byసూర్య | Tue, Nov 28, 2023, 08:30 PM

నాగర్‌కర్నూలు జిల్లా కొల్లాపూర్ నియోజకవర్గం నుంచి బర్రెలక్క అలియాస్ కర్నె శిరీష తెలంగాణ అసెంబ్లీ ఎన్నికల బరిలో నిలిచిన విషయం తెలిసిందే. నిరుద్యోగుల గొంతుకగా ఆమెను ఎన్నికల్లో పోటీ చేస్తున్నారు. అయితే బర్రెలక్కకు అన్ని వర్గాల నుంచి మద్దతు లభిస్తోంది. ఏపీ, తెలంగాణ నుంచి చాలా మంది ఆమెను సపోర్టు చేస్తున్నారు. స్వచ్ఛందంగా చాలా మంది కొల్లాపూర్ వచ్చి ఆమెకు మద్దతుగా ప్రచార చేస్తున్నారు. ప్రచారానికి అవసరమైన డబ్బులు కూడా ఇస్తున్నారు.

బర్రెలక్కకు పుదుచ్చేరి ప్రభుత్వానికి యానాం నుంచి ఢిల్లీలో ప్రత్యేక ప్రతినిధిగా ఉన్న మల్లాడి కృష్ణారావు రూ.5.10 లక్షల చెక్కులను సోమవారం అందజేశారు. బర్రెలక్క నిజాయతీ, ధైర్యం నచ్చి, ఆమెకు మద్దతుగా ప్రచారానికికెళ్లి సహాయం అందించారు. బర్రెలక్క భవిష్యత్తు అవసరాల కోసం పలువురు దాతలు, తన స్నేహితుల నుంచీ ఈ డబ్బు సేకరించి ఇచ్చామని మల్లాడి ఇక్కడ వెల్లడించారు. బరెలక్కకు ఒక్క అవకాశం ఇచ్చి కొల్లాపూర్‌ ప్రజలు గెలిపించాలని, పోలింగ్‌ కేంద్రాలలో ఆమె తరఫున ఏజెంట్లుగా ఉండేందుకు యువత ముందుకు రావాలని మల్లాడి కోరారు.

ఎన్నికలు, రాజకీయ వ్యవస్థల్లో మార్పు తీసుకురావాలనుకునేవారు చాలామంది బర్రెలక్కకు మద్దతు తెలుపుతున్నారు. కొల్లపూర్ నియోజకవర్గం కంటే ఇతర ప్రాంతాల నుంచి వచ్చిన వారే ఎక్కువగా ఆమె వెంట ప్రచారానికి వెళ్తున్నారు. యువత రాజకీయాల్లోకి రావాల్సిన అవసరం ఉందని.. ఇలాంటి వారే చట్టసభలకు వెళ్లాలని చెబుతున్నారు. ఆమె ఎవరో తెలియకున్నా.. సోషల్ మీడియాలో వీడియోలు చూసి సొంత డబ్బులు ఖర్చు పెట్టుకొని మరీ ఆమె తరపున ప్రచారం చేస్తున్నామన్నాకు. ఇటీవల సీబీఐ మాజీ జేడీ లక్ష్మీనారాయణ కూడా బర్రెలక్క తరపున ఎన్నికల ప్రచారం నిర్వహించారు. బీఆర్ఎస్ తరపున ఇక్కడ హర్షవర్ధన్ రెడ్డి, కాంగ్రెస్ తరపున మాజీమంత్రి జూపల్లి కృష్ణారావు వంటి బలమైన నేతలు పోటీ చేస్తుండగా.. వారికి బర్రెలక్క గట్టి పోటీ ఇస్తుందని రాజకీయ విశ్లేషకులు అంటున్నారు.