byసూర్య | Sun, Apr 14, 2024, 04:33 PM

నల్గొండలోని మధ్యతరగతి రైతు కుటుంబం నుంచి వచ్చి.. తాను స్థాపించిన 'మిస్టర్ టీ' బ్రాండ్‌నే ఇంటిపేరుగా మార్చుకుని.. యువ పారిశ్రామికవేత్తగా ఎదిగిన కుడుదుల నవీన్ రెడ్డి.. ఇటీవలే కొత్త ప్రయాణం మొదలు పెట్టారు. తెలుగు రాష్ట్రాల్లో సంచలనం సృష్టించిన ఆదిభట్ల ఘటన నుంచి తేరుకుని.. అటు పడిపోయిన తన బిజినెస్‌ను మళ్లీ పట్టాలెక్కించటమే కాకుండా తన పర్సనల్ లైఫ్‌లో కూడా కొత్త ఛాప్టర్ స్టార్ట్ చేశాడు. బుల్లితెరపై నవ్వులు పూయిస్తున్న శ్రీదేవి ఎర్రోజును ఇటీవలే పెళ్లి చేసుకుని ఓ ఇంటివాడయ్యాడు నవీన్ రెడ్డి. మరోవైపు.. మొన్నటి వరకు ఉన్న మిస్టర్ టీ అనే ఒకే బ్రాండ్‌‌‌‌కు తోడు మరో 20కి పైగా కొత్త బ్రాండ్స్‌ తీసుకొచ్చాడు. అందులో మిస్టర్ ఇరానీ అనే బ్రాండ్‌ ఇప్పుడు సక్సెస్‌ఫుల్‌గా రన్ అవుతూ.. పెద్ద ఎత్తున ప్రాంచైజీలు కూడా ఏర్పాటు చేసుకుంటున్నారు.

ఇలా.. మొత్తంగా 5 రాష్ట్రాల్లో మిస్టర్ టీ ప్రాంచైజీలతో పాటు మిస్టర్ ఇరానీ ప్రాంచైజీలు కూడా పెట్టి.. కోట్లలో టర్న్‌‌ఓవర్ సాధిస్తూ.. చిన్న వయసులో సక్సెస్ ఫుల్ పారిశ్రామిక వేత్తగా ఎదిగిన నవీన్ రెడ్డి.. ఇప్పుడు తన జర్నీలో మరో కీలక అడుగు వేయబోతున్నట్టు.. "సమయం తెలుగు"కు ఇచ్చిన ఇంటర్వ్యూలో తెలిపారు. త్వరలోనే.. రాజకీయాల్లోకి కూడా ఎంట్రీ ఇచ్చే ఆలోచన ఉందని నవీన్ రెడ్డి వెల్లడించారు.

అయితే.. ముందు నుంచి మార్కెటింగ్ ఫీల్డ్‌లో ఉన్న నవీన్ రెడ్డి.. కేవలం తన బిజినెస్ మాత్రమే చూసుకోకుండా.. తన అనుభవంతో యువత, ఔత్సాహికుల కోసం బిజినెస్ సెమినార్లు నిర్వహిస్తూ.. మెలకువలు, సలహాలు, సూచనలు, మోటివేషన్ ఇస్తూ.. తనకంటూ ఓ ఫాలోయింగ్ ఏర్పర్చుకున్నాడు. మరోవైపు.. సోషల్ మీడియాలో కూడా మంచి ఫాలోయింగే ఉంది. సోషల్ మీడియాలో పోస్ట్ చేసే రీల్స్‌ చూసినా.. ఎటు వెళ్లినా అతని చుట్టూ ఉండే జనాలను చూసినా.. తన ఆలోచనలు విన్నా.. తనలో ఎక్కడో లీడర్‌షిప్ క్వాలిటీస్ కనిపిస్తూ ఉంటాయి. ఇదే ప్రశ్న నవీన్ రెడ్డిని అడిగినప్పుడు.. రాజకీయాల్లోకి రావాలని తనకు కూడా ఓ ఆలోచన ఉందని మనసులో మాట వెల్లడించాడు.

