byసూర్య | Tue, Nov 21, 2023, 08:57 PM

తెలంగాణలో రాజకీయాలు తారాస్థాయికి చేరుకున్నాయి. అసెంబ్లీ ఎన్నికల పోలింగ్‌ తేదీ దగ్గరపడుతుండటంతో అన్ని పార్టీలు ప్రచారాన్ని ముమ్మరం చేశాయి. ఎన్నికల అధికారులు కూడా పోలింగ్ నిర్వహణకు ఏర్పాట్లు చేస్తున్నారు. ఎన్నికల కోసం ఇప్పటికే ఈవీఎంలను సిద్ధం చేశారు. నమూనా బ్యాలెట్ పేపర్లను అభ్యర్థులకు ఇచ్చారు. అయితే, ఎన్నికల అధికారుల తీరుపై ములుగు నియోజకవర్గ కాంగ్రెస్ అభ్యర్థి దనసరి అనసూయ (సీతక్క) ఆగ్రహం వ్యక్తం చేశారు. ఈవీఎం బ్యాలెట్ పత్రంలో తన ఫోటో చిన్నదిగా ముద్రించారని ఆమె ఆరోపించారు. అర్ధరాత్రి ఒంటి గంట వరకూ ఎన్నికల రిటర్నింగ్‌ అధికారి ఆఫీస్ ఎదుట ఆందోళనకు దిగారు. కార్యాలయం ముందు బైఠాయించి నిరసన తెలిపారు.

ఇది అధికార బీఆర్ఎస్ పార్టీ కుట్రగా సీతక్క ఆరోపించారు. టీపీసీసీ అధ్యక్షుడు రేవంత్‌రెడ్డి ఈ విషయంపై సీతక్కను వివరాలు అడిగి తెలుసుకున్నారు. తన ఫోటో చిన్నదిగా ముద్రించటంపై అర్ధరాత్రి 1.30 తర్వాత కూడా సీతక్క ఆందోళన కొనసాగించారు. అంతకు ముందు ఈ విషయంలో అధికారుల నుంచి సరైన సమాధానం రాకపోవడంతో కాంగ్రెస్‌ పార్టీ నాయకులు ఆర్వో కార్యాలయం ముందు ధర్నాకు దిగారు. పోలీసులు అక్కడికి చేరుకొని వారిని సముదాయించినప్పటికీ.. స్పష్టమైన హామీ ఇస్తేనే ఇక్కడి నుంచి వెళ్తామన్నారు. రిటర్నింగ్‌ అధికారి సూచన మేరకు సీతక్క మరో ఫొటోను తీసుకొచ్చి ఎన్నికల అధికారులకు ఇచ్చారు.

ఈ ఫొటోను ఈవీఎం బ్యాలెట్‌పై పొందు పరుస్తామని సమాధానమిచ్చి రిటర్నింగ్‌ అధికారి అక్కడి నుంచి వెళ్లిపోయారు. అయితే.. ఆర్వో ఇచ్చిన హామీలో స్పష్టత కనిపించడం లేదని కాంగ్రెస్‌ నాయకులు అక్కడే బైఠాయించారు. మహబూబాబాద్‌ జిల్లా గంగారం మండలంలో ప్రచారం నిర్వహించిన సీతక్క అర్ధరాత్రి ఎన్నికల రిటర్నింగ్‌ అధికారి కార్యాలయానికి చేరుకున్నారు. అసిస్టెంట్‌ రిటర్నింగ్‌ అధికారి విజయ్‌భాస్కర్‌తో ఈవీఎం బ్యాలెట్ పేపర్‌లో ఫోటో చిన్నదిగా ముద్రించటంపై మాట్లాడారు. ఆయన నుంచి సరైన స్పందన లేకపోటవంతో అక్కడే బైఠాయించారు.