byసూర్య | Mon, Dec 04, 2023, 09:18 PM

బీఆర్ఎస్ పార్టీ లో తీవ్ర విషాదం నెలకొంది. జనగామ జిల్లా పరిషత్ ఛైర్మన్, పార్టీ జిల్లా అధ్యక్షుడు పాగాల సంపత్ రెడ్డి.. గుండెపోటుతో మరణించారు. హన్మకొండలోని చైతన్యపురిలో తన నివాసంలో గుండెపోటు రావడంతో.. కుటుంబ సభ్యులు రోహిణి ఆసుపత్రికి తరలించారు. వైద్యులు చికిత్స అందిస్తుండగా తుది శ్వాస విడిచారు. ఇటుక బట్టిల వ్యాపారం చేస్తూ... 2004లో టీఆర్ఎస్ పార్టీలో చేరి రాజకీయ అరంగేట్రం చేశారు సంపత్ రెడ్డి. సంపత్ రెడ్డికి భార్య, ఒక కుమారుడు, కూతురు ఉన్నారు. 8 సంవత్సరాల క్రితం ఓ రోడ్డు ప్రమాదంలో తన కుమారుడు మృతి చెందాడు. గత జడ్పీటీసీ ఎన్నికల్లో చిల్పూర్ మండల జడ్పీటీసీగా సంపత్ రెడ్డి గెలుపొందారు. పల్లా రాజేశ్వర్ రెడ్డి, కడియం శ్రీహరి మద్దతుతో జిల్లా జడ్పీ ఛైర్మన్‌గా ఎన్నికయ్యారు. జిల్లా జడ్పీ ఛైర్మన్‌తో పాటు జనగామ జిల్లా అధ్యక్షుడిగా కూడా కొనసాగుతున్నారు సంపత్ రెడ్డి.

సంపత్ రెడ్డి మృతితో.. తన స్వగ్రామమైన రాజవరం గ్రామంలో విషాదఛాయలు అలుముకున్నాయి. కుటుంబ సభ్యులు శోకసంద్రంలో మునిగారు. ఆయన మృతదేహాన్ని స్వగ్రామం రాజావరానికి తీసుకెళ్లి రేపు అంత్యక్రియలు చేయనున్నారు. సంపత్ రెడ్డి అకాల మరణంతో.. అటు జనగామ బీఆర్ఎస్ శ్రేణుల్లోనూ తీవ్ర విషాదం నెలకొంది. సంపత్ రెడ్డి మృతి పట్ల పార్టీ అధినేత కేసీఆర్, బీఆర్ఎస్ వర్కింగ్ ప్రెసిడెంట్ కేటీఆర్, ఎమ్మెల్యేగా గెలిచిన పల్లా రాజేశ్వర్ రెడ్డి, మాజీ ఎమ్మెల్యే ముత్తిరెడ్డి యాదగిరి రెడ్డి తదితరులు తీవ్ర దిగ్బ్రాంతి వ్యక్తం చేశారు. ఆయన పార్టీకి చేసిన సేవలను గుర్తు చేసుకున్నారు.

నిన్న వెలువడిన అసెంబ్లీ ఎన్నికల్లో బీఆర్ఎస్ పార్టీ ఓటమి పాలైనపప్పటికీ.. జనగామలో పల్లా రాజేశ్వర్ రెడ్డి ఘన విజయం సాధించిన విషయం తెలిసిందే. అటు పార్టీ ఓటమి.. ఇటు అభ్యర్థి గెలుపు మధ్యలో ఎటూ తేలని పరిస్థితిలో ఉన్న శ్రేణులను.. సంపత్ రెడ్డి మృతి మరింత బాధకు గురిచేస్తోంది. జనగామలో బీఆర్ఎస్ నుంచి బరిలో దిగిన ఎమ్మెల్సీ పల్లా రాజేశ్వర్ రెడ్డి.. కాంగ్రెస్ అభ్యర్థి కొమ్మూరి ప్రతాప రెడ్డిపై 15 వేల మెజార్టీతో గెలుపొందారు. అయితే.. రాష్ట్రం మొత్తంగా బీఆర్ఎస్ పార్టీ 39 స్థానాలకే పరిమితం కావటం.. కాంగ్రెస్‌కు 65 సీట్లు రావటంతో.. అధికారం హస్తగతమైన విషయం తెలిసిందే.