byసూర్య | Fri, Feb 23, 2024, 09:24 PM
హైదరాబాద్లో ఓ టీవీ యాంకర్ కిడ్నాప్ సర్వత్రా సంచలనంగా మారింది. ఓ మ్యాట్రిమోనీ సైట్లో సదరు టీవీ యాంకర్ ప్రొఫైల్ చూసి.. అతనిపై మనసు పారేసుకున్న యువతి.. ఎలాగైనా అతన్ని తనవాడిని చేసుకోవాలనుకుంది. అందుకోసం ఏకంగా ఆ యాంకర్ను కిడ్నాప్ చేసి గదిలో బంధించింది. అయితే.. ఆ యువకుడు ఎలాగోలా తప్పించుకుని పోలీసుల చెంతకు చేరగా.. ఈ విషయం వెలుగు చూసింది. అయితే.. ఈ ఎపిసోడ్ అంతా చూస్తుంటే.. ఆ యువతి కార్తీకదీపం సీరియల్లో ఉంటే మోనిత క్యారెక్టర్ను గుర్తుకు తెస్తోంది కదూ. నిజంగా.. కార్తీక దీపంలో డాక్టర్ బాబు తమ్ముడు యాంకర్గా ఉండి ఉంటే.. ఆ మోనితకూ ఓ చెల్లి ఉంటే అచ్చం ఇలాగే జరిగుంటుందేమో అని ఒక్కసారి సీన్లు అలా ఫ్లాష్ అయినట్టు లేదూ. అయితే.. ఈ ఎపిసోడ్లో ఆ సీరియల్లోని ట్విస్టులను తలదన్నేలా.. ఓ మైండ్ బ్లాక్ ట్విస్ట్ కూడా ఉందండోయ్. అది తెలుసుకోవాలంటే.. ఈ ఎపిసోడ్ చూసేయ్యాలి.. అదేనండి చదివేయ్యాలి.
ఓపెన్ చేస్తే.. త్రిష్ణ అనే యువతి డిజిటల్ మార్కెటింగ్ చేస్తోంది. పలు స్టార్టప్ కంపెనీలకు ఎండీగా కూడా వ్యవహరిస్తోంది. కోట్లకు పడగెత్తిన త్రిష్ణ.. భారత్ మ్యాట్రిమోనీ వెబ్ సైట్లో.. ఒక టీవీ ఛానెల్ పని చేస్తున్న యాంకర్ ప్రణవ్ పేరుతో ఉన్న ప్రొఫైల్ను చూసింది. చూడగానే ఎంతగానో నచ్చి ప్రణవ్పైన మనసుపారేసుకుంది. ఎలాగైనా తననే పెళ్లి చేసుకోవాలని డిసైడ్ అయ్యింది. అయితే.. ఆ ఐడీలో ఉన్న నెంబర్లతో కాంటక్టులోకి వెళ్లింది. అయితే.. కొన్ని రోజులు బాగానే నడిచిన వ్యవహారం కాస్త.. కలుద్దామనేసరికి అటు నుంచి సరైన రెస్పాన్స్ రాలేదు.
ఎలాగైనా ప్రణవ్నే పెళ్లి చేసుకోవాలని నిర్ణయించుకున్న త్రిష్ణ.. తన పరపతి ఉపయోగించి ప్రణవ్ను కిడ్నాప్ చేయించి.. ఓ గదిలో బంధించింది. కాగా.. ఈ నెల 11న యాంకర్ ప్రణవ్ను కొందరు బంధించారని సిటీ పోలీసులకు ఫిర్యాదు వచ్చింది. అయితే.. తనకు ఏమీ అర్థంకాని ప్రణవ్.. ఎలాగోలా అక్కడి నుంచి తప్పించుకుని పోలీసులను చేరుకున్నాడు. పెళ్లి చేసుకొమ్మని తనను కిడ్నాప్ చేశారని జరిగిన విషయం చెప్పటంతో.. అసలేం జరిగిందని పోలీసులు దర్యాప్తు చేయగా.. అసలు విషయం బయటికి వచ్చింది.
ప్రణవ్ను కిడ్నాప్ చేయించిన నిందితురాలు త్రిష్ణను పోలీసులు ఉప్పల్లో అరెస్ట్ చేశారు. ఆమెను ఆరా తీయగా.. మ్యాట్రిమోనీలో ప్రణవ్ ఫొటోలు చూసి ఇష్టపడినట్టు.. పెళ్లి కోసమే తనను కిడ్నాప్ చేసినట్టు చెప్పుకొచ్చింది. అయితే.. పోలీసుల విచారణలో అసలు ఆ మ్యాట్రిమోనీ సైట్లో ఉన్న ఐడీ ప్రణవ్ది కాదని.. సైబర్ నేరగాళ్లు క్రియేట్ చేసిన ఫేక్ ప్రొఫైల్గా గుర్తించారు. దీంతో.. ఒక్కసారిగా అందరు అవాక్కయ్యారు. అయితే.. పెళ్లి కోసం ఒత్తిడి చేసి.. ఏకంగా కిడ్నాప్ వరకు వెళ్లిన త్రిష్ణను పోలీసులు అరెస్ట్ చేసి.. రిమాండ్కు తరలించారు.