byసూర్య | Sat, Dec 09, 2023, 08:14 PM

తెలంగాణ మాజీ సీఎం కేసీఆర్, ఆయన కుటుంబం, బంధువులతో పాటు ఆయనతో సన్నిహితంగా ఉన్న అధికారులెవ్వరూ.. దేశం విడిచి వెళ్లకుండా చర్యలు తీసుకోవాలని ప్రజా శాంతి అధ్యక్షుడు కేఏ పాల్ రేవంత్ రెడ్డి ప్రభుత్వానికి కీలక సూచనలు చేశారు. వెంటనే.. కేసీఆర్‌తో పాటు ఆయన ప్రియులందరి పాస్‌పోర్టులు సీజ్ చేసి.. ఆర్డర్స్ పాస్ చేయాలన్నారు. ఈ మేరకు కేఏ పాల్ ఓ వీడియోను విడుదల చేశారు. తెలంగాణ రాష్ట్రం లక్షల కోట్లు అప్పుల పాలు అయ్యిందని.. అందుకు కారణం కేసీఆర్ అండ్ కో అని కేఏ పాల్ ఆరోపించారు. తెలంగాణను నడపాలంటే సత్యం బయటకు రావాలని పాల్ అభిప్రాయపడ్డారు. దాని కోసం వెంటనే.. రాష్ట్రం చేసిన అప్పులపై ఇన్వెస్టిగేషన్ జరిపించాలని.. అంత వరకు ఎవరిని కూడా దేశం వదిలి బయటకు వెళ్లనీయకుండా చర్యలు తీసుకోవాలని సీఎం రేవంత్ రెడ్డికి సూచించారు. రిటైర్డ్, ప్రస్తుత ఐఏఎస్, ఐపీఎస్‌ అధికారులు.. సీఎం రేవంత్ రెడ్డికి సీఐడీకి సహకరించాలని పాల్ విజ్ఞప్తి చేశారు. అవసరమైతే.. కేంద్ర ప్రభుత్వం కూడా రేవంత్ రెడ్డికి సహాయం చేయాలని విజ్ఞప్తి చేశారు.

అయితే.. కేసీఆర్ కుటుంబంపై ముందు నుంచి అవినీతి ఆరోపణలు చేస్తున్న కేఏ పాల్.. బీఆర్ఎస్ ప్రత్యర్థి అయిన కాంగ్రెస్ ప్రభుత్వం రావటంతో విచారణ చేయాలని డిమాండ్ చేస్తున్నారు. కేసీఆర్ కుటుంబం మీద ముందు నుంచి తీవ్ర స్థాయిలో విమర్శలు చేసే రేవంత్ రెడ్డి ఇప్పుడు సీఎం కావటంతో.. ఆయన చేసిన అవినీతిపై విచారణ చేయటం పక్కా అని అందరూ ఊహిస్తున్నారు. ఇప్పటికే.. రేవంత్ రెడ్డి విద్యుత్ అధికారులతో వరుస రివ్యూలు నిర్వహిస్తుండగా.. అధికారులపై సీఎం అగ్రహం వ్యక్తం చేస్తున్నట్టు తెలుస్తోంది. ఇక కాళేశ్వరం ప్రాజెక్టు విషయంలో.. ఏకంగా లక్ష వేల కోట్ల అవినీతి చేశారన్న భారీ ఆరోపణలు ఎదుర్కొన్న విషయం తెలిసిందే. ఇలాంటి సమయంలో.. కేఏ పాల్ చేసిన డిమాండ్ ఇప్పుడు సర్వత్రా చర్చనీయాంశంగా మారుతోంది.