byసూర్య | Sat, Sep 23, 2023, 06:50 PM

తెలంగాణలో అసెంబ్లీ ఎన్నికలు షెడ్యూల్ ప్రకారమే జరుగుతాయని రాష్ట్ర ఎన్నికల అధికారి వికాస్ రాజ్ క్లారిటీ ఇచ్చారు. ఇప్పటికే.. ఎన్నికల ప్రక్రియ ప్రారంభం కాగా... వేగం పెంచినట్టు చెప్పుకొచ్చారు. ఇప్పటికే.. ఈవీఎంలను చెక్ చేశామని తెలిపారు. సిబ్బందిని గుర్తించి.. వాళ్లకు శిక్షణ ఇవ్వాల్సి ఉందన్నారు.

తెలంగాణలో షెడ్యూల్ ప్రకారమే ఎన్నికలు జరుగుతాయని రాష్ట్ర ఎన్నికల అధికారి వికాస్ రాజ్ తెలిపారు. ఎన్నికలకు మరో రెండు మూడు నెలలే ఉండటంతో.. ఈ ప్రక్రియలో వేగం పెంచుతున్నామని, అందుకు సంబంధించిన అన్ని అవసరమైన చర్యలు చేపడుతున్నామని చెప్పుకొచ్చారు. 24, 25 తేదీల నుంచి సమ్మరి రివిజన్‌ ప్రారంభమవుతుందన్నారు. ఇప్పటికే ఈవీఎంలన్నింటినీ చెక్‌ చేశామని.. అధికారుల శిక్షణ కోసం ఈవీఎంలను తెప్పించామన్నారు. బీఆర్‌కే భవన్‌లో ఏర్పాటు మీడియా సెంటర్‌ను ప్రారంభించిన సీఈవో వికాస్‌రాజ్‌.. ఎన్నికల ప్రక్రియకు సంబంధించిన వివరాలను వెల్లడించారు.

వచ్చే నెలలో ఎలక్షన్లకు అవసరమైన డిస్టిబ్యూషన్‌ కేంద్రాలు, స్ట్రాంగ్ రూంలను కూడా ఏర్పాటు చేస్తున్నామని వికాస్ రాజ్ తెలిపారు. ప్రిసైడింగ్ అధికారులు, పోలింగ్ అధికారులను గుర్తించడం, వాళ్లకు ట్రైనింగ్ ఇవ్వడం, పోలింగ్ స్టేషన్లు పరిశీలించి ఈసీఐ సూచనల ప్రకారం ఆయా ప్రాంతాల్లో కనీస మౌలిక సౌకర్యాలు ఉన్నాయా? లేదా? పరిశీలించి.. ఒకవేళ లేకుంటే సౌకర్యాలు కల్పిస్తున్నామన్నారు. వాటితో పాటు కౌంటింగ్ కేంద్రాలను కూడా గుర్తించడంతో పాటు, కేంద్ర బలగాలకు వసతి, రవాణా సౌకర్యం, వారికి విధుల కేటాయింపు వంటిపై అంశాలపై దృష్టిసారించామన్నారు. బ్యాలెట్ పేపర్ల ప్రింటింగ్, ఈవీఎంల ర్యాండమైజేషన్ తదితర ఏర్పాట్లు, శిక్షణ కొనసాగుతున్నాయన్నారు.

ఇదిలా ఉంటే.. అక్టోబరులో 3, 4, 5 తేదీల్లో తెలంగాణలో కేంద్ర ఎన్నికల బృందం పర్యటించనుందని వికాస్‌ రాజ్‌ తెలిపారు. కేంద్ర బృందం రాష్ట్రంలోని రాజకీయ నాయకులతో, సీఎస్‌, డీజీపీ, కలెక్టర్లతో సమావేశం కానుందని తెలిపారు. అయితే.. జనవరి నుంచి ఇప్పటి వరకు 15 లక్షల కొత్త ఓట్లు నమోదయ్యాయని.. 3 లక్షల ఓట్లు రద్దయ్యాయని వివరించారు. ఫారం-6, 8లు 15 వేలకు పైగా వచ్చాయని.. ఓట్ల నమోదు ప్రక్రియ కొనసాగుతోందని వికాస్‌రాజ్‌ స్పష్టం చేశారు. అందులో.. 6.99 లక్షల మంది యువ ఓటర్లు నమోదు చేసుకున్నారన్నారు.