నా గుండెల్లో మీ స్థానం శాశ్వతం.. రేవంత్ రెడ్డి ఎమోషనల్ లెటర్

byసూర్య | Fri, Dec 08, 2023, 09:04 PM

తెలంగాణ సీఎం రేవంత్ మల్కాజిగిరి ప్రజలకు ఎమోషనల్ లెటర్ రాశారు. మల్కాజిగిరి ఎంపీగా ఉన్న రేవంత్ రెడ్డి.. ఇప్పుడు కొడంగల్ నుంచి ఎమ్మెల్యేగా గెలిచిన సంగతి తెలిసిందే. ఇప్పుడు సీఎంగా ప్రమాణ స్వీకారం చేయటంతో.. మల్కాజిగిరి ఎంపీ పదవికి రేవంత్ రెడ్డి రాజీనామా చేశారు. ఇవాళ ఢిల్లీ వెళ్లిన రేవంత్ రెడ్డి.. లోక్‌సభ స్పీకర్‌కు తన రాజీనామా లేఖను సమర్పించారు. ఈ నేపథ్యంలో మల్కాజిగిరి ప్రజలకు సీఎం రేవంత్ రెడ్డి బహిరంగ లేఖ రాశారు. తనను దేశానికి పరిచయం చేసింది మల్కాజిగిరి ప్రజలేనని రేవంత్ రెడ్డి చెప్పుకొచ్చారు. తాను ఎమ్మెల్యేగా ప్రాతినిధ్యం వహిస్తోన్న కొడంగల్ నియోజకవర్గంతో పాటు మల్కాజిగిరికి కూడా ప్రాధాన్యత ఇస్తానని రేవంత్ పేర్కొన్నారు. తనను ఎంపీగా గెలిపించిన మల్కాజిగిరి ప్రజలకు ప్రత్యేక ధన్యవాదాలు తెలిపారు రేవంత్ రెడ్డి. మల్కాజిగిరి ప్రజలకు రుణపడి ఉంటానని రేవంత్ రెడ్డి పేర్కొన్నారు.


"ఏ విశ్వాసంతో, ఏ అభిమానంతో నన్ను గెలిపించారో ఐదేళ్లు మీరు ఆశించిన ప్రశ్నించే గొంతుగా ప్రజల పక్షాన రాజీలేని పోరాటం చేశాను. విస్తృత బాధ్యతల నేపథ్యంలో వ్యక్తిగతంగా కొన్ని సార్లు అనుకున్నంత సమయం ఇవ్వలేకపోయి ఉండొచ్చు. అలాంటి సందర్భంలో నా పరిస్థితిని మీరు సహృదయంతో అర్థం చేసుకున్నారు. తల్లి తన బిడ్డను దేశ రక్షణ కోసం పంపినట్టు, నన్ను మీరు తెలంగాణ రక్షణ కోసం గెలిపించి పంపారు. ఇన్నాళ్లు ఆ బాధ్యతను త్రికరణశుద్ధిగా నిర్వర్తించానని భావిస్తున్నాను. మల్కాజిగిరి ప్రజలకు పేరు పేరునా ప్రత్యేక ధన్యవాదాలు. ఐదేళ్లే కాదు ఇక మీతో నా అనుబంధం.. నా గుండెల్లో మీ స్థానం శాశ్వతం. మల్కాజిగిరికి ఎప్పటికీ రుణపడి ఉంటాను. నాడు మీరు పోసిన ఊపిరి.. నా చివరి శ్వాస వరకు తెలంగాణ ఉజ్వల భవిత కోసం తపిస్తూనే ఉంటుంది." అంటూ రేవంత్ రెడ్డి తన లేఖలో రాసుకొచ్చారు.


2019లో జరిగిన లోక్‌సభ ఎన్నికల్లో మల్కాజిగిరి ఎంపీగా గెలిచిన రేవంత్ రెడ్డి.. ఇటీవల జరిగిన అసెంబ్లీ ఎన్నికల్లో కొడంగల్ నియోజకవర్గం నుంచి పోటీ చేసిన రేవంత్ రెడ్డి.. బీఆర్ఎస్ అభ్యర్థిపై ఘన విజయం సాధించారు. కాగా.. అధిష్ఠానం.. ఆయనను సీఎల్పీ నేతగా ఎన్నుకోవటంతో సీఎంగా బాధ్యతలు స్వీకరించారు. దీంతో.. తన లోక్‌సభ సభ్యత్వానికి రాజీనామా చేశారు. తన రాజీనామా పత్రాన్ని లోక్ సభ స్పీకర్ ఓం బిర్లాకు సమర్పించారు.


Latest News
 

ఇంటర్ విద్యార్థులకు గుడ్ న్యూస్.. 'నిమిషం నిబంధన' నుంచి ఉపశమనం Fri, Mar 01, 2024, 10:25 PM
వెలుగులోకి మరో స్కాం.. పిల్లలకు పంచే పాల స్కీంలో మహిళా అధికారి చేతివాటం Fri, Mar 01, 2024, 09:36 PM
నేటి నుంచి ‘ధరణి’ స్పెషల్ డ్రైవ్.. తాహసీల్దార్, ఆర్డీవోలకు అధికారాలు Fri, Mar 01, 2024, 09:32 PM
బీఆర్‌ఎస్‌ ‘మేడిగడ్డ’కు కౌంటర్.. ఛలో పాలమూరుకు కాంగ్రెస్ పిలుపు Fri, Mar 01, 2024, 09:26 PM
తెలంగాణ రైతులకు శుభవార్త.. కేంద్ర పథకంలో చేరిన రేవంత్ సర్కార్ Fri, Mar 01, 2024, 09:21 PM