byసూర్య | Fri, Mar 01, 2024, 08:03 PM

హైదరాబాద్‌లో ఇండియన్ ఎయిర్ ఫోర్స్‌కు చెందిన విమానం టెన్షన్ పెట్టింది. విమానంలో సాంకేతిక సమస్య తలెత్తడంతో గంటకు పైగానే గాల్లో చక్కర్లు కొట్టింది. చివరి ఓ అద్భుతం జరిగినట్టుగానే.. సినిమా రేంజ్‌లో ల్యాండింగ్ అయ్యింది. ఈ క్రమంలో ఎవ్వరికీ ఎలాంటి ప్రాణహాని కానీ.. విమానానికి కానీ ఎలాంటి ప్రమాదం జరగకపోవటంతో.. అందరూ ఊపిరిపీల్చుకున్నారు. అయితే.. ఈమధ్యలో సినిమాల్లో చూపించినట్టుగా పెద్ద ఆపరేషనే నడిచింది.

ఇండియన్ ఏయిర్ ఫోర్స్‌కు సంబంధించిన శిక్షణ విమానం.. పైలెట్లతో సహా 12 మందితో టేకాఫ్ కాగా.. గాల్లో ఉండగా సాంకేతిక సమస్య తలెత్తింది. ఫలితంగా.. హైడ్రాలిక్ వీల్స్ ఓపెన్ కాలేదు. గాల్లో ఉండగానే ఈ విషయాన్ని గుర్తించిన పైలెట్.. వెంటనే దగ్గరిలో ఉన్న బేగంపేట ఎయిర్ బేస్‌కు సమాచారం అందిచగా అక్కడ ల్యాండింగ్‌కు అనుకూలంగా లేదని అధికారులు చెప్పారు. వెంటనే హకీంపేట ఎయిర్ బేస్‌కు సమాచారమివ్వగా.. అక్కడి నుంచి కూడా అదే సమాధానం రావటంతో.. టెన్షన్ వాతావరణం నెలకొంది.

ఉన్నతాధికారులు రంగంలోకి దిగి.. పరిస్థితిపై సమీక్షించారు. హైడ్రాలిక్ వీల్స్ ఓపెన్ కాకుండా ల్యాండింగ్ చేస్తే.. విమానం క్రాష్ అయ్యే ఛాన్స్ ఉందని.. అప్పటికే అందులో 12 మంది ఉండగా వారి ప్రాణాలకే ప్రమాదమని భావించారు. అయితే.. విమానంలో ఉన్న ఇంధనం పూర్తిగా అయిపోయేంత వరకు గాల్లోనే చక్కర్లు కొట్టాలని పైలెట్‌కు సూచించారు. ఎమెర్జెన్సీ ల్యాండింగ్‌కు అవసరమయ్యే ఇంధనం మాత్రమే ఉన్నప్పుడు ల్యాండ్ చేయ్యాలని ఇన్ స్ట్రక్షన్స్ ఇచ్చారు. అలా అయితేనే.. ల్యాండింగ్ సమయంలో క్రాష్ అయ్యే ఛాన్స్ తక్కువగా ఉంటుందని.. తెలిపారు. ఆ సూచనల ప్రకారం.. గంటకు పైగానే విమానాన్ని గాల్లో తిప్పాడు పైలెట్.

ఈ క్రమంలో.. విమానాన్ని బేగంపేటలో ల్యాండ్ చేయలా, హకీం పేటలో ల్యాండ్ చేయాలా అని అధికారులు చర్చలు జరిపారు. చివరికి బేగంపేట అయితే.. సేఫ్ అని భావించి ల్యాండింగ్‌కు అన్నీ సిద్ధం చేసుకున్నారు. ఒకవేళ ల్యాండింగ్ సమయంలో.. ప్రమాదం జరిగితే రక్షించడానికి ఫైరింజన్, అంబులెన్స్ లాంటి అన్ని జాగ్రత్తలతో సిద్ధంగా ఉన్నారు. ఈలోపు విమానం ల్యాండింగ్‌కు సమయమైంది. హాఫ్ వీల్ మీదే విమానాన్ని సేఫ్‌గా ల్యాండింగ్ చేశాడు పైలెట్. దీంతో.. ఎలాంటి ప్రమాదం జరగకుండా.. అందరూ సురక్షితంగా ల్యాండ్ అయ్యారు. దీంతో.. అందరూ ఊపిరి పీల్చుకున్నారు.