగా మాట్లాడాల్సిన అవసరం తనకు లేదని అన్నారు. మంత్రి శాఖలో జరిగిన అవినీతి గురించి మాట్లాడితే పర్సనల్ తీసుకోవద్దని సూచించారు. ఒకవేళ తాను కూడా వ్యక్తిగతంగా తీసుకుంటే ఉత్తమ్ చాలా నష్టపోయే ప్రమాదం ఉందని హెచ్చరించారు. తన వద్ద పూర్తి ఆధారాలు ఉన్నాయని.. సివిల్ సప్లయ్ శాఖలో అవకతవకలపై సీబీఐ విచారణ జరపాలని డిమాండ్ చేశారు. ఇదే విషయంపై కేంద్రానికి త్వరలోనే ఫిర్యాదు చేస్తామని ఏలేటి మహేశ్వర్ రెడ్డి స్పష్టం చేశారు.