జీవితంలో.. ఎన్నో ఫేజ్‌లు వస్తుంటాయని.. చిన్నతనంలో బాగా చదివి మంచి జాబ్ తెచ్చుకోలానే మైండ్ సెట్‌తో ఉన్నానని.. ఒక దశకు వచ్చాక బిజినెస్‌పైన ఇంట్రెస్ట్‌తో ఇప్పుడు ఈ స్థాయిలో ఉన్నానని.. ఇక ముందు ఎలా ఉండబోతోందన్నది చూడాలని చెప్పుకొచ్చారు. ఇన్ని రోజులు బిజినెస్ మీద మాత్రమే దృష్టి పెట్టానని.. ఇక రాజకీయాల్లోకి కూడా రావాలన్న ఆలోచన చేస్తున్నట్టు తెలిపారు. అయితే.. ఇప్పుడే కాదని మరో మూడు నాలుగేళ్లు పడుతుందన్నారు. అయితే.. తమ ఫ్యామిలీ అంతా ముందు నుంచి కాంగ్రెస్ పార్టీకి మద్దతుగా ఉంటూ వస్తోందని.. తాను కూడా రాజకీయాల్లోకి వస్తే.. హస్తం పార్టీతోనే గ్రాండ్ ఎంట్రీ ఇస్తానంటూ చెప్పుకొచ్చాడు నవీన్ రెడ్డి.

మరోవైపు.. తనకు సినిమాలపై కూడా చాలా ఇంట్రెస్ట్ ఉందని.. ఆసక్తికర విషయాన్ని బయటపెట్టాడు నవీన్ రెడ్డి. తన బ్రాండ్ ఏర్పాటు చేసే విషయంలోనూ, ఆ బ్రాండ్‌ను జనాల్లోకి తీసుకెళ్లే విషయంలోనూ.. లోగో దగ్గరి నుంచి మార్కెటింగ్ వరకు చాలా క్రియేటివ్‌గా ఆలోచించే నవీన్ రెడ్డి.. ఇప్పుడు ఏకంగా సినిమాల్లోకి ఎంట్రీ ఇచ్చే ఆలోచన కూడా చేస్తున్నట్టు వెల్లడించాడు. అయితే.. యాక్టింగ్ జోలికి మాత్రం వెళ్లే అవకాశం లేదని.. ఎలాగూ డబ్బులున్నాయి కాబట్టి, తన భార్య కూడా నటి కాబట్టి ప్రొడ్యూసర్ అవ్వటం పెద్ద మ్యాటరేమీ కాదు కానీ.. నవీన్ రెడ్డికి మెగా ఫోన్ పట్టుకుని యాక్షన్, కట్ చెప్పాలని ఉందంటూ తన కోరికను బయటపెట్టాడు. ఇది కూడా తన జర్నీలో టైం వచ్చినప్పుడు జరుగుతుందని.. దానికి కూడా కొంచెం సమయం పడుతుందని చెప్పుకొచ్చాడు నవీన్ రెడ్డి.

ప్రస్తుతం సక్సెస్ ఫుల్ బిజినెస్‌ మ్యాన్‌గా ఎదిగి.. ప్రత్యక్షంగానూ, పరోక్షంగానూ వందల మందికి ఉపాధి కల్పిస్తున్న నవీన్ రెడ్డి.. త్వరలోనే రాజకీయ నాయకుడిగా, సినిమా దర్శకుడిగా మారే అవకాశాలు గట్టిగానే కన్పిస్తున్నాయి. ఇప్పుడైతే తెలంగాణలో అసెంబ్లీ ఎన్నికలైపోయి.. ఎంపీ ఎన్నికలు జరుగుతున్నాయి. కాగా.. నవీన రెడ్డి చెప్పిన ప్రకారం మరో మూడు నాలుగు సంవత్సరాలంటే.. మళ్లీ వచ్చే అసెంబ్లీ ఎన్నికలకు నవీన్ రెడ్డి ఎంట్రీ ఉండే అవకాశం ఉంది. అయితే.. పొలిటికల్ లీడర్‌, డైరెక్టర్.. ఇందులో ఏది ముందు అనేది.. నవీన్ రెడ్డే చెప్పాలి మరి.