byసూర్య | Fri, Dec 08, 2023, 07:32 PM

తెలంగాణ మాజీ ముఖ్యమంత్రి కేసీఆర్ ఆరోగ్యంపై హైదరాబాద్‌లోని యశోద ఆస్పత్రి వైద్యులు హెల్త్ బులిటెన్ విడుదల చేశారు. కేసీఆర్ ఆరోగ్యం నిలకడగా ఉందని తెలిపారు. బాత్‌రూమ్‌లో జారిపడటంతో ఆయనకు గాయమైందని పేర్కొన్నారు. సీటీ స్కాన్ సహా పలు పరీక్షలు నిర్వహించామని, ఆయన ఎడమ తుంటికి గాయమైందని, హిప్ రీప్లేస్‌మెంట్ సర్జరీ చేయాల్సి ఉందన్నారు. శస్త్ర చికిత్స తర్వాత మాజీ సీఎం కోలుకోడానికి 6-8 వారాలు పడుతుందని హెల్త్ బులిటెన్‌లో తెలియజేశారు. ఆర్ధోపెడీషియన్, అనెస్థీషియా, జనరల్ మెడిసిన్, పెయిన్ మెడిసిన్ సహా బహుళ విభాగాలకు చెందిన వైద్యుల బృందం కేసీఆర్ ఆరోగ్య స్థితిని పర్యవేక్షిస్తోందని చెప్పారు.

గురువారం రాత్రి కాలుజారి పడటంతో బీఆర్ఎస్ అధినేతకు గాయమైంది. దీంతో గురువారం అర్ధరాత్రి సోమాజిగూడ యశోద ఆస్పత్రిలో కేసీఆర్‌ను చేర్పించారు. మరోవైపు, మాజీ సీఎం కేసీఆర్ గాయపడిన విషయం తెలుసుకున్న ముఖ్యమంత్రి రేవంత్ రెడ్డి కీలక ఆదేశాలు జారీ చేశారు. ఆస్పత్రి వద్ద భద్రత పెంచాలని అధికారులను ఆదేశించారు. ఆయనకు మెరుగైన వైద్యం అందజేయాలని సూచించారు. అంతేకాదు, యశోద ఆస్పత్రికి ఆరోగ్య శాఖ కార్యదర్శిని పంపి.. ఆరోగ్యం గురించి తెలుసుకోవాలని అన్నారు. సీఎం ఆదేశాలతో అధికారులు ఆస్పత్రివద్ద భద్రత పెంచనున్నారు. అటు, కేసీఆర్‌కు గాయం కావడంపై ప్రధాని నరేంద్ర మోదీ స్పందించారు. తీవ్ర విచారం వ్యక్తం చేసిన ప్రధాని.. ఆయన పూర్తి ఆరోగ్యంతో త్వరగా కోలుకోవాలని ప్రార్థిస్తున్నట్లు చెప్పారు. ఈ మేరకు ప్రధాని ట్వీట్‌ చేశారు.

మరోవైపు, తన తండ్రి కేసీఆర్‌ ఆరోగ్యంపై ఆయన కుమార్తె, ఎమ్మెల్సీ కవిత సామాజిక మాధ్యమం ట్విట్టర్ వేదికగా స్పందించారు. కేసీఆర్‌కు స్వల్ప గాయమైందని, ప్రస్తుతం వైద్యుల పర్యవేక్షణలో ఉన్నారని తెలిపారు. ‘ఆయన త్వరలోనే కోలుకుంటారని. కేసీఆర్‌పై ప్రజల ప్రేమాభిమానాలకు ధన్యవాదాలు’ కవిత ట్వీట్ చేశారు.

‘దురదృష్టకర సంఘటన కారణంగా మా తండ్రి కేసీఆర్‌కు మేజర్ సర్జరీ జరగనుంది.. నాన్న కోసం ప్రార్థనలు, ఆశీర్వాదాల వెల్లువను చూసి మేము ఆశ్చర్యపోయాం... మా నాయకుడు కేసీఆర్ గారు త్వరగా, ఆరోగ్యంగా కోలుకోవాలని ప్రార్థించడానికి బీఆర్ఎస్ కుటుంబం, శ్రేయోభిలాషులతో మేము చేరాం’ ఆరోగ్య బులిటెన్ విడుదలైన తర్వాత కవిత మరో ట్వీట్ చేశారు. అటు, తెలంగాణ గవర్నర్ తమిళసై సౌందరరాజన్ కూడా కేసీఆర్ గాయపడి విషయం తెలిసి విచారం వ్యక్తం చేశారు. ఆయన ఆరోగ్యం బాగుండాలని, త్వరగా కోలుకోవాలని ఆమె కోరుతూ ఈ మేరకు ట్వీట్టర్‌లో స్పందించారు.